(AP) — E inval di FBI na cas di ex-presidente Mericano, Donald Trump na Mar-a-Lago a sacudi e pais, hasta prome cu a revela documentonan di corte ayera mustrando cu agentenan a recupera documentonan marca ‘top secret’ mientras nan tabata investiga potencial violacion di tres ley, incluyendo un cut a goberna informacion di defensa bao di Ley di Spionahe.
Trump a bisa cu e documentonan confisca pa e agentenan tabata ‘tur desclasificado’ y a argumenta cu e lo a entrega nan na Departamento di Husticia si a pidie. No tabata cla, sinembargo, si e documentonan tabata desclasifica of si e tabatin e poder pa hacie. Trump tambe a keda cu posesion di e documentonan a pesar di varios solicitud pa entrega nan di acuerdo cu ley federal.
Aki un bista di e investigacion di varios luna y loke a sucede despues:
Mita di januari 2022: Diescinco caha di documento presidencial ta recupera for di Mar-a-Lago den un transferencia organisa pa Administracion Nacional di Archivo y Registro (NARA). E transferencia a bin despues cu un representante di Trump a bisa e agencia na december 2021 cu tabatin documento na Florida casi un aña despues cu Trump a bandona su cargo. E agencia a bisa cu bao ley federal, tur registro mester wordo preserva, un proceso cu ta ‘critico pa nos democracia’.
31 januari: E agencia ta bisa cu Trump a destrui algun documento di tempo di su presidencia. Durante su presidencia, oficialnan di maneho di documento di Cas Blanco a recupera y pega back na otro algun di e documentonan cu Trump a scheur, y a entrega nan na e archivo mientras el a bandona e presidencia, hunto cu otro documentonan scheur cu no a reconstrui.
18 februari: A haya informacion clasifica den 15 caha di documento di Cas Blanco cu tabata warda na Mar-a-Lago, segun NARA. E revelacion a yega den un carta contestando un comite congresional di supervision. Tambe a confirma cu a manda e asunto na Departamento di Husticia.
25 februari: Comite Congresional riba Supervision y Reforma, lidera pa Carolyn Maloney di New York ta delinea un serie di documento necesario pa determina si Trump a viola leynan federal di documento hibando e cahanan na Florida.
Spring: Investigadornan di Departamento di Husticia y FBI ta bishita Mar-a-Lago pa haya mas informacion tocante material clasifica hiba na Florida. Oficialnan Federal tambe a entrega un orden hudicial pa algun documentonan cu a kere ta na e sitio.
5 augustus: Hues Magistrado Bruce Reinhart na South Florida ta aproba e aplicacion pa un orden pa inval, hayando cu FBI tabatin causa probable pa inval na Mar-a-Lago. E documento ta seya. Procurador General Merrick Garland despues ta bisa cu personalmente el a aproba e decision pa busca e orden pa inval.
8 augustus: Inval di FBI na Mar-a-Lago den un escalacion sin precedente di scrutinio di agencia di cumplimento di ley riba un ex-presidente. Trump no tabat’ey na e momento, e lugar tabata cera pa e temporada, pero a revela e inval den un declaracion publico.
10 augustus Director di FBI ta papia contra proliferacion di menasa y yamado pa tuma arma den skinanan di internet preferi pa extremistanan derechista despues di e inval.
11 augustus: Despues di dianan di silencio publico, Garland ta tene un conferencia di prensa unda ta haci un anuncio: E ta bay pidi corte pa revela e orden seya, un stap inusual pa un investigacion pendiente. Garland a bisa cu publico tin derecho pa sa kico a ocasiona e inval extraordinario na cas di e ex-presidente.
Trump ta responde cu un declaracion yamando pa revelacion ‘inmediato’ di e orden.
12 augustus: Hues Reinhart ta revela e orden cu a autorisa inval di FBI na Mar-a-Lago hunto cu documentonan di corte mustrando cu agentenan a recupera documentonan marca ‘top secret’ entre 11 set di documento clasifica. E documentonan di corte no a duna detayenan specifico riba e documentonan ni ki informacion nan ta contene.
