Ayera mainta Metabolic Foundation a anuncia nan proyecto Surfside Science cu lo enfoca ariba metodonan pa midi calidad di aire,awa di lama, cambionan den e costa y vegetacion den fondo di lama. Durante e conferencia di prensa, Christie Mettes, coordinador di e proyecto, a elabora mas ariba e proyecto y kico e meta di esaki ta.

Mettes a splica cu e proyecto Surfside Science e ta un proyecto cu a haya financiamento di Resembid cu ta un fondo di Union Europeo cu ta wordo maneha door di Expertise France cu ta e agencia di colaboracion pa desaroyo Frances cu ta maneha proyectonan den e teritorionan OCT cu ta inclui Aruba y 11 otro isla di Caribe.

E proyecto aki lo dura un aña y durante e aña ey Metabolic Foundation lo test diferente metodo cu por wordo usa pa automatisa e coleccion di data ariba e costa di Aruba tanto di e area di tera di costa como den lama mes, den un area cerca di costa. Mettes a indica cu e metodonan aki ta mas economico cu metodonan normal y e fundacion ta purba di haci nan mas replicabel pa nan por wordo usa door di hendenan cu no ta cientifico tambe.

Pa sigura cu e metodonan ta confiabel durante e aña e fundacion lo ta trahando hunto cu e ecologo marino y ingeniero medio ambiental Tatiana Becker cu lo compara e resultadonan cu Metabolic Foundation ta midi cu e resultadonan cu el lo midi usando metodonan standard cu ta wordo usa generalmente den ciencia.

Cu esaki e fundacion ta spera di por demostra cu e metodonan aki por wordo aplica riba mas playanan di Aruba.

Mettes a splica cu nan ta den contacto cu Directie Natuur en Milieu (DNM) y cu Universidad di Aruba y den e desaroyo di e proyecto aki, e proyecto a wordo confirma door di DNM y Deaci prome cu el a wordo manda pa Union Europeo

Mettes a indica tambe cu e preocupacion cu Metabolic Foundation tin ta cu rond di mundo y rond di Caribe por wak kico ta pasando den e costa, specialmente cu cambio climatico y lastimamente na Aruba hopi di e data cu por mustra con cosnan ta cambiando no tey. El a remarca cu aworaki e rason pakico nan ta indica cu e data no t’ey ta pa motibo di placa pa financia e coleccion di data aki of tin biaha no tin e capacidad pa colecciona e data aki constantemente.

Cu esaki den mente, Metabolic Foundation ta purba di bin cu solucionnan cu ta automatisa pa por colecciona e data aki y por wak e cambionan cu ta pasando. Den caso cu kier implementa un solucion na Aruba, si tin monitoreo por wak si e solucion ta trahando of no.

“Hopi di e coleccion di data na e momentonan aki no ta automatisa y no ta constante. Por a tuma nota di un rapport di Carmabi cu sigur tabata hopi valioso pa Aruba, pero e ta un moment opname y no a sigui colecciona constantemente. Loke nos kier contribui ta un sistema cu na momento cu por ehempel bo bay online pa busca informacion, e informacion cu nan ta buscando ta disponibel”, Mettes a subraya.

Hopi di e datonan aki, el a indica, ta datonan cu entre otro Aruba tin cu presenta na e Sustainable Development Goals, dus ta datonan cu ta wordo pidi riba un forma internacional y den esey tin maneho caba cu nan ta mara na e tipo di datonan aki, Metabolic Foundation no ta bay traha riba e maneho como tal.

El a agrega cu en general den Caribe tin cambionan, pero toch falta hopi informacion den Caribe mes, den otro islanan y hopi di nan no tin sistemanan di monitoreo tampoco.

Pa loke ta e meta di e proyecto Surfside Science, Mettes a comenta cu e estudio aki nan no por prueba ken ta culpabel di kico. Loke nan por bisa ta unabes cu nan tin e data nan lo por wak si tin cambionan ta pasando of si e calidad ta malo. Hopi di e puntonan cu e fundacion ta midi ta e liñanan basico, e cosnan mas simpel. Nan ta wak e temperatura di awa, e acidez, dus PH di e awa, e conductividad di awa, cuanto salinidad tin den e awa y e cantidad di oxigeno cu tin den e awa.

E problemanan di polucion of sushedad ta cay pafo di loke nan ta midi, pero ta relaciona na esaki. Ora cu e puntonan aki cuminsa baha e ora por cuminsa wak pakico nan tabata mustra den un direccion negativo.

“Aworaki e meta di e estudio ta pa wak si e metodonan aki por wordo usa, nos ta usando e area di Surfside como un luga piloto y unabes si e investigacion ta mustra cu e metodonan ta funciona e ora nos ta spera cu por amplia e proyecto pa monitorea henter e costanan di Aruba” Mettes a agrega.

Comunidad tambe por contribui den un forma cu e proyecto Surfside Science. Mettes a comenta cu nan kier haci e proyecto den un forma hopi abierto caminda lo tin diferente sesionnan informativo, pero tambe lo tin camindanan cu hende lo por colabora cu nan, entre otro coleccionando potret di bao lama.

Por ultimo, den nomber di Metabolic Foundation Mettes a extende invitacion pa pueblo di Aruba pa sigui nan riba Instagram y pa keda pendiente ariba updates di e proyecto. “Nos lo purba tur luna comparti informacion over di e progreso di e proyecto, con e ta bayendo y ki tipo di data nos por a colecciona caba, si nan ta wordo valida of no y cualkier persona cu kier participa of tin feedback, nos ta hopi habri pa haya e feedback”, el a indica.