(AP) — Nomber di strea di opera, Placido Domingo a aparece den un investigacion riba un organisacion estilo-secta na Argentina cu tambe tabatin oficina na Merca, y cu su lidernan a wordo acusa di crimen, incluyendo explotacion sexual.
Domingo, e cantante Spaño di opera kende a enfrenta acusacion di acoso sexual di varios muhe durante ultimo tres aña, no a wordo acusa di nada den e caso Argentino.
“Placido no a comete un crimen, ni e ta parti di e organisacion, sino cu e tabata consumidor di prostitucion”, segun un agente di cumplimento di ley cu a papia bao condicion anonimo pasobra e investigacion ta continuando. Prostitucion no ta ilegal na Argentina.
Agentenan di ley a ehecuta decenas di inval na Buenos Aires enfoca riba Scol di Yoga Buenos Aires, cu a ‘construi un culto rond di su lider’ y a reduci miembronan na ‘un situacion di sclavitud y/of explotacion sexual’, segun documentonan di fiscal den e caso Argentino contra e scol.
E organisacion a set up un structura di negoshi incluyendo oficina na Argentina y Merca, incluyendo sucursal na tres ciudad Mericano: Las Vegas, Chicago y New York.
Te awo, a detene 19 persona na Argentina, mientras ta kere cu ainda ta buscando al menos tres sospechoso na Merca.
Domingo no a papia publicamente tocante e desaroyonan mas recien y su representantenan no a responde na solicitud pa comentario.
Wiretap cu tabata parti di e investigacion hudicial a graba combersacionnan den cual un homber cu autoridadnan ta identifica como Domingo, a papia cu un miembro di e grupo identifica como Susana Mendelievich, tocante reuni cu e strea di opera mientras e tabata na Buenos Aires pa un serie di concierto na april.
E investigacion riba e secta a implica hende cu conexion na e mundo di musica clasico y kende a toca cu Domingo den pasado, incluyendo Mendelievich, un pianista Argentino.
Ta acusa Mendelievich di ta e persona a cargo di e actividadnan di explotacion sexual di e organisacion, segun un hues oficial, kende tambe a papia den condicion anonimo.
Den un grabacion, e homber identifica como Domingo ta papia cu Mendelievich tocante con e por bay na su camber di hotel sin cu su personal ta detect’e.
Despues Mendelievich ta papia cu Juan Percowicz, 84, kende ta e supuesto lider di e grupo. “Ya el a yama mi y a set up e deal pa mi keda na su hotel awe nochi sin cu su agentenan ripara”, el a bisa.
Traficacion y explotacion sexual tabata e fuentenan principal di entrada pa e grupo, cu tabatin un entrada calcula na $500mil pa luna, segun e oficial hudicial.
E Scol di Yoga Buenos Aires tabatin cantidad di grupo di muhe kendenan tabata forsa pa mantene encuentronan sexual a cambio di placa, segun fiscal. Al menos siete muhe a wordo incorpora den e grupo tempo cu nan tabata mucha of adolescente y a explota nan sexualmente, segun documentonan di fiscalia.
Hende a yega for di Merca na Argentina pa haci sex cu e muhenan, y investigadornan ta bisa cu tambe a transporta muhenan na Uruguay y Merca pa encuentronan sexual. “E encuentronan ta supone e practica di sclavitud sexual pasobra a pone e ‘studiantenan’ na disposicion di e clientenan pa un tempo largo”, segun e documentonan.
Ademas di supuesto explotacion sexual, e grupo tambe tabata bende tratamento, incluyendo loke tabata conoci como ‘cura di soño’, cu tabata involucra duna hende remedi cu lo laga nan drumi varios dia cada biaha.
Riba orden di hues Ariel Lijo, Percoqics y otro miembronan di e grupo a keda aresta y decenas di nan propiedad y vehiculo a wordo tuma den beslag.
