Bon Dia Aruba a pasa bishita e post di Fundacion Pa Nos Comunidad situa na Club Kibrahacha unda nan tabata druk bezig preparando rond 300 tas di scol pa parti na muchanan di menos recurso. E aña aki ta conta cu menos tas cu añanan anterior segun e fundacion, pero esaki no ta stop nan di traha incansablemente pa logra yuda nan comunidad.

Gianaika van der Biezen, directora di Fundacion Pa Nos Comunidad ta splica reportero di Bon Dia Aruba cu Fundacion Pa Nos Comunidad tin 12 aña caba cu ta organisa un proyecto di ‘Back To School’, hunto cu Caliente FM, ta haci un Radiothon y conecta cu comerciantenan anto tambe comunidad completo pa por yuda otro muchanan pa tambe por cuminsa nan scol cu tas y articulonan nobo.

Pa ta sincero, sra. Van der Biezen a splica reportero di Bon Dia Aruba cu e aña aki nan tabata tin menos tas cu normal. “Normalmente nos tin un cantidad mas hopi,” segun Sra. Van der Biezen, agregando cu: “pero tambe tin hopi mas organisacion cu tambe ta bezig cu proyectonan pa Back To School, cu dos di nan mi por a haci un matching-list. Esey ta Mi Bos ta Bo Bos y tambe cu Interact Club of Aruba.” A haci matching di lista pa evita cu por ehempel un mucha por haya dobel anto otro ta keda sin haya pasobra toch e listanan ta largo.

E fundacion ta gara e clientenan cu ta registra of clientenan activo of no activo cu pakete pero cu nan sa cu nan situacion ta hopi dificil, ta duna nan un man. E fundacion ta haci un intake pa mira e situacion financiero pa por constata toch si ta cay dificil pa e mayornan aki por cumpra articulonan di scol. Primeramente ta enfoca mas tanto riba e tas cu algun articulonan den dje, y tin algun mucha – un cantidad hopi chikito – cu a logra na haya algun uniform di scol pa e aña escolar aki cu e fundacion por a yuda cune.

“Berdad cu den pasado tabata tin mas ayudo cu esaki, pasobra mi ta corda tabata tin aña cu nos tabata parti riba 400 of casi 500 tas, sigur dos aña atras nos a haya tasnan di afo, nos a haya mas comerciante, pero mi ta mira cu berdad tin mas organisacion bezig y mi ta kere esey ta un di e motibonan cu e ora cerca nos e ta baha,” Sra. Van der Biezen ta splica.

E aña aki, e fundacion ta remarca cu berdaderamente por mira con comunidad ta wordo afecta financieramente, cu por mira tog por ehempel cu FPNC via Caliente FM mes a haya menos cu locual ta haya tur aña. A haya donacion for di Dijon Center, tambe danki Dios segun e fundacion nan a logra haya varios donacion for di diferente persona cu a presenta cerca nan y trece esakinan. Di Caliente FM a haya mas cu 100 tas, for di Interact Club of Aruba a haya tambe donacion y Digicel tambe a colabora cu cosnan di scol pa e muchanan.

Pa e clientenan cu ta registra na e fundacion y tin tur nan datos eynan caba, ta cana su proceso pa yuda nan, anto esnan cu no ta cliente e fundacion ta haci un revision financiero cu nan pa mira si nan por bin na remarke. Pero, tambe tabata tin cliente cu por ehempel ta activo cu pakete actualmente pero cu nan situacion ta keda fastioso, pues e fundacion ta traha duro pa clientenan activo, no activo y nobonan.

Hopi trabao mes riba nan man pa loke ta e proyecto aki di Back To School. Nan tin algun boluntario cu ta join nan trahando oranan y dianan largo pa por logra keda cu tur cos cla, pa entrega tur cos na tempo pa tur e muchanan aki tin nan cosnan pa cuminsa nan aña escolar cu nan articulonan.

E balor di esnan cu ta haci donacion ta contribui grandemente den e exito di e fundacion. Cu e generosidad di comunidad, FPNC semper a logra di sigui yuda famianan den necesidad riba nos isla.

E fundacion ta haya cu ta importante pa corda cu e contribucion aki cu bo ta haci na e fundacion ta loke ta encurasha y trece speransa den hopi hogarnan cu ta pasando den situacionnan financiero dificil na e momentonan aki. Tres palabra simpel ta describi e fundacion aki: Speransa, cuido y curasha, anto hunto e palabranan aki ta loke ta wordo aplica den e servicio social cu ta wordo brinda na nan clientenan.