Futbol ta un di e deportenan mas popular rond mundo y na Aruba. Hopi hobennan tin e soño di hunga ariba nivel profesional pa ekiponan grandi. Recientemente na Aruba a tuma luga un clinica di futbol di Fundacion Real Madrid na unda un grupo di hobennan deportista di futbol a haya e oportunidad pa a ricibi diferente tecnica conforme e filosofia di disciplina y estilo di hunga di e ekipo di futbol Real Madrid.

Un di e participantenan, Fabio Alexander Montilla, un hoben futbolista di 11 aña di edad cu tin e soño di bira un hungado profesional a conta Bon Dia Aruba di su experiencia durante e clinica, kico el a siña y kico ta su soño. Cu su dos aña el a haya su prome bala di futbol y ya cu tres aña e tabata forma parti di un ekipo di futbol na Aruba.

E ta conta cu su experiencia durante e clinica di Fundacion Real Madrid tabata hopi bon y el a siña diferente cosnan nobo. “El a bay hopi bon, mi a pasa hopi dushi, mi ta kere otro aña mi lo bay atrobe si por”, el a bisa. “Mi tabata sa un par di cos pero mi a siña mas cos cu ta haci e cosnan mas facil y mi ta sinti cu nos hunga mescos cu prome team di Real Madrid”.

Alexander a conta tambe cu su parti faborito di e clinica tabata cu e coachnan tabata hopi lief, cu el a echt pasa hopi dushi y tambe cu el a siña cosnan nobo, tecnicanan nobo cu a yud’e mehora su manera di hunga futbol.

Alexander ta hunga cu un ekipo local conoci y su posicion di hunga ta defensa, aunke e por hunga tambe medio campo un tiki patras, medio campo defensivo, pero su posicion normal ta defensa y e no ta duda di defende e gol di su ekipo te na final.

Su team faborito ta Barcelona y su hungado faborito ta Lionel Messi. Reportero di Bon Dia a puntr’e con el lo haci si den futuro e mester hunga pa Real Madrid, pero su team faborito ta Barcelona. Alexander a hari y contesta: “Mi ta hunga pa Real Madrid, mi gusta nan hopi tambe, pero di chikito mi tata tabata mustra mi Barcelona prome cu Real Madrid. Bira hungado profesional ta mi soño y mi ta trahando pa mi yega eynan”.

Claudia Meriño, mama di Alexander, a splica Bon Dia Aruba, Alexander a ricibi invitacion e aña aki pa participa den e clinica ya cu aña pasa el a participa tambe, pero nan a paga pa su cupo. “E aña aki un meneer a comunica cu mi y a puntra si mi tabata interesa pa un cupo gratis pa un luga den e clinica di fundacion di Real Madrid e aña aki. Mi a bis’e cu si cu mi yiu tabata hopi interesa”.

Durante e clinica tabatin diferente categoria y den cada categoria tabatin alrededor di 12 mucha cu a participa. Na final di e clinica di tur e muchanan cu a participa un hungado cu a sobresali a wordo selecciona pa biaha bay Madrid gratis pa asina participa den un torneo na Madrid. Pero apart di esey 10 otro mucha lo ricibi un invitacion tambe pa bay Madrid.

“Nos ta wardando fin di luna pa wak si e ta ricibi invitacion. Dia di ultimo training nan ta haci e clausura di e clinica, nan ta entrega e premionan, e certificadonan, e bala nan, nan ta selecciona un di cada categoria cu ta bay Madrid gratis y pa esunnan cu nan ta invita nan ta manda un e-mail despues di un pa dos siman. Nan ta manda e lista di e invitadonan cu ta alrededor di 10 mucha”, Meriño a splica.

Di su banda Alexander ta conta cu e ta wardando ansiosamente y ta spera cu e por ta un di e invitadonan pa bay hunga futbol na Madrid, un otro soño cu lo por bira realidad. “Si nan invita mi pa bay Spaña mi lo bay”, el a expresa.