Germille Geerman (34) ta un contado di storia. Su inspiracion ta Juan Chikito kende for di cu e tabata chikito tabata cont’e storianan di su bisawelo, Lucas Wilfrido Werleman, conoci pa famia como Juan Grandi, un figura destaca na Aruba.
Germille a lanta memey di su welonan paterno y materno, pero tabata Juan Chikito cu a pinta e imagen di un famia di 13 yiu na Angochi, cu a lanta ta planta maishi rabo den cunucunan cu awe ta veld di Sportboys y Caravel. Awe Germille ta un empresario local cu ta usa su talentonan artistico y di comunicacion pa comparti parti di su propio historia cu turista y local y alabes sostene movecionnan pa promove plantacion local. Recien Geerman a organiza un encuentro na Oasis Farm pa celebra e agricultor Ruthsel Emer y pa dun’e sosten pa sigui pusha dilanti cu e proyecto cu segun Germille, ta e direccion cu Aruba mester bay pa bira sostenibel, esta plantacionnan urbano.
Germille a realisa for di chikito cu e mester conta e storia di Juan Grandi y su mesun bida ta un trayectoria pa yega na e meta. Y manera ta bunita di un storia, e capitulonan hopi biaha ta skirbi nan mes.
Juan Grandi tabata electricista y su trabao mes tabata cu Lago, danki na e hecho cu el a siña papia Ingles den e temporada cu e mester a bay traha pa Cuba pa sostene su famia. E no por a lesa of skirbi, pero asina mes su influencia tabata grandi. Juan Grandi a hinca hopi empeño den famia y progreso di Angochi y bisindario y hasta a bira elemental den politica di Aruba. Juan Grandi tabata e prome na e bario cu auto y a percura pa e prome proyecto di filmacion na Aruba.
Y kizas ta esaki a inspira Germille pa drenta den medionan di comunicacion. Den su adolescencia el a sinti cu television of medio audiovisual tabata e ruta. Germille tabatin apenas 15 aña ora cu, despues di a pidi pa hopi tempo, a haya yamada pa yuda ATV den e transmisionnan di boxeo. Su trabao tabata pa hala kabel, pero Germille tabata acepta esey cu gusto. Cu transmision di futbol mundial Germille a drenta studio, cu a yuda yegando mas cerca di su obhetivo pa siña domina e medio audiovisual. Tabata trahando na Star Vision, cu despues a bira Canal 22, ta ora cu Germille a siña mas, bao guia di Pedro Gomez y otronan cu a bin di TeleAruba.
Pues, e tabata un sla ora cu e canal a cera y diripiente Germille tabata sin trabao, pero mas ainda, e no tabatin un medio pa comunica cu Aruba. Sinembargo, e no a keda cas pa hopi tempo. Banda di atende scol (di anochi), Germille a bolbe den produccion cu Tessa Pietersz y Trend Alert. Sinembargo el a ripara cu no a innova den tecnologia. Como tal, e hoben a dicidi pa haci prestamo y inverti den camara y computer pa e era nobo di grabacion, esun digital. Locual e empresario hoben no tabata prepara p’e ta cu clientenan tabata kier calidad, pero no tabata cla pa e prijs. Y su inexperiencia a lag’e acepta pa traha bao locual su trabao tabata bal.
Consecuentemente, realidad financiero a bati porta y e storia di Germille a bira uno di un hoben sumamente desapunta, depresivo, cu a keda cu debe cu ainda e ta pagando. E hoben a cay den un depresion pisa, cu hopi ansiedad. Germille a busca di tapa e duele cu e tabata sinti cu alcohol y sigaria, pero finalmente a ripara cu locual tabata calm’e y yud’e funciona tabata cannabis. “E cannabis a yuda kita mi ansiedad y permiti mi funciona y hasta yuda otro hende. Y pasobra mi ta trankil awor, mi no mester di dje (sin mas),” el a conta.
Pero e espiritu di Juan Grandi ta fuerte den dje, y no a dura hopi pa Germille, a pesar di slanan, lanta ariba y recrea su mes. Aunke cu e realidad di bida a keda colga pisa riba su cartera y emocionnan, Germille a sigui pusha dilanti.
El a haya su medium di expresion den arte, unda el a colabora cu Atelier ’89. Tabata su colaboracion cu Tito Bolivar, den e prome Art Fair di Aruba a forma otro punto di desaroyo di Germille, ya cu el a conoce artistanan grandi di exterior y a reconoce nan pasion pa conta realidadnan social den forma di arte, den e caso aki, murals. Esaki tabata tempo tambe cu el a tuma e apodo ‘El Mustashi te Ama.’ “Mi tabatin un mustashi y esnan cu a bin Aruba, tabata yama mi pa mi mustashi.” Pero manera ta e caso hopi biaha, semper tin rechaso local y “m’a dicidi pa pone ‘te ama’ tras di e apodo .”
Den otro palabra, cambia e energia negativo den uno positivo. Y e energia ey a keda traduci den obranan di arte cu ta inclui su pizzanan vegetariano unico, traha cu e mesun producto cu a sostene e famia Werleman na Angochi pa hopi aña, cu ta maishi rabo, yambo y concomber chikito. Germille a yama su pizzeria Itza Pizza pa su yiu muhe y awor ta conta storia di Aruba den creacionnan cu ta ganando aprecio di turista y local cu ta dispuesto pa paga pa un producto unico. E empresario a siña su les.
Pero mas cu un producto pa bende, e ingredientenan di su pizza ta homenahe na locual Aruba por produci y na e trabao di su bisawelo kende a inverti hopi tempo den cultura y progreso di Aruba. Su bisanieto, kende awor a tuma e apodo ‘Johnny Farina’ (na Papiamento: Juan Hariña’) ta invertiendo hopi energia y tempo pa tene su storia bibo y na mesun momento contribui na conscientisacion pa e balor di plantacion y arte local, herencianan tangible di Aruba.
