(TheGuardian) – Miyones di persona cu a sufri di Covid-19 ainda ta enfrenta un riesgo eleva di condicionnan neurologico y psikiatrico, incluyendo ‘brain fog’, demencia y psicosis, dos aña despues di nan malesa, compara cu esnan cu tabatin otro infeccion respiratorio, segun e estudio di mas grandi di su tipo.

Nan tambe ta enfrenta mayor riesgo di sufri di ansiedad of depresion, e investigacion ta sugeri, pero esaki ta reduci dentro di dos luna despues di a haya Covid-19. Despues di dos aña, e riesgo no ta mas halto cu despues di otro infeccionnan respiratorio. E hallazgonan ta publica den e journal Lancet Psychiatry.

Casi 600 miyon caso di Covid-19 a keda registra mundialmente desde comienso di e pandemia, y tabatin cada bes mas evidencia cu hende cu ta sobrevivi e malesa ta enfrenta riesgo mas halto di condicionnan neurologico y psikiatrico.

Estudionan anterior a haya cu hende ta enfrenta riesgo mas halto pa varios condicion di neurologico y di salud mental den e prome seis luna despues di infeccion. Te awo, sinembargo, no tabatin data a gran escala examinando e riesgonan durante un periodo di tempo mas largo. E estudio nobo, di Universidad di Oxford y e Centro di Investigacion di Salud Biomedico di e Instituto Nacional di Investiacion pa Salud y Cuido, a analisa 1.28 miyon caso di Covid-19 durante dos aña.

Dr. Max Taquet, kende a dirigi e analisis na e Universidad di Oxford, a bisa cu e hallazgonan ta briya un luz nobo riba e consecuencianan a largo plaso riba salud mental y di cerebro pa hende despues di un infeccion di Covid-19. “E resultadonan tin implicacionnan pa pashent y servicionan di salud, y ta destaca e necesidad pa mas investigacion pa compronde pakico esaki ta sucede despues di Covid-19, y kico por haci pa preveni cu e condicionnan aki ta sucede, of trata nan ora nan aparece.”

E estudio a analisa data riba 14 diagnostico neurologico y psikiatrico di registronan di salud electronico mas tanto for di Merca. A haya cu den adulto, e riesgo di depresion of ansiedad a aumenta despues di Covid, pero a bolbe na igual cu otro infeccion respiratorio despues di alrededor di dos luna.

Sinembargo, e riesgo pa otro condicion mental of neurologico a keda mas halto despues di Covid compara cu otro infeccionnan respiratorio na e followup despues di dos aña.

Adultonan menor di 64 aña cu a haya Covid tabatin un riesgo mas halto di brain fog (640 caso entre 10mil persona) compara cu esnan cu tabatin otro infeccion respiratorio (550 caso entre 10mil persona). Den esnan 65+ cu a haya Covid, tabatin un ocurencia mas halto di brain fog (1,540 caso entre 10mil persona), demencia (450 caso entre 10mil persona) y desorden psicotico (85 caso entre 10mil persona) compara cu esnan cu anteriormente tabatin un infeccion respiratorio diferente (1230 caso entre 10mil persona pa brain fog, 330 caso entre 10mil persona pa demencia, y 60 caso entre 10mil persona pa desorden psicotico).

Resultadonan den mucha a mustra similaridad y diferencia cu adulto. E probabilidad di mayoria di diagnostico despues di Covid-19 tabata mas abao cu den adulto y nan no tabatin mayor riesgo pa ansiedad of depresion cu muchanan cu tabatin otro infeccion respiratorio. Sinembargo, igual cu adulto, mucha recuperando di Covid-19 tabatin mayor probabilidad di keda diagnostica cu algun condicion, manera ataca (seizure) y desorden psicotico.

A mira mas desorden neurologico y psikiatrico durante e ola di variante Delta compara cu e ola Alpha anterior. E ola Omicron tabata vincula na riesgonan psikiatrico y neurologico similar na Delta.

E investigadornan a adverti cu tin limitacion importante pa considera. E estudio por subrepresenta auto-diagnostico y casonan asintomatico di Covid, ya cu probablemente esakinan no ta registra. Tampoco a evalua e severidad y duracion di condicionnan despues di Covid, y con nan ta compara cu otro infeccion respiratorio.