Un aña escolar nobo a cuminsa unda cu minister di Enseñanza, Endy Croes, a ofrece un conferencia di prensa pa trece dilanti un actualisacion di diferente temanan di enseñansa como por ehemplo Openbare Avondleergangen Aruba (OAA) cu lo tin un ubicacion nobo.

Minister Croes a bisa cu na e momentonan aki nan ta bezig pa reanuda Openbare Avondleergangen Aruba (OAA) cu a bay plat for di aña 2021, el a recorda cu esaki ta e prome scol di ofishi tecnico di Aruba cu ta situa na John F. Kennedy, for di 1955 ta bin brindando enseñansa parti anochi y na 2009 a resorta bao di departamento di Publieke Scholen (DPS).

El a splica cu nan tin un ekipo cu ta trahando riba esaki, na unda ta haciendo restructuracion cu e meta ta pa pone OAA ofrece cursonan y opleiding na bienestar y demanda laboral cu un enseñansa practico y dinamico, tambe lo enfoca riba experiencia di trabao anterior y ofrece riba perspectiva pa futuro di hobennan di 17 aña bay ariba por participa, cu e condicion cu no mester ta den enseñansa obligatorio y esnan cu kier redefini nan mes of ta buscando un trabao, manera el a sigura.

Nan lo bay brinda for di september segun tin plania di cuminsa, dos opleiding e cual un di nan ta di Hulp Elektromotor niveau 2 cu ta un programa di ROVC cu nan diploma ta reconoci segun loke minister Croes a bisa y e otro ta di Leer Werk Traject (LWT) niveau 1 cu ta di programa EPB di Aruba.

LWT lo tin un duracion di 1 aña escolar na unda lo brinda conocemento basico di automonteur, onderhoudsmonteur, commerciele medewerker y uiterlijke verzorging.

Igualmente, na februari di 2023 OAA lo expande cu otro opleidingnan como algemeen administratief medewerker niveau 2/3, lassen NIL, monteur en opbouw niveau 2/3 y ICT niveau 3.

Di esaki el a señala cu na Hulanda tur compania cu ta haci servicio di airco na companianan grandi, casnan of otro luga tin cu pasa den e sistema aki y esey ta e motibo di pakico nan ta trece esaki dilanti pa asina tin personanan trahando den area aki cu un diploma y experticio.

Igualmente el a informa cu depende di e opleiding e por varia entre 6 luna te cu 2 aña, cu un maximo di 4 biaha anochi pa siman, cu ta componi di 4 ora di lesnan di 45 minuut pa anochi y e pasantia ta a base di Eerder Verworven Competentie (EVC).

OAA lo ta mudando den e siman aki loke ta nifica cu nan lo tin ubicacion nobo y lo wordo informa di esey proximamente.

Mudamento di Scol Reina Beatriz y Paso pa Futuro

Den otro topico, minister Croes a papia tocante e mudamento di Reina Beatrix scol cu Scol Paso pa Futuro na unda el a informa cu den e prome dianan di juli ultimo nan a cuminsa ehecuta e cambio di scol caminda cu Reina Beatrix cu tin cerca di 315 alumno tabata situa na diferente luganan como Sero Blanco y na Dakota, el a wordo cera na 2014 y su edificio mes a bira un monumento loke a bira mas dificil y costoso pa por drech’e y renob’e back.

Nan a bin cu e solucion unda cu scol Paso pa Futuro tabata ta cu tin un espacio grandi cu 17 lokaal y a yega na acuerdo cu e cabesantenan e cual nan a indica cu ayera tabata e prome dia di scol di Reina Beatrix na su ubicacion nobo unda cu segun tur e docentenan a keda contento cu tur klasnan a keda den mesun edificio.

Di scol Paso pa Futuro cu tin 115 alumno y lo cuminsa dialuna 29 di augustus, minister Croes a gradici nan cooperacion unda cu nan a wordo ubica na e edificio unda antes Reina Beatriz tabata ubica na Sero Blanco, esaki ta un fase transitorio manera minister Croes a informa.

EPI ta cuminsa cu 21 klas

Tambe, minister Croes a informa cu nan a cuminsa prepara for di 17 di augustus unda nan a haci un peticion na Inspectie Onderwijs y na minister mes pa scol mes por cuminsa dia 5 di september, di esaki, el a splica cu EPI a pasa hunto cu SEPB den e proyecto di National Strategic Plan y a renoba 12 opleiding, 4 di SEPB y 8 di EPI.

Den e proceso aki, el a bisa cu tabatin cierto inkietud den comunidad y aworaki nan ta bezig training e docentenan cu e innovacion cu a tuma luga den e opleidingnan aki pa asina dia 5 di september lesnan lo cuminsa wordo duna.

E idea na comienso tabata pa inicia cu 17 klas nobo di 26 alumno como maximo, 5 grupo di opleiding bieu lo a keda den e prome klas y 4 grupo cu a keda sinta di eerste klas, esey tabata e prome intencion pero debi na e peticion grandi di hopi studiante cu kisas no a haya un luga, a amplia esaki y a termina agregando 4 klas mas cu un total di 21.

Pa finalisa, el a bisa cu siman pasa Aruba tabatin bishita di Inspectie di Hulanda cu den cuadro di e Landspakket y tussenrapportage cu ta riba mesa desde januari ultimo a bini pa mira e adelanto den e 13 punto di recomendacion di e tussenrapportage.

El a splica cu den esaki Aruba ta mas adelanta cu Corsou y Sint Maarten den cuadro di cumplimento.