Cu meta di ofrece mas conocemento na su miembronan y cu e meta di guia nan den nan formacion, miembronan di e sindicato a haya dos dia di congreso. Alonso Tromp, presidente di Sindicato di Trahadornan Organisa di Sector Publico di Aruba (TOPA) a expresa cu esey tabata un di e promesanan cu nan a menciona durante eleccion, formacion di miembronan cu experticio.
Tromp a bisa cu den e congreso aki a bin dilanti informacion di expertonan cu conocemento di leynan como por ehemplo LMA, cu ta hopi importante. Igualmente nan a pone enfasis riba loke ta nan statuutnan y reglamento.
Despues di eleccion unda Tromp a wordo eligi como presidente di e directiva nobo, el a sigura cu e sindicato ta pasando den un epoca di renobacion, manteniendo nan mes den e statuutnan cu nan tin.
Pa loke ta trata e retonan mas importante como un directiva nobo, Tromp a sigura cu nan tin contacto cu tur organo cu ta importante pa nan organisacion. “Si tin algo cu ta importante cu nos miembronan ta bay tin beneficio di dje, nos ta bay di acuerdo cune”, el a bisa.
Aworaki nan ta preparando actividad pa nan miembronan manera Tromp a sigura. Tambe el a señala cu door cu ta un presidente nobo, el a bin ta gana e confiansa di e miembronan di e directiva, esey ta bayendo “super bon”.
“Bo mag di puntra otro miembronan y bo ta wak con e diferencia ta entre maneho. Nos a scucha y wak kico nos por coregi y nos tin varios reto cu ta trahando riba dje. Tambe nos ta reorganisando”, Tromp a declara.
Di mesun manera, el a bisa cu tin diferente deadlines cu nan a pone pa e directornan den cual den proximo lunanan e deadline ta yega cu lo mester keda cla cu nan.
Despues di e congreso aki, segun Tromp a bisa e siguiente paso ta cu nan ta bay sigui traha pa nan miembronan. Proximo luna nan ta bay tin un otro congreso cu expertonan den reglanan internacional. “E punto ta sinta cu si nos por logra yega asina leu, cu despues di tempo nos miembronan mes ta take over y sigui cu e organisacion. Anos ta birando mas grandi, y basa riba esey nos ta trahando, no solamente riba nivel local pero tambe riba nivel internacional.”
Celia Thiel, e persona encarga di duna informacion na miembronan di sindicato den e congreso aki, a expresa cu e directiva a pidie pa splica kico ta e profiel di un sindicalista den directiva. Aki el a bay den tur ley y reglanan cu nan mester sa cu ta cay den diferente maatregelen.
Igualmente el a splica di varios caso den corte cu a bin cu funcionarionan publico y kico ta e problema cu funcionarionan publico tabatin, pakico nan a haya cierto medidanan disciplinario. Un punto riba cual el a pone hopi atencion ta e negociacion cu sindicatonan mester haci, y pa esaki e miembronan mester sa bon kico ta e situacion cu nan ta biba aden, pa nan tin opcion ora cu nan a acerca nan doño di trabao – cu den caso aki ta gobierno – pa nan haya sa kico nan kier y con pa negocia.
Igualmente, el a trece dilanti cu e ta haci tambe diferencia entre kico ta un sindicalista y kico ta un activista. Un sindicalista mester atende interes di su miembronan, ya cu ta un sindicalista di sector publico y cu ora e ta bin dilanti como un negociador e mester bin cu opcion.
“E parti cu mi ta kere cu mester tin hopi cambio den dje ta cu sindicato mester bay back na su core business”. Segun e mes a indica, el a sinti cu esaki awo a bay perdi, pa motibo cu e ta bisa cu ora un miembro ta bin dilanti e mester ta duidelijk pakico ta bin dilanti y mester bin cu opcion. Den caso aki, den direccion cu nan ta bayendo awor, el a splica cu esey ta bay afecta e funcionario publico hopi, unda cu nan a tende di Landspakket, pero nan no sa e contenido.
“Bo ta bisa mi cu bo tin cu baha gasto di sector publico 10 porciento, pero nan kier sa kico esey ta bay tin como consecuencia pa e ambtenaar. Esey ta tur e preguntanan cu bestuurnan tambe mester bay haci y nan mester ta proactivo, pasobra e meta ta cu loke bo tin como beneficio bo no por perde, y si bo ta bay perde beneficio, bo mester sa pakico bo ta bay perd’e”, Thiel a comenta.
Den esaki, el a sigui bisa cu tin cu sigui negocia cu e doño di trabao y cu nan ta compronde otro, ta duidelijk cu pa e doño di trabao e interes di e ambtenaar ta importante.
Na luna di mei, TOPA a haci su eleccion di un directiva nobo despues di 16 aña, dia 8 di juni e directiva aki oficialmente a wordo instala y e traspaso a tuma luga di e vice-presidente saliente Vilma Theijsen pa e presidente nobo di sindicato TOPA, Alonso Tromp manera statuto ta prescribi.
