Ayera den oranan di atardi, 17 organisacion a uni pa asina duna un conferencia di prensa y informa comunidad tocante e reforma fiscal, unda nan a pidi gobierno pa extende su implementacion un tempo mas.
Fernando Dirksen di Aruba Food & Beverage Association (AFBA) a señala cu nan a manda un carta pa Gobierno di Aruba tocante e tema di reforma fiscal y e organisacionnan cu a manda e carta aki ta Aruba Financial Center Association, Aruba Food & Beverage Association, Aruba Hotel and Tourism Association, Aruba Timeshare Association, Aruba Jewelers Association, Comerciantenan Uni, Camara di Comercio di Aruba, Sindicato di Empleadonan Publico y Priva di Aruba (SEPPA), Sindicatonan di Maestro di Aruba (SIMAR), Sindicato di Polis di Aruba (SPA), San Nicolas Bussines Association, entre otro, cu a uni pa mustra nan preocupacion tocante implementacion di reforma fiscal y consecuencianan cu esaki por trece cune.
Dirksen a indica cu den e carta ta expresa cu awor cu Gobierno di Aruba a dicidi implementa un reforma fiscal incluyendo Value-added tax (VAT) y BTW system, cu lo a wordo introduci 1 di januari di 2023, e consecuencia di e implementacion di reforma fiscal aki por tin consecuencianan drastico administrativo riba comercio, empleadonan y tambe riba dunadonan di trabao.
Igualmente, el a declara cu te dia di ayera Gobierno di Aruba no a duna suficiente informacion y e oportunidad pa tur esnan den comercio y stakeholders haci un estudio di loke ta bay introduci. “Nos opinion ta pa haya sa mas di esaki pa wordo considera prome cu e wordo introduci”, Dirksen a expresa.
E draft di e legislacion no ta oficial ainda. Esaki ta pone cu nan ta pensa cu no ta realistico pa introduci e cambio dia 1 di januari di 2023, unda cu mester di mas tempo pa stakeholders por prepara y sa kico pa haci pa ora esaki bin.
Ademas el a bisa cu stakeholders ta di opinion cu e reforma fiscal aki mester simplifica e impuesto. E sistema combina cu e aumento di impuesto y tambe e cortamento di gastonan di gobierno. Cu esaki nan ta declara pa no implementa ningun tipo di reforma fiscal ni tampoco pa hisa ningun tipo di impuesto te ora nan por haya suficiente tempo y informacion pa por analisa y duna un feedback den esaki.
E firmantenan di e carta ta bisa cu nan ta instalando un comision di tres experto, cu ken nan ta bay analisa e reforma fiscal cu ta na caminda y nan ta bay determina financiera- y economicamente y tambe e consecuencianan social cu por tin door di un reforma di e tipo aki.
Nan tambe ta bay presenta sugerencia y consehonan realistico di e reforma fiscal, segun Dirksen a expresa, pa wak kico ta Aruba su bienestar den un periodo largo of corto, unda cu tur e firmantenan a aproba y a firma esaki dia 15 di augustus ultimo.
Di loke ta trata e consecuencianan cu e implementacion di e reforma fiscal por trece, el a splica cu loke nan ta pidiendo den un periodo corto of largo ta mas tempo prome cu implementacion, pa asina haya mas informacion y nan por traha mas tempo riba dje.
“Si e keda implementa dia 1 di januari 2023 no tin suficiente tempo pa comercio, esnan cu tin negoshi y dunadonan di trabao pa wak kico ta bay bin”, el a sigura.
Di su parti, Monica Kock, presidente di Camara di Comercio di Aruba (KvK) a menciona cu esaki tabata un iniciativa di un luna pasa caba di AFBA, na unda nan a yama un grupo hunto cu a sigui crece te 17 organisacion cu a firma e declaracion aki. “Locual ta hopi bunita y special di e declaracion aki ta cu nos tin organisacionnan cu nos ta yama ‘gremio’, cu ta pa empleadonan y nos tin sindicatonan. Nos tin tur banda cu a sinta hunto concerni e reforma fiscal cu a wordo presenta te awor.”
Recientemente, Gobierno di Aruba a dicidi di no implementa e BTW e dia 1 di januari, pero nan a informa tambe cu nan lo bin cu un sorto di medida pa por recauda e suma cu nan ta desea cu mester bin aden. “Esey kiermen cu algo ta bay bin” Kock a sigura. Tambe a señala cu a sugeri pa aumenta e impuesto BBO di 1 pa 1.5%, pero den e parti aki, Kock a expresa cu Gobierno a informa nan cu no a tuma un decision ainda.
“Nos tur akinan presente ta bisa cu prome cu bo ta bin cu un decision bo ta trece cune cu bo tin cu increase e tax pa comercio, pueblo y empleado, a nos como grupo hunto kier wak kico bo plan ta pasobra e plan a cambia atrobe di un dia pa otro dia y a nos ta haya cu e plan mester ta wordo bon defini y nos mester recibi’e unda a nos por analisa”, Kock a bisa.
E comision cu nan ta bay instala ta hopi importante pa motibo cu Kock a sigura cu nan a dicidi conhuntamente pa apunta hende pa haci esaki, wak e proposicionnan cu gobierno ta papia di dje pa nan por informa gobierno riba e consecuencianan cu tin. Pero tambe ta importante pa e comision por bin talbes cu otro alternativa di e solucion cu tin menos impacto riba economia di Aruba y menos impacto riba e inflacion cu tin, esey ta nan intencion segun Kock a señala.
Francis Saladin di Comerciantenan Uni a indica cu na aña 2018 nan a bisa pa no hinca e BBO den e prijs, cu despues Gobierno a opta pa hacie cu tur su consecuencianan, y awe por mira cu mester haci cambio for di e tempo ey caba cu a papia di reforma fiscal, pa traha riba dje den su totalidad pa por implement’e corectamente y traha un structura cu ta bon pa comercio, Gobierno y pueblo.
“Atrobe Gobierno a pasa nos un fast ball unda nan ta papia cu prome, ora nan a bin cu idea di BTW, nan a papia di 6% pa cuminda pa alivia y yuda pueblo. Awor bo ta bira bay papia di 1.5% mas riba BBO, cu ta 17.5%. Esaki lo haci cu comercio lo subi cu 8.01% pa bo por cumpli cu e BBO debidamente, di 6% pa 16% ta na unda nos kier bay? Di un banda bo ta bisa bo tin e hende central y di otro banda bo ta tuma decisionnan abrupto y core yama nos di bo decision”, Saladin a menciona.
Tambe el a enfatisa cu na ningun momento nan como gremio a bisa cu nan ta contra BTW, ni cu Gobierno mester reduci salario di empleadonan publico. Loke nan a bisa ta cu mester baha gasto di aparato gubernamental; tampoco nan kier pa peso di impuesto subi riba nan ni na pueblo mas, el a finalisa.
