ELMAR ta preocupa cu aumento di tarifa pa particularmente negoshinan lo nifica cu nan lo busca nan propio forma di genera coriente, di fuentenan alternativo, y consecuentemente lo no cumpra (mes) hopi energia for di e compania. Esaki ta locual a sali afo di e analisis cu Econometrista, Herry Koolman a haci como parti di su conseho na Minister pa Asuntonan Economico mr. Geoffrey Wever (red. econometria ta usa teorianan economico y pa medio di matematica y estadistica ta busca relacionnan y ta haci pronostico economico).

E documentonan entre e Minister y companianan di utilidad recientemente a bay Parlamento y a bira publico.

Manera ta conoci, Minister Wever no tabata mucho contento cu WEB y ELMAR no a busca forma innovativo pa genera coriente y a keda mara na importacion di combustible. Pero e Minister tabata preocupa tambe pa e efecto inflatorio di e aumento di tarifanan. Ta basa riba e conseho di drs. Koolman cu e Minister a formula su condicionnan pa bay de acuerdo cu e aumento (red. condicionnan cu segun ELMAR no tin impacto legal pa e compania).

Segun drs. Koolman, inflacion na Aruba a aumenta cu 5.2 porciento na Mei y e aumento di prijs di awa y coriente lo tin un impacto continuo riba e aumento di costo di bida. Un aceleracion desproporcional di inflacion por conduci na un spiraal di prijs di salario, ya cu hopi CAO ta keda adapta despues. Particularmente acuerdonan di huur ta inclui adaptacion segun inflacion. Un inflacion halto temporario como tal por bira un aumento structural di prijs general, cu tur consecuencia negativo, drs. Koolman ta skirbi den su conseho.

Koolman ta bisa cu e inflacion cu Central Bureau di Estadistica ta publica ta e midi cu ta usa den contratonan pa aumenta prijs y salarionan periodicamente. Pa averahe, di e gasto total di hogarnan na Aruba, 12 porciento ta bay na awa (cuater porciento) y coriente (ocho porciento). Pues adaptacion di tarifa di awa y coriente ta un aumento directo di inflacion.

E experto den calculacion economico, hunto cu Utilities NV, WEB y ELMAR a analisa varios scenario pa determina un aumento di tarifa pa cobra e aumento di gasto di combustible. Eynan a mira e interes y continuidad di e companianan, hustificacion di e diferenciacion di prijs pa e clientenan diverso y consecuencia di inflacion. Ningun ta sirbi interes general. Pasobra e tarifanan di awa y coriente ta basa riba un asina yama subsidio crusa, unda esnan cu ta gasta menos ta paga menos. E sistema aki no ta yuda e operacion (financiero) di e companianan, cu tin e necesidad pa elimina esaki gradualmente. E resultado lo ta cu e decision aki lo aumenta e inflacion segun e forma cu CBS ta midi e.

Koolman a ilustra cu hala e aumento di e tarifanan na companianan en bes di hogarnan tambe lo afecta e poder di compra di ciudadanonan, ya cu e prijs di producto y servicio tambe lo aumenta. E efecto lo keda compensa di un parti pa medio di turistanan kendenan lo paga mas pa nan camber di hotel. Esaki lo no afecta e consumidor local. Koolman a enfatisa cu e motibo pakico ta enfoca riba e inflacion cu CBS ta calcula, ta pasobra esey ta crea e riesgo na aumento di prijs di contratonan mara na esaki.

Miedo pa generacion di coriente propio

ELMAR a indica durante e deliberacionnan cu aumento di tarifa lo por implica cu hogarnan, pero particularmente negoshinan cu ta paga un tarifa mas halto, lo busca forma pa spaar den consumo y busca nan mesun forma pa genera coriente. Particularmente si genera propio coriente pa medio di fuente alternativo ta mas barata cu cumpra di ELMAR. Si ELMAR mester bende menos coriente, e prijs fiho pa unidad ta bira mas halto. Ta a base di e punto di salida aki, ELMAR a argumenta cu e aumento di prijs pa negoshinan mester ta menos cu esun di hogarnan, ya cu ta companianan cu ta usa mas coriente por dicidi pa fuentenan alternativo di energia.

Pero Minister pa Asuntonan Economico a urgi pa e aumento afecta e hogarnan lo menos posibel. Pues mester a haci un evaluacion entre e ahustacion inflatorio di e aumento di tarifanan y e riesgo cu e negoshinan ta bay na gran escala pa fuentenan alternativo, cu ta haci cu a largo plazo coriente cu ELMAR ta bende lo bira mas caro ainda.

E scoge pa “menos” inflacion

A presenta diferente scenario y nan impacto riba inflacion, incluso locual finalmente a bira e decision, esta un aumento general di tur tarifa di 23.9 porciento cu tabata esun cu menos impacto inflatorio, esta di 2.7 punto porcentual.

Tabata drs. Koolman a conseha pa cambia e structura di prijs di awa y coriente di forma temporario pa por transiciona e periodo di aumento di prijs extremo pa despues bolbe evalua e sistema di prijs pa atende cu e sistema di subsidio.

E posicion di salida di ELMAR sinembargo ta hopi precario pasobra ta negoshinan mester compensa e gastonan di coriente di hogarnan. Un aumento di prijs lo trece cambio di consumo tanto cerca e ciudadano como compania. ELMAR a bisa di lo monitor e situacion pa interveni na momento apropia, ya cu cambio di consumo y generacion di coriente propio di parti di negoshinan por tin un efecto pa e stabilidad financiero di e grupo di Utilities. Por hisa e suma fiho cu tur hende mester paga cu por cubri cierto riesgonan, pero no por anticipa con e consumidor ta bay reacciona.

Como tal, drs. Koolman a bisa cu solucionnan ta un structura di tarifa mas balansa, esta diferenciacion den e suma fiho na e capacidad di coriente. Di e forma aki por cubri e gastonan fiho na un forma mas socialmente balansa. Tambe mester elimina e dependencia di combustible, y amplia e fuentenan di energia alternativo. “E crisis actual riba mercado di petroleo por nifica un aceptacion social pa energia di biento centralisa y mas barata. E tempo ta awor,” Koolman a bisa Minister Wever. “Tambe a bira tempo pa ELMAR modernisa su polisa general di distribucion.”