‘Gobierno ta politicamente responsabel pa maneho cu empresanan di pueblo ta hiba riba awa y coriente’

Manera Bon Dia a publica e siman aki, Diamars mainta e sindicatonan uni a sinta hunto cu minister Glenbert Croes y Utilities, WEB y Elmar unda cu e ponencianan a wordo treci dilanti den cuadro di e aumento di awa y coriente. Sindicatonan tambe a trece nan ponencianan pa dilanti, mescos cu a describi den nan carta, cu e aumento aki lo ta desastroso den e parti financiero pa e ciudadanonan. Aki dos siman a palabra pa nan tur bini hunto na mesa atrobe.

E sindicatonan uni ta keda para riba nan punto cu e aumento aki lo ta desastroso no solamente den e parti financiero pa nos comunidad, pero sigur den e parti mental y problemanan social cu tambe lo aumenta. E situacion ta cu no ta compronde con ta bini cu decisionnan asina di un dia pa otro, segun sindicalista Josephine Albertus di SIMAR ta splica Bon Dia. “Nos a haci un peticion pa nan bay haci nan ehercicionan pa wak kico por wordo haci y nos a palabra cu aki dos siman lo bin back na mesa cu otro pa wak kico di e peticion cu nos a trece paden nan por a honra,” segun Sra. Albertus.

A vocifera fuertemente riba e parti social, pa e pensionadonan por ehempel, unda cu sindicato OPPA tambe tabata hunto cu nan y ta sinti e presion deplorabel cu esaki lo tin riba ciudadanonan. E sindicatonan a haci tur nan preguntanan y urgi nan tambe pa wak kico por introduci pa cosnan ta mas fiho, anto tambe un caminda unda esnan cu tin e fastioso financieramente por bay meld pa ‘situacionnan no bay escala,’ segun sra. Albertus ta splica.

Tin preocupacion pa e falta di ‘Hedging’ y e hecho cu diripiente awo companianan no tin reserva y ta perdiendo miyones. Den “Motie no.16 di Staten van Aruba” 31 Maart 2022, na punto no.5 di e mocion ta para ‘Compania WEB a dicidi pa aña 2022 NO ta ‘Hedge’ e prijs di Fuel Oil [FO] contra cualkier posibel aumento di prijs di FO riba mercado internacional, cu consecuencia cu e prijs di FO cu WEB lo mester cumpra posiblemente tambe lo ser aumenta.

E sindicatonan ta bisa cu Gobierno ta politicamente responsabel pa e maneho cu empresanan di pueblo ta hiba riba tanto di awa y coriente. “Pueblo tin cu carga culpa pa fayonan di otro?” segun e sindicatonan ta expresa, concluyendo cu na final, Gobierno y companianan estatal a keda di bay analisa loke nan a trece pa dilanti. Sindicatonan ta spera cu por bin na algo positivo ora di sinta bek na mesa aki dos siman.