Comerciante Uni Aruba [CUA] a tuma nota di un anuncio recien cu Gobierno no lo cobra impuesto riba Tip. Frans Ponson di Comerciante Uni ta bisa cu proposicion di cobra riba tips na Aruba t’ey pa hopi aña caba riba mesa di gobierno y no tin ningun gobierno cu kier tuma e posicion pa haci e. Ora un pais ta den crisis y cu debe astronomico, pa bay cobra pueblo kiermen tur hende tin cu contribui y paga nan ‘fair share’ segun Sr. Ponson.
“Con nos ta bay bisa sector priva y tur hende cu tin un salario riba Aruba cu nos no ta bay cobra riba tip?”, Sr. Ponson ta expresa diabierna mainta durante un conferencia di prensa di Comerciante Uni Aruba. Si cobrando impuesto riba Tip ta bay trece un suma aden, segun Sr. Ponson, si e no bay bin e resto di pueblo ta bay pag’e. Den sector di Horeca, mayoria ta riba salario minimo y ta haya Tip. Comerciante Uni ta enfatisa cu no ta papiando riba e cash cu ta drenta. Esey toch no por wordo controla. Ta papia specificamente aki riba tur cos cu ta wordo paga cu Credit Card. “E fair share, awe tur trahado sea ambtenaar of cualkier sector priva, tin cu paga loonbelasting, AZV, SVB y tur gasto riba dje. Nos ta bisa no bay cobra riba Tip pa AZV of nada di e cosnan ey ainda. Pero sikiera e Loonbelasting mester wordo paga riba dje,” segun Sr. Ponson.
‘No ta husto’
Gobierno semper ta traha pa robes segun CUA, e mal pagado ta haya descuento y sector di comercio no ta conoce e cosnan aki. “Nos tambe tin cu bira sabi awo y trece tur comerciante na Aruba hunto anto bisa pakico nos trahadonan nan bonus di fin di aña, nan no por hay’e sin paga loonbelasting? E ta zona absurdo pasobra e ta un Tip nan ta bay haya na December, nos no kier nan cobra loonbelasting, nan tambe mag haya nan fair share, si un ta hay’e e ora e otro tambe, nos no ta compronde.”
No ta husto pa pagado di belasting paga hopi mas awo pasobra un grupito no ta paga belasting, segun Sr. Ponson ta splica. Tip cu drenta e comerciante cu ta wordo pasa back pa trahado, ta pidi sikiera pa kita loonbelasting for di dje, pasobra e trahado ta haya beneficio cu por bay banco cu suma mas halto, y gobierno tin control cu si mañan tin pandemia, ora e haya 60% of 80% di su salario, tin un salario real y no for di salario minimo.
