Redireccion di desperdicio na Parkietenbos a cuminsa for di ayera

Despues cu comunidad a keda informa cu for di ayera 22 di augustus, dump di Parkietenbos no lo ricibi mas taira como desperdicio, minister di Integridad, Naturalesa, Transporte y Asuntonan di Adulto Mayor, Ursell Arends a ofrece un conferencia di prensa ayera mainta dilanti Parkietenbos pa duna mas informacion riba e topico di maneho di desperdicio di un forma responsabel.

Den presencia di otro stakeholders como Bureu City Inspector, Serlimar, Ecotech y Carentra VBA, minister Arends a splica cu e plan pa cuminsa cu e redireccion di desperdicio a cuminsa for di ayera, unda no ta bay kima mas taira den aire liber.

Manera a wordo anuncia seis luna pasa, e plataforma “Trash 2 Cash” ta bin pa inicia e caminda di maneho di desperdicio di un manera responsabel basa riba e principio di un economia circular, pa asina por stop tur e desperdicio di yega na dump di Parkietenbos.

Tairanan riba dump ta causa un peliger pa medio ambiente y salud di habitantenan den bisindario. Pa trece un solucion, comerciante local ta bay procesa taira y crea grondstof adicional den forma di azeta. E azeta genera por ser bendi riba mercado local, cual ta percura cu menos fondo ta bay den exterior y lo sigui circula den economia.

“Awe 22 di augustus di 2022 ta marca e inicio pa paga e candela di dump di Parkietenbos”, minister Arends a señala.

Tambe el a bisa cu esaki ta bay duna balor na e bario di Parkietenbos y henter comunidad rond di e dump. Cu esaki tambe ta bay brinda e oportunidad pa haci un inventario di tur posibilidad cu tin na Aruba pa haci uso di diferente metodo pa procesa desperdicio cu no ta encera hiba e desperdicio na dump y kim’e.

“Mi vision ta pa cera Parkietenbos, pa redirigi diferente di e desperdicionan na esnan cu tin experticio y tambe infrastructura pa procesa esaki di un manera responsabel. Unabes cu dump no ta ricibi desperdicio mas, esey ta brinda e ora ey e oportunidad pa cap esaki y tambe pa converti e area aki den un parke solar”, el a sigura.

Ademas, Arends a comenta cu tin biaha cambionan ta bin cu resistencia, pero den esaki el a enfatisa cu mester compronde e aspectonan aki cu tin den comunidad, cu mayoria di biaha ta pa falta di informacion of miedo pa loke ta bin cu cambio y inseguridad. “E parti principal ta cu esaki ta un interes personal, como minister mi ta trece un maneho cu ta encera cambionan y mi a scoge pa usa e forsa di resistencia como e forsa pa sigui pa dilanti y pa haci lo cual ta miho pa nos pais”, el a sigura.

Igualmente a declara cu no ta un opcion mas pa laga e bario cu a wordo perhudica pa decadanan sigui wordo perhudica. “E no ta un opcion mas pa nos sigui destrui naturalesa y no ta un opcion mas pa sigui debilita nos unico pilar economico, esta turismo, y tampoco ta un opcion pa nos pone nos propio salud y bienestar como prioridad. Nos unico opcion como pais ta pa usa nos forsa y nos energia positivo pa cambia nos mes”, el a manifesta.

Representante di Serlimar, Jermaro Emerencia a expresa cu nan a coloca un borchi na dump pa asina por yuda comunidad ta miho informa tocante cu no ta acepta mas taira y cu e manera cu nan ta bay tuma e tairanan ta bay pa via di baki. Di esaki Emerencia no a duna mas detaye sino cu den proximo dianan nan lo anuncia esey via rednan social.

Eduard Jimenez, manager di operacion di Ecotech Freezone, a bisa cu nan ta cla pa ricibi e tairanan manera nan a anuncia un luna pasa, unda cu den e luna aki nan a haci preparacionnan y organisacion pa tairanan por cuminsa yega cerca nan. Tambe el a indica cu nan ta apoya iniciativa di minister Arends pa un Aruba mas sostenibel.

Comunidad tambe a wordo informa cu tin opcion pa e desperdicio di tairanan, unda e sugerencia di prijs pa tireshop ta lo siguiente: Tur compania di taira por dicidi riba nan mesun prijs, e lista ta solamente un sugerencia pa aclaria cualkier informacion cu comunidad por tin. Gobierno di Aruba a aclaria cu nan no ta impone prijs riba ningun compania.

Di otro banda, diferente compania di tireshop a publica un comunicado di prensa dia 19 di augustus ultimo, unda nan a splica cu door cu gobierno a anuncia di no acepta mas taira den dump di Parkietenbos, y cu awor nan mester hiba esakinan na Ecotech of Carentra na Barcadera, tambe e prijs pa ton pa hiba e tairanan na e compania ta bay subi 300%. E subida aki a wordo experiencia caba na september di 2021.

E documento ta indica cu na augustus di 2021 tabata 15 florin pa ton, 1 di september 2021 a subi na 60 florin pa ton y awor 22 di augustus na 190 florin pa ton.

Nan a remarca cu costo di bida ta subiendo drasticamente y nan no ta di acuerdo pa bay pone pueblo di Aruba pa paga pa e gastonan aki imponi.

Pa e motibonan aki algun tireshop no lo tuma e tairanan bieu mas di nan clientenan te ora cu Gobierno di Aruba y stakeholders recapacita riba e prijs extra aki imponi riba pueblo, manera nan a sigura. Nan lo sigui delibera cu Gobierno pa yega na un acuerdo.

Tocante esey, Gobierno a remarca cu “esaki ta un grupo solamente di tireshop. Mayoria tireshop y agencianan tur ta sostene e maneho aki, como e ta esun responsabel. Ta na e consumidor awo pa scoge responsablemente”.