Faltando par di dia pa Parlamento habri back y cuminsa cu periodo prome cu fin di aña 2022 despues di reces cu a cuminsa desde 9 di Juli y preparacionnan ta andando pa sigui cu tur loke mester regla. Entre otro algun topiconan manera ‘huishoudelijke regels’ nobo pa atende cu tur cos den parlamento, unda prensa tin cu situa nan mes y mas punto.

Lo tin tres reunion publico na caminda cu segun presidente di Staten tin prioridad na momentonan aki cual ta presupuesto di DOW cu tabata laat, reunion pa trata ley pa Raad van Advies y Half Jaar Raportage.

Presidente di Staten, Edgard Vrolijk ta bisa cu den agenda tambe ta para aprobacion di cierto cambionan
di e ‘fractie ondersteuning regeling’ mes cual ta loke ta Caso Diamante, parlamento a trah’e y haci cambio a base di conseho di CAD y awor djis falta ultimo aprobacionnan riba dje pa cera e capitulo aki.

Codigo di Conducta tambe tin un concepto traha pa sr. Vrolijk kende ta bisa cu ta keda na parlamentarionan pa sigui traha riba dje, cual ta un mocion cu nan a traha y mester bay den comision. “E ta den nan man, mi a yuda nan un tiki pero e ta keda den nan man,” segun Sr. Vrolijk.

Bayendo pa luna di September lo atende cu e Half Jaar Raportage. Na 2017 un mocion a wordo pasa na unda ta indica cu tur mita aña gobierno di Aruba ta duna cuenta na Parlamento unda nan ta para. Esaki ta un reunion hopi importante segun sr. Vrolijk pasobra aki por hiba un control riba gastonan, cuanto placa a wordo gasta y kico por premira pa e siguiente lunanan nos dilanti. Si tur cos ta bon segun Sr. Vrolijk, ya presupuesto ta den gobierno su man y ta proyecta pa yega 1 September, Parlamento lo haya su tempo pa prepar’e y pa October esaki lo por wordo atendi. “Pues despues di hopi tempo bo lo haya un presupuesto cu lo wordo pasa trempan,” segun presidente di Staten.

Lo bin un OV di Raad van Advies cual ta un ley pa duna Raad van Advies mas autoridad. Ultimo siman di September lo tin IPKO y naturalmente ora di bin back ta spera di por atende cu e reunionnan pa loke ta e Suppletoire Begroting basta trempan cu mester pasa prome cu e presupuesto, y sperando wak kico mas ta drenta. Fecha di reces lo ta 16 di December cual kiermen cu Gobierno tin cu percura pa tur cos ta na ordo.