(NLTimes/AP) – E publicista Hulandes di Salman Rushdie, Pluim, lo bolbe print y publica e trabao di e autor, incluyendo su buki mas conoci y controversial “The Satanic Verse,” e publicista a anuncia riba Twitter.

E autor conoci su condicion a mehora despues di a ta victima di hincamento na Merca.

Pluim lo publica un traduccion di Rusdie su buki nobo “Victory City” na Februari otro aña. Ademas, e publicista lo percura cu “Midnight Children,” “The Satanic Verses” y “Joseph Anton” ta disponibel un biaha mas lo mas pronto psoibel. “Specialmente awo, e ta importante pa su bukinan por ser lesa,” Pluim a skirbi.

Ahman Salman Rushdie, naci na India den aña 1947 di famia Musulman, a ser conoci globalmente, mas tanto entre Musulmannan radical, pa su buki titula “The Satanic Verses”. Islamistanan a haci demonstracionnan en masse ora cu esaki a ser publica den aña 1988. Un aña despues, e lider Shia na Iran durante e tempo aki, Ayatolla Ruhollah Khomeini, a declara un ‘fatwa’, cual ta un sentencia legal den ley Islamico, contra di Rushdie. E ‘fatwa’ aki a prohibi e autor di Iran y a haci yamado pa su asesinato. Khomeini a fayece varios luna despues.

Varios Musulman a mira e buki como blasfemia, ken a mira un di e personahenan como un insulto na e profeta Muhammad, entre otro obhecionnan cu nan tabatin. Den e mundo di Musulmannan, hopi protestanan violento a cuminsa den contra di Rushdie, ken a nace na India di famia Musulman.

Por lo menos 45 persona a ser asesina den protestanan contra di e buki, incluyendo 12 persona den Rushdie su cas Mumbai. Den aña 1991, un traductor Hapones di e buki a ser asesina y un traductor Italiano a sobrevivi un atake cu cuchiu. Den aña 1993, un publicista Noruego di e buki a ricibi 3 tiro sinembargo el a sobrevivi.

Lider supremo actual di Iran Ayatollah Ali Khamenei nunca a dicta un ‘fatwa’ do si mes, aunke den añanan recien Iran no a enfoca riba e escritor.

E menasanan di morto a causa cu Rushdie a bay den scondite, scondiendo bao di un programa di proteccion di gobierno Britanico, cual a inclui guardianan arma 24/7. Rushdie a bolbe back despues di 9 aña y cautelosamente a sigui cu aparicionnan publico, manteniendo su criticanan di extremismo religioso en general.

El a bisa durante un aparicion na New York cu terorismo ta e arte di miedo. “E unico manera cu bo por combati esaki ta pa medio di dicidi cu bo no tin miedo,” el a declara.

E sentimento anti-Rushdie a permanece pa hopi tempo despues di Khomeini su decreto. The Index on Censorship, un organisacion cu ta promove e libertad di expresion, a bisa cu a recauda fondo pa aumenta e compensacion na e persona cu logra asesina Rushie den aña 2016.

Den aña 2012, Rushdie a publica un memoir titula “Joseph Anton,” tocante e ‘fatwa’. E titulo aki a bini for di e nomber cu Rushdie a usa mientras e tabata scondi.

El a genera prominencia cu su buki cu a gana premio Booker “Midnight’s Children,” sinembargo su nomber a keda conoci den henter mundo despues di “The Satanic Verses.”

Recientemente a reporta cu e escritor a ser hinca 10 biaha pa un homber hunstamente prome cu un evento na Chautauqua, New York riba diabierna. E homber a keda aresta, sinembargo su motivacion te ainda no ta conoci. E sospecha ta cu e atake aki tin di haber cu ‘fatwa’ cu Rushdie a ricibi den aña 1980.

Pluim publishers a bisa cu nan ta hopi disgusta cu e atake haci riba e autor. “Salman Rushdie ta un gran escritor cu un cuerpo di trabao extenso. Su bukinan magico ta refleha nos sociedad. E ta usa tur e recursonan cu literatura ta ofrece su persona. Ora cu su trabao ta duna espacio pa asina un crimen, pensamento ta stop. Nos ta spera e recupera pronto,” e publicista a publica.