Awe 15 di augustus India ta celebra 75 aña di Independencia. En conexion cu esaki e Asociacion di India na Aruba a organisa un gran celebracion, den forma di un parada di auto, ayera diadomingo 14 di augustus. Presidente di e asociacion, Haresh (Henry) Sadarangani a conta un poco mas di e celebracion di e gran fecha aki.
“Nos ta akinan celebrando 75 aña di independencia di nos pais di India. Nos tur ta akinan pa celebra e dia hopi special pa nos”, Sadarangani a expresa. El a conta cu e comunidad di India tin mas di 90 aña estableci na Aruba y Aruba ta nan cas, pero nan amor pa India ta mesun fuerte.
E celebracion a tuma luga den forma di un parada di auto cu ta a sali for di Savanenta y a yega te na California Lighthouse. Despues di e parada di auto, nan a celebra como un comunidad. “Nos kier celebra cu henter pueblo y sali cu nos banderanan di Aruba y di India”, Sadarangani a agrega.
Prakash Gupta, Consul Honorario di India na Aruba tambe a remarca cu e comunidad di India ta biba ancra pa mas cu 90 aña na Aruba y ta biba hunto cu e comunidad di Aruba. “Nos tin hopi bon relacionnan y nos a integra hopi bon den e comunidad y esaki ta nos cas”, el a subraya.
E celebracion di dia di independencia na India mes y como tambe rond mundo ta wordo celebra den grandi y di diferente manera. Gupta a enfatisa tambe cu e parada di auto cu a wordo celebra ayera na Aruba tambe ta un forma di concientisacion y pa trece e comunidadnan di Aruba y India mas cerca di otro.
India a logra su independencia for di e dominio colonial Britanico dia 15 di augustus 1947. E lucha pa libertad tabata uno largo y tedioso y a conta cu e sacrificio di hopi luchadornan cu a bringa pa e libertad y a duna nan bida pa nan pais y su ciudadanonan.
E dia aki ta honra e luchadornan ey, e historia di e pais, su cultura y logronan di e nacion den conhunto. E fecha aki ta recorda tambe tur e ciudadanonan di India e comienso di un era nobo, un era di libertad for di e dominio colonial Britanico cu a dura mas di 200 aña.
E dia di independisa ta wordo conmemora cu e hisamento di e bandera, desfile, eventonan cultural y ciudadanonan cantando cancionnan patriotico. Ariba 15 di augustus 1947, e prome Prome Minister di India, Jawaharlal Nehru, a hisa e bandera nacional di India ariba Lahori Gate of Red Forth na Dehli. Un tradicion cu for di e dia ey ta wordo cumpli pa tur e Prome Ministernan di India sigui pa un discurso nacional na e pais.
Por ultimo, Sadarangani a remarca cu e comunidad di India na Aruba ta agradecido na e comunidad di Aruba pa nan confiansa, amistad y aceptacion. “Como ciudadanonan nos comunidad ta ofrece nan compromiso pa biba den paz y harmonia ariba e dushi isla di Aruba cu nos a scoge como nos hogar pa futuro generacionnan.”
