Na multiple momento nos a y ta critica e falta di plan integral y completo, entre otro riba tereno di energia. Na lugar di esey, pida pa pida, pa nos por guli mihor aparentemente, ta haya presenta kico lo ta e proposito a largo plazo. Asina nos a haya nos mes confronta atrobe cu introduccion di e relacionnan sospechoso na Venezuela di nos actual ministro encarga cu Energia, den su afan pa logra cumpra heavy fuel oil (HFO). Mientras no por nota avance significativo den e asuntonan clave pa yega na e metanan sensato en busca di un futuro menos dependiente di combustible fosil, ta bin e proposicion pa purba haya gobierno Mericano asina leu pa por haci un excepcion pa Aruba por cumpra na Venezuela.

Esaki naturalmente na un prijs preferencial, cu ta duna perspectiva pa gobierno local por haci bon papel cerca e ciudadania, cu a caba di haya e aumento di tarifa di awa y coriente pa guli. Cu e posible reduccion di prijs cu lo mester ta posible cu e compra di HFO barata na Venezuela, lo por baha prijs atrobe pa e consumidor local: pueblo a gana, gobierno a gana, y e amigonan di identidad oscuro tambe lo a gana.

E storia aki ta zona manera cu e ta: “too good to be true”. Kico ta e situacion real? E regimen Chavista/Madurista te awe no ta logra aumenta produccion petrolero te na un nivel aceptable.Mientras algun aña pasa ainda e pais tabata produci na un nivel di casi 2,5 miyon bari pa dia, actualmente e industria ta asina kibra cu apenas ta yega na un produccion di alrededor di 780.000 bari pa dia, di cual ta exporta como crudo mas di 60%. Falta di inversion den innovacion y mantenimento ta haci cu produccion ta varia hopi, creando credibilidad pa benta di producto petrolero, cu ta ademas primeramente pa abastece e mercado local.

Un comparacion cu e bisiña – politicamente menos cuestionable – Colombia ta mustra cu e pais aki tambe tin un produccion actual entre 750.000 y 800.000 bari pa dia, pero cu e perspectiva pa crece te na 1 miyon bari pa dia pa fin di 2022. Gran parti di e exportacion di Colombia tambe ta den foma di crudo, y di menor forma den producto deriva di petroleo.

Ta importante tene na cuenta tambe ‘ken ta ken’ na Venezuela. E ministro por ta manehando cierto negociacion cu hende cu e conoce bon, pero no ta pornada henter e industria petrolero ta firmemente den man di e regimen autoritario socialista ey, cu no pornada ta sanciona pa practicamente henter mundo democratico, cu Union Europeo y Estadonan Uni na cabez, cu explicitamente a para tur importacion di crudo y producto petrolero di Venezuela den nan teritorio. Pregunta clave: Pakico Aruba mester busca pa yega na un trato cu e regimen dictatorial aki, si ni sikiera nan ta un partner di confia den sentido comercial, ademas di e sentido politico, unda ya caba ta rechazando relacion cu e regimen. No ta pesey e frontera ta cera? Localmentepor papia tocante habri frontera atrobe, pero pakico no ta splica cu e frontera ta cera pasobra na Den Haag – Reino tin frontera cu Venezuela, no Aruba – a dicidi cu e ta keda cera. Den e situacion aki ta mas cu logico cu no mester perde tempo mes cu e tipo di proposicion aki, cu ta ilustrativo pa e nivel di pensa gubernamental. Ta mihor sigui cumpra riba mercado regular, no di partner dudoso.

Di otro banda nos ta mira cu interes cu ta haci un yamado na empresanan interesa den inverti den un parke di molina di biento. Esaki lo por bay aumenta e porcion di energia di biento den e actual mix di fuente disponible, cu pa mas di 85 porciento ainda ta depende di Heavy Fuel Oil (HFO). E ta solamente un peticion pa mustra interes; nos no ta mira un plan pa logra, kico?

Ademas, den e actual situacion mundial di gran incertidumbre, acceso na gas natural barata tambe ta parce mas un ilusion, cu consecuencia cu lo por conta cu tardanza considerable den realizacion di un proyecto di suministro di gas na Aruba. Ademas, atrobe gobierno ta enfatiza e posible papel di Aruba como hub regional pa suministro di gas natural na cumprador di exterior. Nos mester keda mustra cu suministro di gas natural den gran parti di nos region ta un realidad pa hopi aña caba, unda ta anos ta entre e ultimonan pa join e competencia. Di dos cos uno: sea na nivel gubernamental nos representantenan no ta na altura di e desaroyonan aki, o conscientemente nan ta ignora e realidad aki. E motibo pa keda enfatiza esaki ta cu, ora no por realiza benta di gas na tercer, ta e consumidor na Aruba ta bira e base exclusivo pa amortiza henter e inversion aki, cu ta encera ademas e inversion costoso y innecesario di un tuberia cu mester core di San Nicolas te na facilidadnan di WEB. Esey ta significa cu produci energia electrico y awa na prijs razonable ta bira praxticamente algo ilusorio.

Loke ta haci falta no ta solamente un plan integral, presenta di un solo tiro pa por valora cada pieza di e conhunto, sino tambe cu un contenido realistico, sin e desviacionnan pa faborece e contactonan ‘legendario’ di e ministro, cu nunca a trece algo concreto ni drechi pa Aruba.