Loke a cumbini cu Hulanda, ta muestra cu ta un gobierno nacional so por resolve e problemanan agudo di nos pais!. Ultimo mo tempo, mi no kier scucha ni e conferencianan di prensa di e gobierno actual, mirando cu constantemente bo ta scucha sea un yoradera di con dificil nan a haya e pais aki. Of cu ta bolbe draai un decision of ta bin bisa cu no por cumpli cu e palabracionnan haci cu Hulanda.

E actuacion pober di e gabinete Wever-Arends aki, cada bes ta debilita nos pais Aruba mas y mas pa cu Hulanda. Mientras cu ta desde 2018, esta 22 november, prome cu PANDEMIA y prome cu GUERA NA UCRAINA, prome minister di Aruba, lider di e coalicion POREDmep, a combini cu Hulanda ya caba cierto paketenan di reforma y maneho nobo. Pero enbes di a realisa un gobernacion pro interes di pueblo, a hiba un maneho pro friends and family, y tambe uno di nepotismo completo na unda sin mas interes partidista y interes pa keda sinta den e stoel mas largo cu ta posibel tabata (y ta) e meta.

Ora mi a scucha atrobe, unda cu prome minister y su vice prome minister mester bin cu un conferencia di prensa den forma urgente, y pa bisa cu BTW no ta bin mas, manera combini den Landenpakket, pero cu lo bay aumenta BBO, e debilidad di e gobierno aki ta keda demostra.

Segun e mandatarionan, cu nan ta yega na tal decision, despues di a scucha pueblo y tambe algun representantenan di gremio comercial, y por lo pronto ta deshaci di e idea pa bin cu e BTW.

Esaki ta wordo haci, apenas na un siman di e reunion di Conseho di Minister di Reino. Y segun minister presidente, e topico di BTW mes lo no bay wordo trata diabierna otro siman dia 26. Pero no pasobra cu BTW no ta riba agenda di Conseho di Minister di Reino, no nifica cu e decision aki di parti di gobierno di Aruba lo no tin influencia riba e decision si ta haya aanwijzing of no! Esaki ta mas hustificacion pa e Hulandesnan cu Aruba no ta cumpliendo cu su palabracionnan. E decision aki tambe ta contra e mensahe di prome minister algun dia pasa, cu e deliberacionnan cu Hulanda ta riba e bon caminda, y cu di banda di Aruba ta haci tur lo posibel pa evita un “aanwijzing”.

Cu e actuacion pober di prome minister y su vice premier durante e conferencia di prensa, parce cu prome minister a trata na evita un kiebro den e coalicion actual di MEPraiz. Lo tabata mas na su lugar cu prome minister awe lo por a entrega su gobierno, y no pa bin un eleccion manera partido grandi di oposicion ta desea, sino pa anuncia apertura pa un GABINETE NACIONAL manera semper UPP a propaga, basa riba tareanan fiho y expertonan.

Ora prome minister ta papia cu nan a papia cu representantenan di gremionan y personahenan den nos comunidad cu a desconseha nan pa bin cu un BTW awo, e ta mustra di berdad cu e gobierno aki a bin ta opera manera un jojo. Un gobierno flip flop. Mescos cu den e caso di topico di “belasting riba tips”. Ta acorda esaki den Landenpakket, pero despues ta bisa cu e no ta bin mas. Mescos cu e prijs di awa y coriente. Ta bin un decision cu ta hisa prijs, despues ta bolbe para e introduccion, despues ta anuncie atrobe y despues ta bisa cu lo bolbe bahe despues di un luna.

Loke Aruba mester ta un Gabinete Nacional, y cu pa medio di un Dialogo Nacional ta yega na un Compromiso Nacional. Pa asina tur nos nanishinan ta mustra den mes direccion. E Gabinete Nacional aki mester ta consisti di no-politiconan y expertonan cu por tuma decision clave. Pueblo, no mester laga nan wordo gaña cu promesanan di particularmente ni geel ni berde. Pasobra cua gobierno cu sinta despues di un eleccion nobo, e “picture” financiero y e “picture di tur otro problemanan” ta keda mescos. Loke mester tin ta determinacion, cu un gabinete politico lo no kier bira impopular cu ne.

Y, manera mi a yega di bisa, un eleccion na e momentonan aki lo no ta e caminda pa solucion, mirando e tantisimo problemanan cu tin. E ministernan politico, mirando e cantidad di voto cu nan tin, mester bay Parlamento y asina ey Parlamento completo para tras di un gabinete nacional y un programa di salbacion nacional. No tin tempo mas pa perde, y djis pidi hende bin cu solucion pa bo, mientras cu bo ta keda sinta den e stoelnan di cocolishi, no ta un opcion.