(AP) — E prome presidente iskierdista di Colombia a keda huramenta den su cargo ayera, cu e promesa di cobati desigualdad y duna apertura na un cambio clave den historia di un pais marca pa un guera largo entre gobierno y guerrilla.
Sen. Gustavo Petro, ex-miembro di guerrilla M-19 di Colombia, a gana e eleccion presidencial na juni, derotando partidonan conservador cu a ofrece cambionan moderado na e economia pro-mercado, pero a faya di conecta cu votadornan frustra pa aumento di pobresa y violencia contra lidernan di derechonan humano y gruponan ambientalista den areanan rural.
Petro ta parti di un grupo cada bes mas grandi di politiconan iskierdista y marginadonan politico cu ta bin ta gana eleccion na America Latino desde e pandemia, cu a haci daño na incumbentenan cu a lucha contra su efectonan.
E victoria di Petro tambe tabata excepcional pa Colombia, unda votadornan historicamente tabata duda pa sostene politiconan iskierdista kende hopi biaha tabata wordo acusa di bay suave pa cu crimen, of di tin aliansa cu guerrillanan.
Petro, 62, a priminti di combati e desigualdad social y economico di Colombia door di reforsa gasto den programanan anti-pobresa y aumenta inversion den areanan rural. El a describi politicanan anti-narcotico, lidera pa Merca – manera a eradicacion formal di cultivo ilegal di coca – como ‘un gran fracaso’. Pero el a bisa cu e lo kier traha cu Washington ‘como igualnan’ pa construi schemanan pa combati cambio climatico of trece infrastructura den areanan rural unda hopi agricultor ta bisa blachi di coca ta e unico cultivo viable.
Petro tambe a forma aliansanan cu ambientalistanan durante su campaña presidencial, y a priminti di converti Colombia den un ‘poder global pa bida’ door di reduci deforestacion y tuma stapnan pa reduci e dependencia di e pais riba combustiblenan fossiel.
