(NLTimes) – Recientemente varios articulo a cuminsa circula unda cu ta sugeri cu come excremento di camel por yuda contra diarea. E supuesto terapia aki a hasta ser menciona den algun estudio medico.
Pa haya sa si esaki ta berdadero, nan a importa excremento di camel for di Egypto. Nan conclusion ta cu bo no pro cumpli nada contra diarea pa medio di usa extremento di camel.
Segun e articulonan, soldaatnan Aleman a trata diarea exitosamente cu excremento di camel na Africa durante e di dos Guera Mundial. Segun e storianan, e soldaatnan a copia e remedi for di Bedouin, ken a tuma e “medicina” lo mas fresco posibel pa asina por haya e miho resultado. En todo caso, si e soldaatnan aki a haci esaki no ta relevante, mirando cu esaki no lo a yuda den nada segun e cientificonan na Amsterdam UMC y University of Amsterdam.
Excremento di camel ta contene e bacteria Bacillus Subtilis. “Tin indicacion cu e bacteria Bacillus Subtilis tin un efecto probiotico cu por yuda cu diarea. Esaki ta duna espacio pa crea un storia actractivo unda cu por alega cu Bedouin a usa excremento di camel cu ta contene Bacillus Subtilis pa trata diarea,” microbiologo Jurgen Seppen a splica. Sinembargo e cantidad di e bacteria presente den e excremento no ta suficiente pa genera e efecto desea.
“Nos por a detecta e bacteria solamente usando un tecnica hopi sensitivo. E estudio a mustra cu e concentracion di Bacillus Subtilis den excremento di camel ta comparabel na esun haya den excremento humano. Completamente insuficiente pa e efecto terapuetico.”
E metodo aki posiblemente no a existi en realidad, Seppen a bisa. E y su colega a examina no solamente e excremento sino e literatura tambe. “Tin un gran cantidad di literatura tocante e uso terapuetico di urina di camel, pero no tocante e uso di e excremento.” E excremento a ser mira pa prome biaha riba un sitio web Aleman cu desde e tempo di publicacion a bay offline.
Cu e resultado aki e cientificonan a bisa cu nan a logra demostra cu un “storia sin sentido cu ta zona bon y berdadero” por ser adopta rapidamente y comproba, hasta den literatura cientifico serio.” Tambe nan a desaroya tecnicanan den e estudio di excremento di camel cu nan lo por usa pa investiga e importancia di Bacillus Subtilis y otro bacteria den malesanan den intestino.
