Minister di Turismo y Salud Publico sr. Dangui Oduber ta informa pueblo riba e proyecto di digitalisacion y ora ta pidi pa permisonan. Ya caba pa algun tempo trabounan ta andando den e proyecto di digitalisacion y automatisacion cu lo bay mehora e servicio y eficiencia di tur e permiso cu ministerio di Turismo y Salud Publico ta procesa. E proyecto aki ta den cuadro cu e eliminacion di e conocido “red tape” y burocracia cu ta existi pa asina brinda un mihor servicio na e clientenan di Gobierno.

Minister Oduber ta duna di conoce cu actualmente ta dura hopi pa haya un permiso pa motibo cu e peticion sea ta incompleto of falta algun informacion, e comerciante mester bay fisicamente na e departamento concerni. Tambe e burocracia ta wordo haci na un manera manual y esaki tambe ta trece un tardansa innecesario den e proceso pa haya un permiso. Otro cos ta cu henter e proceso aki ta uno cu ta wordo ehecuta entre e departamentonan Dienst Warenkeuring en Higiëne y Cuerpo Policial, cu ta cai bou di 2 diferente ministerio, esta di Salud Publico y Husticia.

E mandatario a señala cu prome cu otorga permiso ta hopi control mester tuma lugar. E permisonan aki ta di entre otro: Hotel, Servicio All-inclusive, Koffiehuis, Societeit, Slijterij, Bierhuis, Logement/ Air BnB, Restaurant y Ice cream parlor. Den esaki ya caba desde algun tempo a indentifica cu tin espacio pa adapta, cambia y mehora e proceso aki. Pa logra esaki ta bay haci uzo di innovacion y tecnologia pa bay den digitalisacion y automatisa henter e proceso. E lo bira asina cu na momento cu un persona of un compania haci un peticion y te na e momento cu e permiso wordo otorga lo keda digitalisa.

Despues cu a anuncia e proyecto aki na pueblo di Aruba na comienso di juni di e aña aki, mesora a cuminsa cu e proceso di destaho publico pa asina wak ta cua ta e compania cu ta gana e destaho pa haci e trabou aki. Awor e proceso di destaho a termina y esun cu ta bay haci e proyecto di e proceso di digitalisacion y automatisacion ta conoci. Locual ta sigui awor ta cu e compania cu a gana e destaho ta bay cuminsa haci e trabounan. Minister Oduber a menciona cu segun por a compronde e trabounan aki lo tin un duracion di 3 luna. Si tur cos cana segun e plan pa comienso di luna di December lo lansa e proyecto aki caminda lo bay elimina e “Red Tape” y burocracia den henter e proceso ora di haci peticion pa un permiso.

Minister Oduber ta convenci cu na momento cu e proyecto aki keda cla, e trabounan lo bay na un manera mas eficiente caminda ta bay brinda un mihor servicio na e clientenan di Gobierno. Tur hende lo bay sinti y nota e cambio grandi aki por medio di innovacion y tecnologia cu e proyecto aki lo trece cune. Esaki sigur ta un stap den e rumbo cu henter Gobierno ta bayendo, haciendo uzo di innovacion y tecnologia pa sigui innova e servicionan di Gobierno.