(ElNacional) – Nicmer Evans, presidente di Movimiento Democracia e Inclusión (MDI) y precandidato pa e eleccionnan primario di oposicion Venezolano, a propone cu e recien huramenta presidente di Colombia, Gustavo Petro, lo por ta un factor clave y determinante pa e proceso di negociacion relaciona cu e condicionnan electoral na Venezuela y en general cu e paz di e pais.
Refiriendo cu Petro ta un actor importante cu e administracion di Nicolas Maduro, Evans a opina cu e mandatario di e pais bisiña lo por bira un facilitador pa na Venezuela por tin eleccionnan liber y transparente y na mesun momento un mediador den e proceso di negociacion entre e oposicion y oficialismo. El a hasta comenta cu na luga di Mexico, e proceso por tuma luga na Colombia.
Den un rueda di prensa, e aspirante presidencial a probecha pa exigi e gobierno nobo Colombiano pa no bandona e procesonan di investigacion y transparencia den relacion cu e situacion cu ta existi cu e empresa Monomeros.
“Ta importante cu e tema di e situacion di maneho di Monomeros keda cla, no solamente den e ultimo añanan si no den e ultimo decadanan den relacion cu e transferencia y uso adecua di e recursonan y cu tin pronunciacion cla di parti di e gobierno di Gustavo Petro”, Evans a indica.
E politico tambe a toca e tema di e reestablecemento di e relacionnan comercial, señalando cu solamente e reactivacion formal y no clandestino di e frontera entre e paisnan ta nifica un circulacion di miyones di dollar pa e dos paisnan. “E reactivacion aki sin duda lo faborece henter e comunidad Colombiano y Venezolano cu ta na e frontera”, el a bisa.
Evans ta considera impredecible for di e punto di bista politico e reestablecemento di manera inmediato di e relacionnan consular mientras ta reestablece e relacionnan diplomatico entre ambos pais.
