Despues cu Aruba a wordo informa cu den conseho di minister di Reino Aruba no lo haya un aanwijzing, Prome Minister Evelyn Wever-Croes y Minister di Finanzas Xiomara Maduro a ofrece un conferencia di prensa pa duna mas detaye di esaki.

Den un comunicado di prensa oranan mas trempan nan a indica cu pa loke ta trata e aanwijzing, Aruba ta trahando riba e “zienswijze den cual lo reacciona detayadamente riba e advies di CAft.” RMR a indica di lo warda riba e zienswijze prome cu tuma decision. Secretario di Estado van Huffelen den su declaracion a bisa cu e ta spera cu no mester di aanwijzing.

Manera a informa RMR, no tin base pa pone un aanwijzing, e Prome Mandatario a bisa. “E no ta necesario pasobra ya Aruba ta bahando e deficit y e no ta prudente pasobra simplemente no por pone mas presion riba comunidad cu mas medida of kita hende for di trabou. A palabra cu Aruba ta traha riba su zienswijze.

Di nan banda, nan tin tur confiansa cu lo no bin un aanwijzing, mientras cu nan ta sigui traha pa reduci e deficit.

Ta conoci cu aumento di BBO ta bay saca 100 miyon di economia y ta un hecho cu ora saca placa di economia e ta bay crea un recesion. Ademas e entrada no ta bay tapa e buraco financiero pa motibo cu e deficit lo keda. A palabra cu Hulanda cu ta bay baha gasto di salario. Pero no ta haciendo esey. Prome Minister durante e conferencia di prensa a bisa cu “e reforma fiscal ta un pakete di diferente proposicion cu trece casi 100 miyon florin aden. Den e reforma fiscal tin algun aspecto cu ta aumenta manera BBO pero tambe tin aspecto cu ta bay reduci pa duna compensacion pa e perdida poder di compra. Contrario cu e reforma fiscal pasa, nos a hisa e tarifa di grondbelasting pa esnan cu ta biba na exterior y nos baha e tarifa e tarifa di esnan cu ta biba akinan. E pakete ta hopi balansa”.

Pa loke ta trata e gastonan di salario, Wever Croes a indica cu desde 2018 cu nan a bin cu e BVP, E Beleidsplan Verlaging Personeelskosten, esakinan a bin ta baha. Prome Minister a presenta un grafico di esaki cu segun el a sigura, ta mustra con e gastonan ey ta bahando y lo sigui baha. “Nos a yega na palabracion di protocol cu Hulanda cu nos a cuminsa cu 479 miyon na e momento ey y cu cada aña e ta baha y nos a cumpli cune, hasta si bo ta desconta e recorte di salario di 12.6%,” Minister Presidente a bisa.

E preocupacion di mas grandi cu Gobierno tin na e momentonan aki, ta cu costo di bida ta sigui aumenta. Manera Prome Minister a sigura cu tur decision cu nan ta tuma, “ ta purba di trece esey den balans”.

Igualmente, gobierno a invita comerciantenan Chines pa pidi nan pa baha prijs, algun di nan ta cobra BBO, BAZV pero no ta registra den caha. Y no ta entrega e suma na Gobierno, di esaki, manera Director di SVB/AZV Edwin Jacobs a bisa recientemente. Redactor di Bon Dia Aruba a puntra si ta bay kita nan licencia di negoshinan cu ta haci nan mes culpabel na esaki.

Prome Minister a declara cu den e reunion di representantenan di supermercadonan nan ta den proceso pa pidi nan tambe con nan por yuda pa baha e prijsnan pa motibo cu “Gobierno por haci un parti di e trabou pero bo mester di tur e cadena pa haci’e. Nos no ta asina leu ainda. E prome reunion a bay hopi bon. Nan a bay den nan seno pa papia di esey y bolbe bek.”

Comerciantenan Chines a trece algun puntonan dilanti unda cu Prome Minister ta considera cu ta hopi importante pa yuda baha e prijsnan y nan tin cu sigui cu combersacionnan ainda riba e parti di fleta, cu ta un un gasto hopi halto. “Nos ta trahando cu alma y cuerpo pa baha e costo di bida,” Prome Minister a comenta.

Tambe, Aruba a firma un protocol cu Hulanda na 2018. E protocol ta e base di tur e condicionnan pa e sosten di likides y Prome Minister a bisa cu e protocol di 2018 ta den ehecucion y cu nan ta cumpliendo cune. E diferencia di opinion cu Gobierno di Aruba tin cu Hulanda ta cu den e protocol ey ta duna tur e pasonan cu nan tin cu tuma riba corto, mediano y largo plaso pa baha e debe. Eynan nan a yega na e palabracion cu “nos debe na 2027 mester ta na 70% y na 2039 e mester ta na 50%. Esey tabata e palabracion di debe, a pesar di Covid-19, a pesar di e debe gigantesco cu nos a keda cune, nos ta riba e caminda aki ainda pa loke ta trata e debe,” el a sigura.

Si tur cos ta bon, fin di aña aki lo yega na 98.2 miyon florin y asina nan tin cu sigui bah’e, den e palabracion tambe ta inclui e gasto di personal cu manera Prome Minister a menciona caba, nan ta cumpliendo cun’e. El a bisa cu “CAft no kier pa Gobierno duna e 12.6% back y esey ta e punto cu CAft ta sostene.”

Di e begrotingsnormen el a splica cu prome cu pandemia, e deficit nan a palabra cu tin un trayecto pa cana y cu pa 2019 nan tabatin e prome aña di surplus. Na 2020 a pandemia a yega Aruba cu a pone cu a cay hopi atras. “CAft na e momentonan aki ta bisa cu e mesun normanan ey di 2018 tin cu wordo aplica awor. Esey ta nifica cu e aña aki y otro mester tin un surplus di 1% . Nos lo yega eynan back pero esaki no ta e aña pa yega na dje ainda y otro aña tampoco. Muy probablemente e aña despues, si nos ta trahando un frame nobo pa nos por stipula cua ta e aña cu nos ta yega na e 1% pa e ora nos ta den cumplimento bek”, el a declara.

Secretario di Estado Van Huffelen a bisa cu mester ahusta presupuesto 2022 segun conseho di CAft cu ta basa riba palabracionnan cu Aruba a haci cu Hulanda. Pero Minister Xiomara Maduro a indica cu otro siman, dia 1 di september nan lo entrega presupuesto di aña 2023 y nan lo entrega e nota di fin di aña pa asina duna informacion adelanta riba kico ta bira e cambio di presupuesto 2022. “E cambio di presupuesto ta un procedura normal den ciclo presupuestario di pais Aruba, e cambionan akinan ta bin mas tanto den October pa e ora ey prome cu fin di aña e keda trata pa Parlamento. Pero debi na e situacion cu nos ta den dje, e critica di CAft, e menasa di KB, cu tur eseynan nos a adelanta e proceso akinan.”

Asina mes, el a bisa cu tin hopi proceso financiero banda di otro pa presupuesto 2023 pero tambe e ciclo presupuestario coriente ta conoce su cambio manera normal pero di un manera mas acelera.