Muchnanan ta hunga pa diverti y asina ta con nan ta desaroya tambe. Nan ta desaroya nan funcionnan motorico, nan creatividad, nan imaginacion, nan capacidad di pensa y nan ta siña descubri nan mes como persona. Esey ta e mision di Fundacion Hunga Teca, duna e muchanan e oportunidad pa desaroya den diferente area y siña a traves di hungamento.

Presidente di Fundacion Hunga Teca, Yamila Hoevertsz-Kock, ta splica cu Fundacion Hunga Teca ta un estilo di biblioteca unda e muchanan por bira miembro pa un costo di solamente cinco florin pa aña y nan ta fia un cos di hunga y cada siman nan por cambie. E fundacion ta concentra ariba cos di hunga educativo pasobra hungando un mucha ta siña masha hopi cos.

Na Aruba tin hopi mucha di menos recurso. Tanto na cas como na scol e muchanan no ta conta cu e cosnan di hunga necesario pa nan desaroyo. Hunga Teca ta sigura cu e muchanan aki tin acceso na e cosnan di hunga pa asina nan por cuminsa stima siñamento.

Hoevertsz-Kock ta sigui splica cu ora un mucha ta hunga e ta desaroya su parti motorico grof, coriendo, bulando etc. Ora un mucha hunga cu lego e ta desaroya e parti di e motor fini, pero banda di esey ora e ta hunga cu lego e ta desaroya su parti creativo, tambe su parti intelectual y e ta bira mas sabi. Ora cu un mucha hunga hunto cu otro mucha of su mayornan, e ora e ta desaroya su parti social, emocional. “Kiermen cu wega un mucha ta desaroya masha hopi aspecto den su desaroyo. Pesey nos di Hunga Teca nos ta enfoca ariba hunga y siña cu wega”, el a bisa

Durante nan actividadnan Hunga Teca ta siña e muchanan con hende grandi tabata hunga antes. Actualemnte cos di hunga ta hopi caro y antes mayornan tabatin hopi mas yiu, pesey e fundacion kier siña e muchanan cu pa pasa pret, hunga cu otro, desaroya mente, curpa, spirito, no tin mester di hopi placa, loke mester tin ta creatividad y tambe e amor di e mayornan cu ta hunga cu e muchanan.

Hoeverts-Kock a remarca cu Fundacion Hunga Teca semper ta exigi cu na momento cu e muchanan participa den nan actividadnan, e muchanan mester bin compaña cu un mayor pasobra e fundacion kier fortalece e circulo familiar.

“E mayornan ta traha y nos tur sa cu awendia mester traha hopi pero e tiki tempo di calidad cu bo tin pa dia, si ta cinco minuut of dies minuut, hunga cu bo yiu. Oma cu opa tambe tin un rol hopi grandi den e desaroyo di e mucha. Sinta abao hunga cu bo nieto, cu bo nieta”, el a agrega.

Hoevertsz-Kock a conta cu e muchanan ta haya e actvidadnan masha leuk mes y ta reacciona hopi bon. Como ex juffrouw di scol el a splica cu e mes a ripara cu hopi di e muchanan ta pasa hopi tempo riba aparatonan electronico, pasobra ora di hunga cierto wega, nan ta tambalaea pasobra nan no ta custuma di hunga e weganan ey. Pero na mesun momento e muchanan mes tambe ta ripara cu mas biaha nan hacie, miho nan ta bira den e tecnica. Esey tabata un reto chikito pa nan cu el a splica

“Mi mester bisa cu e funcionnan motorico grof mester haci mas na dje, mester haci mas wega. Deporte ta bon, pero haci wega cu e cosnan cu tin rond di cas”, el a enfatisa.

Diasabra awo Fundacion Hunga Teca ta bay tin un tayer di pintamento riba canvas, pa mas informacion por contacta nan a traves di nan pagina di Facebook. Hoevertsz-Kcok a menciona tambe cu Long Table Aruba a habri e votacion online ta duna un fundacion di Aruba e oportunidad di gana $40.000, na unda fundacion cu su video ricibi mas voto, ta e fundacion ganador di e gran premio.