Libertad di prensa ta esencial pa e existencia di sociedadnan democratico y liber. Periodistanan y medionan di comunicacion ta fundamental pa garantisa transparencia y splicacionnan di autoridadnan publico y gubernamental. Sinembargo, e libertad di prensa y e seguridad di periodistanan ta wordo menasa grandemente na henter mundo.
Den e ultimo añanan por a constata un aumento di e magnitud y e cantidad di atakenan contra e seguridad fisico di periodista- y trahadonan di medionan di comunicacion, como tambe incidentenan cu ta afecta nan capacidad di eherce e libertad di expresion, entre otro arestonan, diferente casonan di persecucion, negacion di acceso na noticia y informacion, y incapacidad pa investiga y hiba na corte e delitonan aki.
Mexico ta un di e paisnan cu mas violencia ta eherce contra periodistanan. Violencia contra prensa na Mexico no tin un descanso y den ocho lunanan di aña 2022, 15 periodista a wordo asesina na e pais, segun e cifranan di organisacionnan manera Articulo 19, Reporteros Sin Fronteras (RSF) y e Comite pa Proteccion di Periodistanan.
E pais Latino Americano ta wordo considera un di esunnan mas letal pa eherce e profesion di periodista. E aña aki nan a supera estadisticonan y 2022 a bira e aña mas mortal pa prensa, compara cu 2017, durante cual el a registra 12 asesinato di periodista durante full e aña, segun datonan di Articulo 19, un organisacion defensor di libertad di expresion cu ta actua na Mexico y otro paisnan di e region cu a cuminsa cu su conteo na aña 2000.
Aunke desde 2012 Mexico a implementa un mecanismo di proteccion pa prensa. Den e ola di violencia cu ta golpia Mexico actualmente, e falta di recursonan y di capacitacion di esunnan cu ta evalua e riesgo cu e periodistanan ta core y e nivel halto di impunidad, e ta complica cu e agresionnan aki lo stop.
Na Nicaragua tambe e periodistanan ta pasando den un situacion critico na unda nan ta sinti pusha contra muraya pa eherce nan profesion cu imparcialidad y tin biaha nan mester scoge entre bay cera of exilio.
E experto den medionan di comunicacion y columnista di e medio Confidencial, Mildred Largaespada a comenta na Voz de America cu e gobierno di Daniel Ortega lo bay tras di cualkier periodista cu lo describi e realidad cu e pais ta pasando aden.
“E periodistanan a biba den nan mesun carni e represion, y no solamente e represion, dirigi contra e periodistanan, si no cu nan a wak tambe e represion contra hendenan inocente y esey ta converti nan den testigo”, Largaespada a bisa.
El a agrega cu e regimen no kier ningun hende cu por testifica den nan contra. E rol di periodista como testigo ta esun cu ta cay mas pisa pa e regimen. Y esey ta un menasa pa cualkier periodista y pa cualkier persona cu tin un voz talentoso pa comunica ariba rednan social.
Otro caso di violacion di libertad di expresion ta relacion na e fundador di conocido medio Wikileaks. E Secretario di Interior di Reino Uni, Priti Pitel, a firma un ordo pa extradita e fundador di Wikileaks, Julian Assange, pa Merca unda cu e ta enfrenta cargonan di spionahe.
Assange por enfrenta te cu 175 aña den un prison Mericano despues cu e Reino Uni a aproba su extradicion pa Merca. Assange ta wordo acusa di divulga documentonan y secretonan di seguridad halto cu entre otro tabata infroma di possible crimennan di guera cu ehercito Mericano a comete.
Amnistia Internacional (AI), organisacion defensora di derechonan humano, ta apoya Assange firmemente y ta defende su derecho como persona y periodista. AI ta insisti cu e Assange tabata eherciendo e trabou habitual di un periodista cual tabata investiga pa informa e publico y no mester wordo castiga oa esaki y e persecucion contra su persona ta un atake contra e libertad di expresion.
Na Venezuela libertad di prensa tambe ta sufri atakenan contsantemnete di parti di e regimen di Nicolas Maduro. Den luna di jui 23 pais miembro di Media Freedom Coalition a denuncia atakenan contra periodistanan y libertad di prensa na Venezuela.
E paisnan aki a denuncia cu den e ultimo añanan e regimen di Maduro a resntringui e libertad di prensa presiguiendo e periodistanan oponente. Medionan di comunciacion cu ta critica of desafia e regimen di Maduro ta corre riesgo di enfrenta consecuencianan legal incluyendo cancelacion di nan licencianan y confiscacion di nan ekiponan. Como resultado Venezuela a perde su vibrante sector periodistico y e regimen di Maduro ta ta controla e narrativa nacional.
