Dump: e volcan y e storia di desaroyo di Aruba; Sabotahe of djis realidad di falta di maneho?

E ta un sabotahe. Esey ta opinion di Minister Ursell Arends riba e candela grandi cu tabatin atrobe riba dump. Pero pa trahadonan di Serlimar, e grito di sabotahe ta otro ilustracion cu no tin atencion pa e problema real.

Bon Dia Aruba a bishita dump na Parkietenbos ayera y a combersa cu trahadonan cu ta haciendo nan esfuerso pa mantene e ritmo di trabao y consciente di nan responsabilidad pa crea menos molester pa comunidad. E motibo ta simpel. Pasobra “ta nos ta haya zundra di hendenan den bario ora tin candela.” Y mas ainda, ta nan ta exponi na e huma toxico mescos cu esnan cu ta biba den cercania. “Nos no tin mascara, ningun otro tipo di proteccion. No ta na nos interes pa e dump ta na candela. No tin ningun protocol di proteccion pa salud pa e bario ni pa nos.”

Como tal, e splicacion di Minister cu ta sabotahe ta crea e candela no ta zona logico pa e grupo di trahadonan cu ta mira cu dump a yega su capacidad maximo, mas cu 20 aña pasa. Mas cu cualkier otro, ta nan ta esnan cu ta mira e resultado di falta di maneho di decadanan cu a conduci na un monster cu no tin forma di domina.

Falta di educacion

Dump ta ilustra e problema grandi di Aruba. Falta di maneho, falta di vision, falta di consistencia, falta di mantencion y falta di educacion. “Comunidad no ta haya educacion riba su responsabilidad y mas ainda, comunidad no sa kico tur ta haci riba dump, a pesar di poco recurso.” Durante e caminata, Bon Dia Aruba a tende di e iniciativa di e trahadonan pa colecta azeta di cushina, algo cu a bay bon, te cu a bende dos container di azeta. Tambe ta separa hero ‘limpi’ cu ta liber di resto di otro material di construccion y ta bende cu Daltra.

E otro hero cu no ta limpi ta bay pa Daltra tambe, aunke esaki ta por nada, ya cu e ta rekeri procesamento. Tambe tin un bari pa colecta bateria chikito, pero Serlimar no ta informa comunidad riba e posibilidad aki y no tin ningun campaña efectivo pa educa comunidad riba separacion di sushi.

Inversion perdi

Riba dje, Serlimar tin un sistema di separacion di sushi. Para keto desde cu Benny Sevinger tabata Minister encarga, e ekipo di Baoldin & Lawson tin tur locual un facilidad di desperdicio mester na e basico, cu ta un asina yama ‘shredder y conveyers’ y magnet pa saca e metal. Lamentablemente e inversion miyonario aki ta para pa su cuenta. “E ekipo t’ey, pero e ta manera un auto cu mester di su tairanan, y ahusta e stuur. Pues e ta rekeri inversion pa pon’e traha.”

Taira

Pero placa ta locual Serlimar no tin. Y riba dje, Serlimar lo perde entrada entrante Dialuna awor. “Entrante Dialuna, nos no ta bay acepta ningun taira. Te cu awor, dump ta tuma como 50 ton, cu ta 50 mil kilo di taira pa luna. Awor, e prome fase di Trash2Cash ta drenta na vigor y ta Ecotec y Carentra ta bay tuma e tairanan.”

Serlimar tabata cobra 60 florin pa ton di taira y awor e companianan lo cobra 180 florin pa ton. E miedo cu tin ta cu hopi hende, particularmente otro siman, simplemente lo benta e tairanan pafo di dump, of ta benta nan den mondi. “Kico ta pasa ora hende ta bay cumpra taira nobo? E negoshi ta bay keda cu e taira bieu of ta manda e doño di e auto cu e taira kibra cas? Ken ta sigura cu e persona ta deshaci di e taira na bon forma y no ta resulta den mondi of acumula tras di cas despues?” En todo caso ta conseha Gobierno pa stop e importacion di taira di segunda mano. “Aruba a bira e dump pa taira usa.”

Y ta e acumulacion aki ta un peliger pa medio ambiente, no solamente pa bista mahos, pero tambe pa candela. Pasobra esnan cu ta traha riba dump sa. Unabes bin acumulacion di taira of cualkier otro desperdicio, e peliger pa candela ta grandi.

Candela

Tin hende ta cende candela intencionalmente? “E por, pasobra e tereno di dump ta asina grandi. Tin bista unicamente riba e entrada principal y durante oranan di atardi y anochi, no tin trahado di Serlimar riba dump. Y mayoria candela berdad ta cuminza den oranan di atardi,” a informa Bon Dia Aruba. “Pero hecho ta keda cu dump ta continuamente na candela. Bao di e seronan aki tin candelanan cu no ta paga. Nos sa cu asina trece sushi nobo, sea ta taira of otro, ta cuestion di algun dia pa nan pega na candela. No mester di ningun hende pa cende esaki.”

Motibo ta henter e composicion biologico y kimico di e seronan di sushi combina cu solo, aire y stof di awa. Unabes tur e elementonan bini hunto, e candelanan ta cuminza. “Hopi biaha ora cu dia ta bira mas fresco cu e candela ta cuminza. Dificil pa splica, pero mescos ta pasa cu hende cu ta keda henter dia den solo y ta apenas atardi of anochi ora di baña ta sinti e kima.”

Riba dje, e falta di ekipo ta contribui na e condicionnan ideal pa candela. “Nos no tin un compactor. Antes tabatin, pero nunca a reemplaz’e ora cu el a daña.” Un compactor ta un ekipo pisa cu ta diseña pa landfills, unda ta placha tur sushi y elimina cualkier espacio pa evita cu gas por acumula. Serlimar no tin un compactor, tampoco un tractor. “DOW si tin.” Locual tabatin ta un ‘excavator’ cu por trece e bida di e chauffeur na peliger si kier usa esaki pa e funcion aki. E ultimo biaha cu a usa e ‘excavator’ e mashin a bolter y pa por a sali, mester a yuda kibra e glas di e cabina pa e chauffeur por a sali. “Pero ta e ‘excavator’ aki a expone e volcan riba cual nos ta traha. Nos a yega di djis coba un tiki y topa cu material na candela.”

Pa e trahadonan di dump, e speranza ta cu berdad Trash2Cash lo por yuda Aruba. Pero cu un Serlimar cu no ta parti di e ‘wastestreams’ cu mester produci placa, en todo caso, ta parce cu despues di 2022, locual ta keda cune ta un volcan bibo, sin mucho perspectiva pa nan.