Geoffrey Wever riba hecho cu ELMAR (y WEB) no a transiciona mas lihe pa fuentenan alternativo di energia

Gobierno a duna ELMAR e luz berde pa hisa prijs di coriente pa un periodo di seis luna, pero den tres luna mester tin un plan con ta transiciona pa fuentenan alternativo. Asina Minister Geoffrey Wever a informa ELMAR dia 21 di Juli, ora cu a bira conoci cu mester aumenta tarifanan di coriente.

Pero e Minister no tabata contento cu ELMAR y a bisa cu e aumento di 24 porciento riba tarifa di tur categoria di coriente ta afecta e aspecto di subsidio pa gruponan vulnerable, ademas cu WEB y ELMAR no a haci suficiente pa transiciona pa energia alternativo, e Minister a bisa den su carta.

WEB y ELMAR ta 90 porciento dependiente di heavy fuel oil, HFO y Minister di Asuntonan Economico mr. Geoffrey Wever ta considera cu esaki ta inaceptabel. Den opinion di e Minister, concesion cu ELMAR tin ta bisa cu tarifanan ta keda determina y cambia den acuerdo cu y despues di ricibi aprobacion di e Minister pa Asuntonan Economico. Aumento ta unicamente posibel, si e mandatario ta considera esaki hustifica. Ademas e Minister tin e derecho pa determina si ELMAR ta capaz di cumpli cu condicionnan di prestamo pa su programa di presupuesto y inversion cu ta aproba pa e hunta di comisario y accionista. A pesar di a pidi pa e cifranan, e Minister tabata di opinion cu no a brinda e datonan necesario pa e por a aproba aumento di tarifa.

HFO

Tanto WEB como ELMAR ta den e posicion precario pa motibo di e prijs di HFO, a pesar di e intencion pa acelera e transicion pa energia alternativo. “Mi ta hopi desapunta cu no a tene suficiente cuenta cu e urgencia pa promove e transicion pa energia alternativo y stimula e uso particular den interes di economia y consumidor,” e Minister a bisa den su carta, unda el a mustra cu netamente e pandemia a ilustra e vulnerabilidad di Aruba pa motibo cu tur producto mester ta importa. Consecuentemente comunidad di Aruba a keda afecta tambe pa e prijs di combustible cu ta bay nifica mas aumento di prijs, cu ta pone mas presion ainda riba famianan vulnerable.

“Usuarionan awor ta confronta cu e costo real di electricidad. Pues, e hogarnan lo ta mas impacta pa e aumento di tarifa, cu por conduci na un inflacion di 30 porciento. Ademas, e ta nifica cu aumento drastico di e gasto pa haci negoshi. Companianan lo mester hisa prijs di nan productonan cu un spiraal inflatorio como resultado.”

Tampoco Wever no ta compronde con no a mira e urgencia pa pasa pa fuentenan alternativo pa awor laga e prijs di combustible impacta e poder di compra di comunidad, los di e hecho cu tambe lo spaar den divisa cu awor ta sali pa cumpra HFO.

Ademas cu kier evalua e pasonan cu ELMAR ta tuma pa pasa pa fuentenan alternativo, e Minister tambe kier pa aumenta e capacidad maximo actual cu ta permiti pa hogarnan mes produci energia (solar panels y molina di biento), expansion di capacidad pa warda energia riba e red mes; corta e tempo cu DTI y ELMAR ta tuma pa aproba sistemanan solar y biento di casnan y negoshinan y ehecuta un evaluacion interno pa baha gastonan operacional di ELMAR structuralmente, pa aumenta eficiencia.

Reaccion ELMAR

Director di ELMAR Sr. Anthony Irausquin di otro banda a reacciona por escrito bisando cu e decision pa aumenta tarifa tabata uno tuma basa riba un proceso cauteloso, unda a tene cuenta cu interes general, pero mas tanto na interes di e compania. ELMAR como compania di estado, no ta primeramente responsabel pa fortifica economia of haci esaki duradero. “A cuminza cu e proceso pa transiciona pa energia alternativo, pero realidad ta cu esaki ta un proceso cu ta tuma tempo. Hasta paisnan mas desaroya ta confronta e reto aki,” Irausquin a bisa den su carta.

Irausquin a bisa tambe cu a pasa e aumento di tarifa pasobra e tabata urgente. “E interes di Minister pa Asuntonan Economico pa evita inflacion no por pisa mas cu e interes di e compania. ELMAR mester tene cuenta cu e reglanan di compania, su statutonan, bon maneho corporativo y tin obligacionnan financiero cu Minister ta bon familiar cune.”

Si mester laga companianan absorba mayoria di e gastonan, manera Minister a bisa, e efecto inflatorio lo no bira menos, al contrario segun Anthony Irausquin. Mas ainda, e proposicion di ELMAR inicialmente tabata pa mantene e sistema di ‘subsidio cruza,’ esta cu esun cu ta gasta mas ta absorba mas di e gasto total di coriente. Sinembargo, segun e carta, a yega na e aumento di tarifa basa riba negociacion cu e Minister.

Irausquin tambe a bisa Minister Wever cu ni e concesion di ELMAR ni otro ley ta crea e posibilidad pa bin cu condicionnan pa duna aprobacion di aumento di prijs. “E autoridad di Minister encarga cu Asuntonan Economico ta hopi cla den articulo 7 inciso b y c di e concesion di ELMAR. Minister ta mara na aproba of acepta e cambio den tarifa pa asina ELMAR por cumpli cu su obligacionnan di pago (di prestamonan). Minister como tal no tin e base legal pa bin cu condicion pa aproba aumento. Motibo pakico a limita e autoridad di Minister encarga cu Asuntonan Economico tin de haber cu garantisa bon maneho corporativo y minimalisa metemento politico den maneho di e compania. Mas ainda, Aruba tin caba un Maneho di Energia na cual ELMAR, tanten cu e no ta afecta e compania, no ta opone na dje.”

Segun Director di ELMAR, e condicionnan cu Minister Wever a mara na aproba e aumento di tarifa ta temanan cu ta toca e Minister di Energia, kende ta representa Pais Aruba cu ta accionista di Utilities Aruba, cu di su banda ta accionista di ELMAR. “ELMAR lo considera e condicionnan como deseonan y lo discuti esakinan cu Minister pa Asuntonan Economico,” tabata e reaccion di Director di ELMAR.