(NLTimes) – Oficialnan Hulandes a extradita un homber Ruso sospecha di labamento di cryptomoneda na Merca, segun Departamento di Husticia Mericano a bisa den un declaracion.
Denis Mihaqlovic Dubnikov, di 29 aña di edad, ta acusa hunto cu otro personanan di labamento di placa obteni como resultado di atakenan di secuestro cibernetico na Merca y otro paisnan. El a keda aresta na Amsterdam dia 2 di november, segun fuente di noticia ANP.
Departamento di Husticia a bisa cu e homber Ruso a yega Merca anteriormente e siman aki, y a enfrenta un audiencia inicial den corte federal na Portland, Oregon, riba diaranson.
“Specificamente, Dubnikov y su complicenan a laba pagonan di secuestro extrai for di victimanan di atakenan di Ryuk, secuestro cibernetico (“ransomware),” Departamento di Husticia a bisa. Ryuk ta codifica documentonan den un computer of red na momento cu e ta wordo ehecuta, incluyendo esnan riba drivenan remoto, y por elimina e almacenahe di backup di sistema. El a wordo usa frecuentemente pa ataca hospital y proveedornan di cuido di salud na Merca pa ultimo añanan.
E acusacion ta declara cu Dubnikov a laba mas di 400mil dollar den placa obteni door di atakenan Ryuk na juli 2019. E grupo completo a laba un minimo di 70 miyon dollar di secuestro, segun gobierno Mericano ta alega. “Despues di ricibi pagonan di secuestro, actornan di Ryuk, Dubnikov y su co-conspiradornan y otronan involucra den e schema, supuestamente a ehecuta varios transaccion financiero, incluyendo transaccionnan financiero internacional, pa sconde e naturalesa, fuente, ubicacion, doño y control di e ganashi di secuestro.”
Ta spera cu e huicio contra Dubnikov ta bay dura cinco dia, cuminsando dia 4 di october proximo. Si e keda condena, e ta enfrentando hasta 20 aña den prison federal.
