(AP) – Companianan di rednan social ta ofreciendo algun detaye mientras cu nan ta comparti nan plan pa salbaguardia e eleccionnan Mericano.

Plataformanan manera Facebook y Twitter generalmente ta manteniendo nan mes riba e mesun curso di aña 220, cual a ser marca pa conspiracionnan y a culmina cu e incidente di dia 6 di januari na U.S Capitol.

Aplicacion TikTok, cual a genera popularidad inmenso desde e ultimo ciclo di eleccion mientras cu nan tambe ta ser considera un luga unda cu tin mal informacion cu ta plama a anuncia diaranson cu nan lo lansa un centro di eleccion cu lo yuda hendenan haya e localidadnan pa vota ademas di informacion tocante cada candidato.

E centro lo aparee den varios diferente video tocante eleccionnan Mericano y riba e pantayadi e usuarionan cu haci buskedanan relaciona cu esaki. TikTok lo traha tambe cu partnernan manera gruponan cu ta boga pa provee informacion tocante votacion specialisa pa studiantennan, personanan cu ta sordo, miembronan di ehercito cu ta biba fuera di e pais y e personanan cu sentencianan criminal pasa.

Di mesun manera cu e otro plataformanan TikTok no a provee detaye riba e cantidad di empleado full time ni tampoco e cantidad di placa cu lo ser dedica na e meta aki, cual tin e meta di promove votacion consciente y combati plamamento di informacion falso of eroneo.

E compania a bisa cu nan lo ta trahando cu decenas di organisacion cu lo controla si un informacion ta berdadero, incluyendo PolitiFact y Lead Stories pa combati e mal informacion cu lo por plama. Nan a nenga di bisa cuanto video a ser controla caba riba nan sitio web. E compania lo usa un combinacion di ser humano y inteligencia artificial pa detecta y elimina menasanan contra di e empleadonan trahando riba e eleccion ademas di e mal informacion tocante votacion.

Tambe nan a agrega cu nan lo vigila e ‘influencers’ cu acepta placa fuera di e plataforma pa promove problemanan politico of candidatonan, cual ta un problema cu a sali na cla durante eleccion di aña 2020. Segun empleado di TikTok encarga cu siguridad Eric Han.

Meta Platforms Inc., cual ta doño di Facebook, Instagram y WhatsApp a anuncia diamars cu nan plan pa cu e eleccion aki ta “consistent cu e politicanan y siguridadnan” di aña 2020.

“Di mesun manera cu nos a haci den aña 2020, nos a dedica un ekipo pa asina combati e interferencia cu e eleccion y votacion mientras tambe nos ta purba di yuda nos usuarionan yega na informacion confiabel tocante ki tempo y con pa vota,” Nick Clegg, president di asuntonan global di Meta a publica.

Mientrastanto Twitter lo sigui cu nan mesun plan di categorisa como mal informacion, aunke nan a actualisa e diseño di esaki desde aña 2020 basa parcialmente riba comentarionan di usuarionan. E compania a activa nan politica tocante integridad civil siman pasa, cual ta nifica cu e publicacionnan cu ta contene informacion falso y/of dañino tocante e eleccion lo ser categorisa cu fuentenan unda por haya informacion confiabel. E publicacion mes no lo ser promovi ni tampoco amplifica pa e plataforma.

E compania, cual di mesun manera cu TikTok no ta permiti avisonan ni promocion politico, ta enfocando riba trece informacion verifica y confiabel na su usuarionan. Esaki por inclui link pa yega na sitionan web specifico pa informacion tocante eleccion local ademas di anuncionan di servicio publico pa votadornan.