Hopi mas pensionado ta acudiendo na Fundacion Pa Nos Comunidad pa ayudo

Gianaika Van Der Biezen, director di Fundacion Pa Nos Comunidad, ta splica cu ta bon pa sa cu FPNC ta bay back pa ta e ‘tweede lijn’; nan no ta ‘eerste lijn’, cual ta hopi importante pasobra nan ta esnan cu ta referi clientenan na e fundacion. Algo pa remarca ta cu e fundacion ta hayando bishita di hopi mas hende pensionado cu ta acudi na nan pa ayudo.

FPNC actualmente no por carga e capacidad pa haci e trabaonan di ‘eerste lijn’ cu ta intake huisbezoek, esey ta wordo haci riba escala chikito. Eerste Lijn na su luga e ora ta haci e ‘intake’ y referi e cliente cerca e fundacion, asina Sra. Van der Biezen ta splica. E fundacion ta wak berdad crecemento y un cambio den e famianan, ta wak cu hopi mas pensionado ta acercando FPNC, sigur esnan cu no tin un areglo completo di pensioen, of esnan cu tin un volledig pensioen pero nan gasto toch ta halto. A ripara un cambio den esaki, pues no ta ‘bijstand trekkers’ so ta acudi aworaki of famianan cu ta temporalmente den problema, “esey so tabata e unico cu mi ta wak cu ta resalta den e peticion pa pakete”, segun e directora ta sigui splica.

E fundacion tin actualmente pakete cu por parti, pero pa final di aña mester bin cu diferente campaña of pa ta creativo riba con lo por yega na fondonan pa por distribui pakete. Te cu awor e fundacion ta bendiciona cu por a haya hopi donacion y fondonan disponibel, pero tambe por a mira cu prijs di productonan ta subiendo, pues por ta den futuro e paketenan por bira mas chikito. “Tur cos ta depende di e fondonan cu lo ta disponibel pa e fundacion. Pa nos por sostene tambe e eerste lijn.”

Actualmente ta conta cu 350 famia registra cu ta hayando pakete di FPNC. E ta varia, di constelacion di un, dos, tres of cuater, of mas cu cinco persona.

E fundacion a inicia cu Participatie Projecten pa personanan cu por ta mester un diploma, por ehempel a haci recientemente un Nail Tech event unda por siña con pa haci huña, pa asina genera nan mesun entrada. FPNC ta bay haci un otro na November. Tambe uno di Pastry Skills, e idea ta pa nan para stabiel riba nan mes y no lo mester ricibi pakete mas e ora. Esaki ta un manera pa e fundacion cuminsa siña e clientenan ‘con pa pisca’ en bes di duna nan e pisca, pues den otro palabra pa nan mes por sigui na para stabiel riba nan mes cu e yudansa aki cu nan ta ricibi.