Ayera 12 di augustus, Dia Internacional di Hoben, a tuma luga e lansamento oficial di e di 8 edicion di e proyecto educacional Poder di Hubentud di e Asociacion Trabou di Hubentud na Aruba (ATHA). Lider di e proyecto, Vanessa Croes, a conta un poco mas di kico e tema di e aña aki ta, kico e meta di proyecto ta y con por nomina hobennan pa participa.

“Awe riba dia internacional di hoben, nos ta lansa e proyecto Poder di Hubentud y lo continua cu su lansamento cada aña ariba e fecha aki 12 di augustus. Y sigur dunando tambe e importancia na e articulo uno di e tratado di derecho di mucha na unda cu ta establece cu tur persona te cu e edad di 18 aña ta ser considera un mucha”, Croes a indica.

Croes a splica cu e aña aki e tema pa e proyecto ta ‘Un Capitulo Nobo’. Poder pa Hubentud ta un proyecto cu ta priminti un aña mas di bira un exito na unda cu ta brinda hobennan e oportunidad pa desaroya nan habilidadnan y asina adkiri e experiencia ariba liderazgo, formacion como hoben- y hobennan adulto den comunidad cu lo traha na bienestar di comunidad.

E hobennan lo haci esaki sondeando e necesidad den e pueblo, den e barionan, den cada y asina aporta y duna e honor, amor, tempo y dedicacion pa ehecuta proyectonan innovativo cu ideanan unico cu ta sali di hoben pa hoben.

Poder pa Hubentud ta un proyecto cu a evoluciona cu tempo, el a cambia y tin desaroyonan cu a tuma luga durante e ocho añanan cu ya caba e proyecto aki ta existi. Croes a remarca cu nan por mira ideanan di e hobennan cu aña pa aña ta forma parti di e comision y di e grupo di boluntario, cu ta tuma tambe iniciativanan, ta trece dilanti ideanan y con pa e desaroya cada aña.

“Esey ta locual Poder pa Hubentud ta haci tambe. Scucha nan ideanan y trece nan dilanti y asina nos por mira e desaroyo di e proyecto riba su mes. Nos por conta cu cada aña cu nos mira e proyectonan cu ta ser realisa, con esaki ta bin dilanti y na unda e ta hiba e hoben den su mesun experiencia y den su formacion”, Croes a subraya.

E edad pa hobennan participa den e proyecto Poder di Hubentud ta di 15 aña pa 21 aña, esey ta e categoria di e hobennan cu e programa ta yena nan necesidad. Tin diferente forma cu por yega na aplica y nomina un hoben pa participa den e proyecto. E proceso di nominacion ta bay di manera cu un organisacion, persona of instancia cu tin hobennan activo den comunidad, cu ta duna nan tempo den trabounan boluntario of ta haci un of otro trabou den area educativo, tecnologia, arte, cultura of diferente area cu hobennan na Aruba ta activo.

Poder di Hubentud ta traha hunto cu e persona, organisacion of instancia cu tin experiencia cu e hoben aki, nan ta observa e trabounan cu e hoben ta realisa, acumula data y informacion pa asina determina si e hoben ta cumpli cu e e criterionan necesario.

Algo hopi importante cu Croes a enfatisa ta cu e persona cu ta yena e aplicacion y haci e nominacion, mester mantene esaki sorpresa y no bisa e hoben cu el a wordo nomina. “E bunita ta cu e hoben na un forma unico lo haya sa cu un persona ta admira e trabou cu e ta haci y a nomin’e pa e proyecto”, el a bisa.

Registracion pa nomina un hoben pa Poder di Hubentud a habri oficialmente ayera 12 di augustus y lo cera dia 26 di augustus. Despues di dia 26 di augustus lo pasa ariba tur e aplicacionnan cu a drenta pa asina haci screening pa e proyecto por continua

Jorzinho Schlipken Croes, ganador di Hubentud 2021 den e categoria hoben a elabora ariba e criterionan necesario pa un hoben por wordo nomina pa Poder di Hubentud. E criterionan ta como lo siguiente: un hoben cu a sobresali den un of mas area cu ta contribui na desaroyo di pais Aruba. Un hoben cu ta contribui, guia, motiva y aporta pa un of mas persona y ta haci trabou boluntario Un hoben cu ta haci impacto of ta trece un cambio positivo den comunidad. Un hoben cu ta activo den comunidad, un hoben cu tin disciplina y ta mantene respet pa su mes y otro. Un hoben ehemplar cu tin prueba di su trabou pa cual a ser nomina y cu ta capaz di adapta na tur regla di e proyecto.

Di su experiencia den e proyecto el a conta cu el a siña hopi di dje. “Mi a siña con pa traha cu hende, con pa yega na e meta pa traha hunto y traha un proyecto bunita pa nos comunidad y di esey mas y mas mi a usa e experiencia, e trabou y dianan cu nos a pasa ‘kinan”.

Jayleen Croes, ganadora di Poder di Hubentud 2021 den categoria hoben adulto a conta cu el a wordo nomina door di Cas Princesa Aruba. E no tabata sa di su nominacion y a expresa cu su experiencia tabata hopi leuk.

“Durante full e temporada di e proyecto mi a siña masha hopi mes y mi siña cosnan cu ainda mi ta aplica den mi bida diario. Mi encurasha tur hende cu conoce un hoben cu ta cumpli cu un di e criterionan please nomina nan. E ta un experiencia hopi bunita y ta yud abo crece como persona”, el a remarca.

Por ultimo, Vanessa Croes, lider di Poder di Hubentud, a felicita tur hoben, e comunidad hubenil di Aruba y e comunidad hoben adulto. “Masha pabien riba e dia di awe. E dia cu nos ta pone spotlight ariba cada un di boso nan, un capitulo nobo, un temporada nobo di Poder di Hubentud, pero sigur awe por ta bo capitulo nobo tambe”, el a finalisa.