Proceso pa huur camber lo simplifica na Eindhoven pa yuda studiantenan

(NLTimes) – E proceso pa huur un camber lo bira mas facil na Eindhoven cuminsando for di diaranson. E municipalidad ta spera cu esaki lo crea mas espacio pa studiantenan. Institucionnan educacional a haci yamado na residentenan di Eindhoven pa haci uso di e skema aki.

Studiantenan internacional en particular, ta haya dificil pa yega na acomodacion durante e añanan. “Den añanan recien, extra huur no tabata permiti na cierto parti di e ciudad pa preveni strobamento,” segun Alcalde di Eindhoven Mieke Verhees di Vivienda a splica.

“E skema nobo lo haci posibel pa doñonan di cas of huurdonan den asociacionnan di vivienda por huur un camber sin mester di un permiso den tur parti di e ciudad. Esaki por yuda e studiantenan haya un camber cu mas facilidad.” E idea ta cu pa motibo cu e huurdo principal tambe ta biba den e cas, tin menos probabilidad cu lo tin strobamento pa motibo cu tin mas supervision na e cas.

Nicole Ummelen, vice presidente di e hunta ehecutivo di Eindhoven University of Technology a expresa cu “nos region ta un di e motornan principal di e economia, y e crecemento fuerte aki ta nifica cu e industria tin un mester grandi pa ingenieronan adicional. Nos ta feliz di por train e ingenieronan aki, sinembargo esaki ta nifica cu nos mester mas camber disponibel pa e studiantenan. Nos, pa e motibo aki, ta haci un yamado na tur residente na Eindhoven cu tin un camber extra, pa huur esaki. Asina nan por genera un ingreso extra, haci un studiante feliz y yuda e region.”

Direcor Hans Nederlof di Fontys Hogescholen tambe ta positivo tocante e skema aki. “E ta hopi basico. Cada camber extra ta nifica un studiante extra.” Esaki ta e mesun punto di bista di union di studiante LSVb. “E ta excelente cu e municipalidad ta pensando riba crea mas vivienda pa e studiantenan,” president Joram van Velzen a expresa. El a enfatisa cu e ta permanece vital pa crea mas vivienda pa studiantenan “Biba hunto cu otro studiantenan ta hopi importante pa e desaroyo social, por ehempel.”

Instituto di conocemento Kences un biaha mas ta premira cu lo tin un escasez di mas o menos 26,500 vivienda pa studiantenan e aña aki. Den lunanan recien, varios universidad a conseha pa e studiantenan internacional reconsidera nan estudio si nan no por haya vivienda na tempo. Studiantenan internacional a cuminsa responde na yamado aki, mirando cu varios universidad ya caba ta mirando studiantenan retirando.