Conseho di Minister ta aproba 600 mil florin pa atende cu adictonan ambulante
Dialuna durante conferencia di prensa di gobierno, Minister di Husticia y Asuntonan Social Rocco Tjon a anuncia cu diabierna ultimo durante Conseho di Minister a aproba 600 mil florin pa un proyecto pa atende cu e adictonan ambulante. Esaki sigur ta un logro grandi na unda e problematica aki lo wordo atendi debidamente.
Prome Minister Evelyn Wever-Croes a expresa su satisfaccion pa cu e logro aki mirando cu e problema aki lo haya su debido atencion na un manera duradero. Cu e fondo adkeri lo bay emplea 5 persona capacita cu lo bay dedica solamente na e proyecto aki. E 5 profesionalnan lo bay tin e responsabilidad di acerca e adictonan ambulante y percura pa cada un wordo ubica den un di e centronan eliminando e problematica di tin e adictonan riba caya.
Lo renoba 4 camber na centro colorado.
Cambionan infrastructural necesario tambe lo wordo haci pa asina ubica e clientenan aki y dunanan e debido atencion. Manera Minister Tjon a indica, na comienso lo haci uzo di e centro na Meiveld pero segun e plan a aloca Awg 100 mil pa renoba 4 camber na Centro Colorado. Unabes e cambernan aki ta cla, lo tin un total di 16 pa 24 cama na unda e adictonan aki por haya ayudo y cuido profesional. Tambe lo tene na cuenta tur otro necesidad di e adictonan unabes cu kita nan for di riba caya. Pa cu esaki lo tin tur material disponibel pa asina por atende y provee pa e adictonan aki efectivamente.
Prome Minister ta gradici Minister Rocco Tjon y su ekipo completo pa nan dedicacion y trabou pa cu e logro aki. Eliminando e problematica di adicto ambulante specialmente den centro di cuidad, ta un contribucion enorme na Aruba su desaroyo economico mirando e sentimento di siguridad cu esaki lo crea den cada cuidadano y bishitante di pais Aruba, Prome Minister Wever – Croes a termina bisando.
