Enfoca riba prevencion y cuido di salud, Proyecto Prisma lo tin 3 dia di curso e siman aki

Proyecto Prisma Aruba di Fundacion Diabetes Aruba ta un programa cu a wordo anuncia for di aña 2019 specialmente dedica pa esnan cu ta sufri di malesa di diabetes caminda e siman aki personanan por haya mas conocemento di e topico aki cu tres dia di curso.

Prisma lo tuma luga dia 3, 10 y 17 di september totalmente gratis y di un manera interactivo pa personanan por haya mas conocemento y habilidad pa maneha nan salud, esunnan interesa por registra riba e website www.fdaruba.com of yama na telefon 566.5045 pa asina ey haya mas informacion tocante con por maneha diabetes di tipo 2 y tuma control di dje.

Aña pasa, a keda conoci cu na 2020 Aruba hunto cu Organisacion Panamericano di Salud (PAHO) a lansa un documento multisectorial cu ta yama ‘Nacional Multisectorial and CDS Document’ mirando e problematica cu salud na Aruba tin na unda tin hopi hende cu ta sufri di problemanan cardiovascular, diabetes, cancer, malesanan cronico cu tin di haber hopi cu estilo di bida di e hendenan y pa via di esaki, a dicidi pa bin cu un plan nacional pa combati Non Communicable Diseases (NCD).

E documento aki ta basa riba Evidence Based Program cu tin e vision di Departamento di Salud Publico (DVG) na unda nan no kier a bay y crea programanan nobo, nan kier fortalece e programanan cu ta existente, esun cu ya caba a demostra nan efectividad na Evidence Based.

Ta ‘pesey cu PAHO a aloca e fondonan necesario pa nan por realisa e programanan cu ta cay bao e vision di prevencion di NCD’s Aruba.

Esaki ta un programa hopi importante cu ta enfoca riba e hende cu ta biba cu e malesa di diabetes tipo 2, pa nan por tin conocemento di e malesa, nan factornan di riesgo y con nan por influencia esaki den un manera positivo.

El a splica cu Fundacion Diabetes ta un organisacion cu ta pone hopi enfasis riba tur loke tin di haber cu e malesa aki, pero door cu e programa ta enfoca riba e tipo 2 el a expresa cu ta pa motibo cu ta un malesa cu ta prevalece hopi na Aruba.

Di 8.500 pa casi 8.700 persona tabata registra na AZV usando remedinan pa diabetes na 2021, di e cantidad ey tin un grupo chikito cu tin diabetes tipo 1, usualmente esaki ta un tipo di diabetes cu ta bin na mucha y den adolescencia y e ta full diferente compara cu esun tipo 2.

Ta importante pa pashentnan cu ta sufri di cualkier di e dos tipo di diabetes cu mester pone enfasis riba nan estilo di bida, pa motibo cu esaki ta un malesa cu ta bin ora cu un estilo di bida ta full desbalansa y nan ta enfoca specialmente riba obesidad, personanan cu tin problema cu sobrepeso y acumulacion di vet rond di e organonan di e bariga, esaki ta e personanan cu na lo largo por desaroya e diabetes tipo 2.

Tambe ta existi e factor genetico, por a mira casonan den e rasa como esunnan descendiente di Africano y Indigena di Caribe na unda e hende ta mas sensibel pa desaroya diabetes tipo 2.

E programa aki ta enfoca riba e pashent mes y su problemanan individual den e maneho di diabetes, pa motibo cu no ta tur hende tin e mesun echonan ni e mesun problemanan pa maneha e malesa y pa cambia factornan di estilo di bida, ta existi hende cu tin mas problema, por ehempel, pa haya un manera pa haci movecion y tin otro hende cu tin mas problema pa haci cambionan den nan manera di come.

Cu interaccion y participacion pa un grupo chikito di hende e curso aki ta bay pone atencion riba e hende individual, enfoca riba loke nan kier saca di e curso y loke nan kier cambia den un plan cu nan por haci pa bin cu cambionan den nan estilo di bida pero cu por ta faborabel.

Fundacion Diabetes tin e mision pa crea e transformacion di conscientisacion den colaboracion cu otro stakeholder di salud pa asina empodera e hende mes cu mester bin cu e cambio.

Charlene Leslie, coordinado di e proyecto aki, ta recorda cu Fundacion Diabetes a cuminsa cu nan curso di PRISMA na aña 2019 como un programa piloto na unda ta conta cu un investigacion di Universidad di Aruba pa por wak e efectividad di e programa na unda e resultadonan a mustra cu ta positivo, 75 participante den un periodo di seis luna a haya un score di satisfaccion cu un 9.3 a base di un scala di 1 pa 10.

Tambe PRISMA tabatin un impacto positivo riba e cumplimento di e terapia, nan a wak esey riba nivel di alimentacion, actividad fisico pero tambe uso di medicamento, Covid-19 a trece cune un efecto na unda algun participante no a logra cumpli cu loke nan a plania.