E filosofo Frances Charles Montesquieu (1689-1755) tabata e inventor di e doctrina di e tres podernan, miho conoci como e Trias Politica. Segun su teoria, e estado mester ta acomoda di tal forma unda e tres poderenan ta separa for di otro. Y consecutivamente pa e debido controlnan tuma luga. E Trias Politica ta dividi den e poder legislativo, e poder ehecutivo y e poder hudicial. Y asina garantisa cu e podernan no ta den man di un solo persona of un organisacion.

Lamentablemente cada bes ta mas obvio cu e podernan no ta independiente for di otro. Loke Pueblo por a ripara cu desde un inicio di e formacion di Gabinete Wever Croes II e miembronan di Parlamento cu ta sostene gobierno ta apoya e gobernantenan ciegamente na luga di cumpli cu nan trabou di ta sirbidor di Pueblo y defende na tur momento e bienestar general di Pueblo.

Transparencia un palabra masha uza door di e Mandatarionan y Parlamentarionan di coalicion, pero cu solamente ta aparece den nan diccionario. Ta un lastima cu e representantenan di Pueblo aki no ta pone esaki den practica pa cu e Pueblo y mucho menos ta vigila y salvaguardia e bienestar general di e Pueblo. Ta bisto pa un y tur cu e Parlamentarionan di coalicion no ta e representante nan di Pueblo sino nan ta e extension di e Gobierno aki.

E Parlamentarionan cu ta sostene Gobierno ta dispone di tur informacion facilita door di e Mandatario(nan), mientras oposicion no ta ricibi tur informacion of ta ser informa via canalnan indirecto. E discriminacion aki pa cu oposicion ta liña recto contra transparencia y bon gobernacion.

Pa un Parlamentario por haci su trabou debidamente e mester ta dispone di tur informacion pa asina e prepara su mes y forma su postura propio durante reunionnan. Ta hopi remarcabel pa mira cu coalicion ta sostene concepto di Leynan sin importa nan e consecuencianan cu esaki tin pa nos Pueblo. Nan ta simplemente complace e Gobierno actual ya cu si nan no haci’e,esaki lo por tin consecuencia pa nan.

Algun desaroyo absurdo cu por a tuma nota di dje den prensa ultimamente ta cu e Parlamentarionan cu ta sostene Gobierno a perde nocion di kico ta nan tareanan como Parlamentario y a dicidi di un tras di otro gradici, elogia y hasta labia e Mandatarionan.

Pa duna un ehempel concreto, riba 18 di juli ultimo a dicidi di haci un fanfaria unda cu e Mandatario cu tin Fundacion di Loto pa Deporte bou di su encargo a anuncia cu a logra bolter e contract cu Canadian Bank Notes na beneficio di Aruba. E parti mas peculiar ta cu e anuncio no ta basa riba berdad, paso e negociacion apenas a inicia despues di e anuncio di e Mandatario.

Si como representante di Pueblo berdaderamente bo ta ehecuta bo tarea di control mane mester ta, bo no lo fungi como un extension di e Gobierno y tampoco como relacionista publico, pero den nomber di Pueblo bo mester a dirigi preguntanan cardinal na e Mandatario di deporte.

Entre otro:Manda Parlamento e supuesto contract nobo, Kico concretamente e renegociacion aki ta encera na benificio pa Pais Aruba en general y pa e deportistanan Arubano en particular?,E renegociacion di e contract a costa Pueblo di Aruba placa?,Pueblo di Aruba mester paga multa pa bolter e contract firma cu Canadian Bank Notes? Si ta asina, cuanto e multa aki ta?

Pero colmo de los colmos ta cu niun di e Parlamentarionan di coalicion kier a duna nan punto di bista pa loke ta trata e aumento substancial di tarifa di awa y coriente. Mucho menos nan a sali den koor pa felicita e Minister encarga cu utilidad, cu a luci un bes mas pa su ignorancia riba e tereno di energia, ya cu e no a duna aprobacion pa ‘hedge’ y tambe el a permiti pa WEB Aruba NV den 7 luna transforma di un compania financieramente saludabel (cu un reserva di riba 150 miyon) pa uno decayente (financieramente den cora)

Tampoco niun di esnan di coalicion a haci nan maximo esfuerso pa ta INTEGRO cu Pueblo y informa Pueblo cu unanimamente nan a vota CONTRA di e mocion #17 di MAS, AVP y ACCION 21, durante e tratamento di Presupuesto 2022.

Ehecutivonan di WEB Aruba NV a duna di conoce na Parlamento cu si Utilies Aruba (UA) y Gobierno di Aruba a aproba e peticion di WEB Aruba NV pa ‘hedge’ na December 2021, e aumento lo tabata solamente 5 cent entrante januari 2022 riba e tarifa di coriente pa kWh y cu no lo tabatin necesidad algun pa aumenta tarifa di awa. Atrobe nos ta mira cu pa motibo di incompetencia y nepotismo ta nombra un persona cu no tin conocemento di e materia den funcion di director di UA y cu ta liga na gobierno, cu e unico resultado cu Pueblo mester bay paga un prijs hopi caro pa nan decisionnan anti-Pueblo.

Pa finalisa mi kier enfatisa cu e aumentonan substancial pa loke ta trata utilidad ta un echo hopi doloroso y e mas tristo di henter e desaster ocasiona door di mal maneho ta cu e Gobierno actual y nan teteronan den Parlamento kier pretende di drenta laman y sali seco. Pueblo spierta y no sigui permiti pa e Gobierno aki sigui pone boso paga pa nan mal maneho.