Tin asina tanto grupo musical awendia riba internet, cu ta resulta imposibel pa haya sa cuanto grupo ta nace cada dia. Na Aruba recientemente un grupo hubenil di musica a wordo crea na un scol cu e fin di entretene y sigui crece den e area di musica.
Rocking Youth Band ta un grupo conforma di 9 hoben entre 13 y 15 aña di edad cu fin di siman ultimo a haci nan prome presentacion pafo di nan scol, cu primeramente tabata e luga na unda nan a wordo crea un aña pasa. Normalmente nan tabata presenta nan performance den diferente evento di scol y esun aki a tuma luga na un local conoci.
Den nan comienso, nan tabata dirigi door di juffrouw Petra Alben, pero el a bay biba na Hulanda back, lagando atras e peticion pa no laga nan talento bay perdi y asina present’e den e grupo den diferente area como piano, baho, guitara, drum, ukulele, entre otro.
Den e ocasion aki, Bon Dia Aruba a haci un entrevista special cu Tony Parejo, un musico di profesion cu ta duna les di musica, kende ta representante di e banda musical aki y tambe ta tata di dos di e hobennan cu ta conforma e banda. El a sigura cu nan prome presentacion di diasabra ultimo pa publico general tabata un exito cual e hendenan presente a disfruta.
E muchanan di Rocking Youth Band tabatin les di musica den mesun scol unda algun di nan te ainda ta studia y cada un ta ricibi les aparte di e instrumentonan cu nan ta specialisa.
Rocking Youth Band ta forma pa Paula Spinosi di 14 aña, Jenna Croes di 15 aña, nan dos ta dedica na tocamento di ukulele; Vida Maria di 13 aña cu ta den e parti di vocals y piano; Isabella Manrique di 14 aña cu ta canta; Ethan y Ian Parejo di 14 aña specialisa den drum, percusion, violin y guitara; Cynthia Rafael di 14 aña cu ta dedica na baho; Lukas Teklenborg di 15 cu cajon y percusion; y Hugo Vroegop di 13 aña cu ta toca piano.
E 9 hoben aki segun Parejo a conta, tin un diferencia special di otro gruponan di musica ya cu nan performance ta varia, nan no ta toca solamente rock, pop of balada sino tambe nan ta haci mescla di cajon cu ukulele. Ademas tin stem di tres hoben cu ta canta y un di nan ta di opera. Na e momentonan aki el a informa cu nan ta bezig cu un mescla di concepto moderno cu opera, un proyecto di produccion personal.
Actualmente nan ta haci cover di diferente artista, pero igualmente nan tin caba nan canticanan propio pa asina nan tin nan mesun produccion den e area musical ey.
“Nan ta hopi emociona pa haci esey, pero apenas nan tin un aña cu nan ta combina nan studio cu lesnan di musica y e banda”, Parejo a informa.
Como muchanan hoben, cada un di nan tin nan responsabilidad di scol, nan tin nan aspiracion y hobbie – como training windsurf of bira un piloto di avion. Nan tin e meta di haci un produccion den tempo di un aña cu ta e aña escolar aki cu a caba di cuminsa. Den e tempo aki nan kier traha nan canticanan propio cu productornan y areglistanan, unda nan tur lo por keda contento cu loke nan ta bin haciendo sin perde nan enfoke riba nan estudio.
Parejo tambe a conta cu nan a dicidi di cambia nan nomber, pa motibo cu nan tabatin e nomber di scol unda nan a cuminsa, cu ta ‘Schakel Band’. Pero pa motibo cu algun di nan a sali for di scol y bay studia otro caminda, nan a cambia pa e nomber di ‘Yessified Chicken Nugget’, pero Parejo a splica cu no tur di nan tabata di acuerdo cu e nomber aki, y ta p’esey cu awor nan a bolbe cambia na e nomber pa “Rocking Youth Band”.
Mientras tanto, nan ta sigui training den nan canticanan nobo, unda Parejo a menciona cu nan ta organisando un actividad pa luna di september, pero cu te ainda e no tabatin mucho detaye di esey.
Como nan ta un grupo musical relativamente nobo, nan no tin rednan social como grupo musical mes, pero nan representante e Sr. Parejo a sigura cu pronto comunidad lo tende di nan pa asina sigui duna di conoce nan talento.
