Diahuebs ultimo un team di Astrofisico uzando e James Webb telescop a midi CO2 den e atmosfera di un exoplaneta. Un exoplaneta ta un planeta pafo di nos sistema solar cu ta draai rond di un otro strea. Tabata imposibel detecta gasnan den atmosfera di otro planeta te cu e binida di e telescop espacial James Webb.
Segun e cientificonan, esaki ta un paso importante pa busca planeta cu por sostene bida. Na nos planeta tera CO2 ta bin door di sernan bibo cu ta hala rosea. Pero e hayasgo aki no ta nifica automaticamente cu e planeta tin bida riba dje.
Algun astronomo di Hulanda di universidad di Leiden y Amsterdam a haci e descubrimento aki. E articulo cientifico di e descubrimento aki pronto lo sali den e revista Nature, cual ta un di e revistanan cientifico mas respeta na mundo.
E nomber cientifico di e planeta ta WASP-39b, cual ta un planeta grandura di Jupiter y ta mes pisa cu Saturno. E temperatura riba e superficie di e planeta ta di 900 grado Celsius, esaki ta debi cu e planeta ta orbita hopi cerca di su strea. E planeta aki ta keda 700 aña luz for di nos planeta tera.
A descubri e planeta na 2011 door un colectivo internacional cu yama Wide Angle Search for Planets (WASP) uzando un netwerk di telescopnan robotico.
A scoge e nomber Boca Prins pa e planeta, door di un concurso organisa door di International Astronomical Union na 2019. Space and Nature Aruba Foundation a facilita e concurso aki na Aruba cu ta e outreach coordinator pa IAU. Publico en general por a manda nan sugerencianan. For di e seleccion aki a scoge Boca Prins pa e planeta y Malmok pa e strea.
