CUA ta ratifica nan preocupacionnan pa cu introduccion di BTW

For di momento cu Gobierno di Aruba a anuncia e futuro introduccion di BTW, diferente gremio a vocifera nan preocupacion pa cu esaki. Recientemente durante un conferencia di prensa e organisacion representando e gremio comercial, Comerciante Uni Aruba (CUA) a bolbe expresa nan preocupacion pa cu e posibel introduccion di BTW y con esaki lo afecta e gremio di comercio.

Francis Saladin, vice presidente di CUA, a indica cu e idea di BTW ta un idea bon y como comerciante nan ta di acuerdo cu BTW. Pero loke nan no ta di acuerdo cune ta con e ta wordo implementa, e porcentahe cu ta wordo usa y e momento cu e ta wordo implementa.

Saladin a remarca cu e conclusion di CUA ta cu BTW ta un concepto bon cu como comerciante nan ta di acuerdo, pero e problema principal cu nan tin cu BTW ta e tarifa di esaki. CUA y otro gremionan a bin cu e proposicion di un sistema di un tarifa di BTW di 10% maximo, pa tur cos, en bes di dos diferente tarifa y asina duna comercio tambe un oportunidad pa prepara pa implement’e.

“Pero si bo ta bin cu un BTW di 6% y 14% cada rato bo ta kita mas di pueblo, y ami por disfruta di mi entrada sin mester di mal gasta door di maneho malo di gobierno bo ta impacta nos bida y nos comercio directamente”, Saladin a agrega.

Di mesun manera, Frans Ponson, presidente di CUA, a ratifica cu BTW no ta algo malo. El a splica cu esaki lo yuda cu cumplimento, locual ta bay trece mas placa den caha di gobierno cu nan no ta contando riba dje. Pero segun Ponson ta subraya y manera CUA a yega di menciona caba, BTW ta un sistema cu niun comerciante na Aruba a traha cune y no ta algo cu por wordo implementa den dos of tres luna. “BBO mes cu tin mas cu 15 aña cu a implement’e, ainda tin comerciante cu ta hacie malo”, el a señala.

Gobierno di Aruba a indica cu nan kier implementa BTW na final di aña, pues entrante 1 di januari 2023 y na esaki CUA a responde cu a esey ta imposibel. El a enfatisa cu nan ta pro BTW pero nan kier pa e wordo implementa di e manera corecto.

El a recorda cu den pasado Comerciante Uni Aruba ta un di esunnan cu a vocifera nan opinion pa no hinca BBO den e prijs y aworaki esey por presenta otro problema. Ponson a splica cu hopi comerciante na Aruba, no tur comercinate el a enfatisa, cu tin BBO den prijs hinca caba, na momento cu BTW wordo introduci nan lo djis pone e BTW riba dje. “Pero esey ta pasa pasobra nan no ta scucha di nos y implementa e BTW no ta fasil”, el a remarca.

Ponson a comenta tambe cu den ultimo tempo nan no a tende ningun novedad ariba e introduccion di BTW, pero el a remarca cu nan no ta imagina cu gobierno ta bay implementa esaki entrante 1 di januari 2023. El a subraya cu si gobierno implementa BTW toch, manera el a menciona caba, lo tin e comerciante cu ta cana e caminda bon y ta bay haciele manera debe ser, pero tin tambe e 80% cu no lo hacie di e manera corecto.

“Nos mester stop di traha asina. Tur hende ta implementa algo of no. Mi no ta kere personalmente cu dia 1 di januari e lo bin, por ta e lo bin toch pero lo ta jammer si bo implement’e tur bruha y mitar di e comerciantenan no ta bay hacie bon toch”, el a agrega.

Ponson a indica tambe cu CUA no a reuni cu Minister di Economia ainda ariba e topico aki, pero segun informacion cu nan a ricibi, Minister di Economia ta haciendo un estudio ariba e inflacion cu BTW lo trece y segun nan a compronde e estudio no ta cla ainda.

El a comenta tambe cu nan no a papia cu niun hende di gobierno mes, informacion cu tin tocante e tema ta pa medio di e presentacion cu e gremionan a ricibi for di DIMP, pero for di gobierno mes, nan no a haya e detaye di e topico aki.

Durante su conferencia di prensa dialuna ultimo, Minister di Economia, Comunicacion y Desaroyo Sostenibel, Geoffrey Wever, a responde pregunta di prensa tocante e estudio ariba e inflacion cu BTW lo trece cu Ponson tambe a menciona. Minister Wever indica cu el a ricibi un update for di e profesor internacional cu ta yudando Aruba cu e topico aki. Pues e prome reportahe ta cla y ta planeando un presentacion e siman aki. E minister a sigura cu ora cu ta asina leu lo comparti e impacto di e estudio ey cu comunidad.

Pa loke ta e decision ariba e fecha di introduccion di BTW, si e ta di acuerdo cu esaki of no, Minister Wever a remarca cu e decision pa introduci BTW ta un decision di gobierno y esey ta nifica cu si e wordo introduci entrante 1 di januari 2023 e ta un decision cu e ta para su tras y si e no wordo introduci, tambe.

“E ta un decision cu nos cada un como minister mester ta di acuerdo cune. Nos ta colectivamente responsabel, pero tambe individualmente responsabel. Si nos dicidi di introducie nos lo mester para pa e consecuencianan di esey, pero nos no ta asina leu pasobra nos ta bezig cu e calculonan y combersacionnan ta andando ainda”, el a bisa.