(NLTimes) – E huicio criminal tratando e caso di asesinato di Peter R. de Vries posiblemente lo mester cuminsa di nobo pa motibo cu e hues a renuncia e caso.
Un di e 3 huesnan lo muda fuera di e pais, y a revela esaki durante e audiencia di e caso cu a bolbe habri riba diahuebs, NOS a reporta.
E hues a plania su relocalisacion den e temporada aki pa motibo cu e caso di De Vries lo a ta completa caba. Sinembargo den juli, corte a bolbe habri e caso hustamente prome cu a yega na un decision. Ministerio Publico (OM) a presenta declaracionnan di testigonan nobo, cual por tin un impacto den e veredicto. OM a pidi un sentencia di bida largo den prizon pa e dos sospechosonan.
Un hues di reemplaso a ser asigna. Sinembargo segun corte, ley ta bisa cu e huicio mester bolbe cuminsa al menos cu OM y e abogadonan di defensa dicidi cu esaki no ta necesario. E partidonan involucra ta discutiendo esaki actualmente. Abogadonan representando Delano G. y Kamil. E. a nenga di duna comentario riba diamars mainta, segun NOS. Y OM tampoco a duna comentario.
De Vries su yiu homber Royce no ta contento cu e revelacion aki. “Bo ta kere cu tur cos a caba, y despues henter e caso mester cuminsa di nobo.” El a bisa cu ta remarcabel cu e corte no a anticipa e hues su salida, cual tabata conoci pa un tempo caba. Segun De Vries, corte mester a asigna un hues den reserva, di mesun manera cu a haci den casonan grandi manera MH17 of Marengo.
