Ta importante pa cuminsa pone e topico di sclavitud riba mesa. Pancho Geerman actualmente ta director interino di Museo Arqueologico Nacional Arubano y tabata presente na Nicolaas Store unda cu tabatin un intercambio di conocemento riba sclavitud entre Corsou y Aruba.

Actualmente tin un desaroyo di 20 /30 aña cu mas y mas ta reconoce e topico di sclavitud pa Aruba. Tipo di lecturanan asina ta algo hopi positivo pa sinta papia y dialoga cu otro. Sinembargo Dr. Artwell Cain a trece e historia di sclavitud den contexto di reino Hulandes. Esaki ta pone anos como isla den Reino Hulandes mester realisa cu Corsou tabata e centro di administracion colonial unda cu un tempo Paramaribo tabata e centro.

Unda cu tin un centro di administracion colonial tin un otro desaroyo cu esunnan cu ta pafo di centro. Segun Pancho Geerman e no lo trece confusion, den e sentido cu Aruba mester reconoce e echo prome, dus tur caminda cu tin centro di colonisacion e ta nifica cu e capital di e Pais tin su efectonan, esaki ta conta tambe pa desaroyo di e colonia na unda cu e administracion colonial ta ubica ey ta caminda ta haya cierto desaroyo na unda cu e colonisado ta hopi presente.

Segun Pancho Geerman semper ta bon pa sigui haci investigacion di historia. Echo ta cu tin metodo di historia di Aruba na scolnan pero tin generacionnan cu nunca no a haya historia di Aruba, Segun Pancho Geerman e mes como un studiante di Golegio Arubano di aña 1967 pa 1974 no a haya esaki, pero tampoco e no a keda treci den scol basico e tempo aya tampoco. Esaki kiermen cu tin hopi generacionnan cu no a haya e conocemento di Aruba basa riba hechos. Aki ta caminda cu tin hopi trabao pa traha riba dje.

Segun Pancho Geerman na momento cu ta trata di esclavo y indjannan, basicamente e conocemento cu nos tin ta indjannan a bin Aruba y nan tabatin vinculo cu tera firme entre Venezuela y Colombia.

Aruba realmente como isla ta un isla di migrante prome cu Cristo y e parti di sclavitud mester mira mas di cerca e echo cu Aruba no tabatin un fuente economico manera Corsou tabatin un centro di administracion y Boneiro tabatin salo na unda cu tur e partinan aki tin influencia riba nos historia.

Sinembargo awendia tin accesibilidad di internet y na unda cu biblioteca nacional tin hopi material, den e caso aki e punto ta pa busca informacion y esey ta nifica cu no mester haye den scol of via di un sistema, pero na momento cu ta interesa por busca informacion porehempel na biblioteca nacional, pero e realidad ta tambe cu den e forma ey e no ta wordo treci padilanti den un forma sistematico y aki ta caminda cu mester traha riba dje den diferente nivel.

Si cuminsa na scol basico esey ta un fundeshi, pero e pregunta ta keda con ta trece e historia den un pakete moderno, esaki ta nifica cu pa cada epoca tin un otro materia pa trece padilanti. Aruba su prome habitantenan ta data mas of menos 1500 prome cu Cristo y ainda no tin hopi hende cu sa e parti aki.

Sinembargo loke cu tambe ta un realidad ta entre mas cerca bo ta di historia mas bo ta corde ultimo tempo, por ehempel cuanto di nos tabatin e privilegio di conoce nos wela y bisawela, asina bo por imagina cu mas leu bo bay mas dificil historia ta bira, esaki ta e situacion di Aruba actual unda cu un gran parti di nos historia a keda skirbi di esunnan cu por a skirbi, pero hopi historia tabata oral tambe.

Segun Pancho Geerman si te ainda tin hende ta move entre tera firme entre Colombia y Venezuela cu Aruba nos tin hopi hende cu no ta registra y imagina den e epoca aya cu algun persona so tabata registra. Loke ta importante ta cu semper mester tene cuenta cu realidad ta mas complica cu un hende por capta.

Nos tur ta descendiente di migrante, pero e pregunta ta con abo ta biba diariamente. Tin un discrepancia enorme pa papiamento unda cu hopi di nos no a haya esey na scol, pero cuanto profesional realmente ta haci uzo corecto di papiamento, cuanto di nos como figura publico cu ta bisa cu nos ta Arubiano real, legitimo ta haci uzo di Papiamento?

No ta posibel cu ta predica algo y ta actua otro. Influencia semper lo haya pero esey no kiermen necesariamente cu e kiermen ta malo, pero e pregunta ta kico ta loke nos ta duna balor y si nos ta duna papiamento balor. Pancho no ta kere cu e parti aki ta depende di e inmigrante of no , pero ta depende di e persona kico e ta duna balor. Aki ta caminda cu nos tur mester ta mas consciente tambe kico kiermen historia di Aruba.

Tambe kico ta historianan mito y kico ta realidad aki ta caminda cu mester haci hopi investigacion cu ainda mester ser haci y na momento cu e resultadonan ta conoci plama e informacion.

Aruba tin elementonan, pero cada biaha ta haya informacion nobo. Na Aruba berdad nos tin necesidad di tin un bista amplio di e prome habitantenan y te dia di awe, esey nos como pais no tin’e bon presenta ainda di un manera basico y simpel cu ta accesibel pa tur gruponan.