(AP) — Ex-presidente di Brazil, Luiz Inacio Lula da Silva, kende ta postula pa bolbe na e encargo, a bisa ayera cu su rival, incumbente Jair Bolsonaro ta canando e caminda baho contra dje y su famia durante campaña.
Papiando na su prome conferencia di prensa pa periodistanan stranhero desde comienso di e pandemia, e lider iskierdista a acusa sostenedornan di Bolsonaro di plama mentira tocante su persona y tambe su esposa nobo, Rosangela da Silva.
Algun sostenedor di Bolsonaro a usa rednan social pa alega cu Da Silva ta bay cera iglesianan Evangelico si e gana eleccion na october. Da Silva a insisti cu e ta na fabor di libertad di religion, y a demostra esaki durante su ocho aña como presidente entre 2003 y 2010. Su partido Labor a tuma accion den corte contra un legislador pastoor cu a difundi e acusacion.
Siguidornan di Bolsonaro tambe a acusa esposa di Da Silva di ta un siguidor un un religion Afro-Brazileño den un aparente intento pa daña e sosten di e ex-presidente entre evangeliconan.
Rosangela da Silva a contesta riba Twitter dia 9 di augustus ultimo, bisando cu e y su esposo semper ta bay respeta fe di hende sin importa cual esaki ta, y Da Silva a echo e opinion aki dialuna.
Contestando tocante reportahenan den medionan di comunicacion cu Bolsonaro tabata interesa di cuestiona fe di su esposa den avisonan riba television, Da Silva a contesta: “Mi nunca a involucra esposa di ningun presidente den un campaña politico. Mi nunca a inclui ningun problema personal di ningun candidato den nan bida politico. Ora bo cuminsa involucra e esposanan (di candidatonan) den campaña, ta pasobra bo no tin nada otro pa papia”, segun Da Silva, kende siman pasa a sugeri na su apertura di campaña cu Bolsonaro tabata “posei pa diabel”.
E ex-presidente di 76 aña di edad tambe a acusa Bolsonaro di ta “e unico (candidato) cu a … usa fake news y cu a reta institucionnan Brazileño” door di sugeri cu e por no acepta resultado di e eleccion.
