Cumisando e luna di augustus riba dialuna mainta, sindicato Aduanero SADA, Sindicato SEPPA, SIMAR, SPA y OPPA a duna gobierno te cu diabierna 5 di augustus venidero pa mira con por adapta e aumento recien anuncia riba awa y coriente. E sindicatonan a haya un reunion cu minister Glenbert Croes awe mainta y ta spera un respuesta riba esaki.

Josephine Albertus, presidente di sindicato SIMAR ta splica Bon Dia Aruba cu e sindicatonan a manda un carta pa prome minister di Aruba na unda ta vocifera nan inkietud y preocupacion pa loke ta e aumento di awa y coriente cu a ser anuncia diabierna 29 di juli.

“Pasobra nos ta bisa cu e problemanan financiero cu e pueblo ta aden caba ta hopi halto, y pa wak aworaki atrobe ta bin cu un aumento di awa y coriente, cada biaha nos ta wak ta bin cu mas medida na pueblo ta alarmante y preocupante,” Sra. Albertus ta expresa.

Un luna pasa ora a bin cu e anuncio cu desde 1 di juli lo a aumenta awa so, for di e tempo ey sindicatonan a manda un carta caba. Despues e aumento a wordo posponi y awor a bin cu un otro cifra, diferente na esun introduci un luna pasa. Sindicatonan a pidi tambe un reunion cu WEB e tempo ey, a logra na haya un fecha pa e reunion pero despues esaki a wordo posponi, y ‘te dia di awe nos ta wardando,’ segun Sra. Albertus ta conta Bon Dia Aruba.

E sindicatonan ta mira cu por ehempel WEB, ni na prensa kier duna contesta concreto riba e aumento recien aki, pakico a bini cu anuncio di aumento na juli y despues hala esaki atras, y mas cu tur cos pakico no a sinta cu tur sindicato tambe prome cu yega anuncia e aumento aki na pueblo ‘zomaar’ asina.
E sindicatonan ta haya cu nan no por djis sinta y considera cu WEB su situacion ta precario, y acepta tur cos sin un splicacion drechi of un miho claridad riba e asunto.

“E aumento aki ta bay afecta tur cos, bo ta bay wak aumento den supermercado, tienda y mas. Pasobra tur cos ta bay wordo calcula pa e consumidor. Nos ta bisa e problemanan social cu ta halto caba, y esaki tambe lo bay sigui aumenta,” Sra. Albertus ta bisa. E aumento aki tambe lo ta un otro peso atrobe pa e pensionado. Ora cu aña bolter lo bini un BTW pa impuesto, cuanto e porcentahe ta ningun hende no sa ainda, pero esaki tambe lo tin un efecto riba e pueblo. Tur esaki e sindicatonan no por ignora y sinta man crusa sin vocifera nan preocupacionnan.

‘Gobierno tin cu tuma su responsabilidad’
 “P’esey nos no por sinta man mara, nos ta bisa pa gobierno bin cu un solucion pa e puntonan aki.” Mirando tambe e parti di Landspakket, e sindicatonan ta subraya cu ora cu gobierno a firma cu Hulanda na 2020 y bin cu un Landspakket, ta para cu Gobierno tin e responsabilidad pa cu e continuacion cu awa, coriente, gasolin y cierto puntonan di cuido. E sindicatonan ta bisa cu gobierno di Aruba tin cu tuma su responsabilidad y no por ta asina cu cada biaha ta simplemente bin cu medida pa pueblo.

“Como grupo di sindicato y organisacion di pensionado nos ta manda e carta aki pa gobierno y nos ta contento cu ya caba nos a haya un contesta,” segun Sra. Albertus. Pues mesora despues di a manda nan carta dialuna mainta, nan a haya un contesta di prome minister bisando cu el a pone esaki den man di minister Glenbert Croes. E sindicatonan a haya un invitacion pa awe, diamars mainta 2 di augustus pa 8or, y nan kier tende for di gobierno kico nan ta bay haci pa bin cu un solucion.

‘Ladronicia lo subi sigur’
 Vice Presidente di sindicato di Polis, SPA, Sr. Roland Maduro a subraya tambe cu un preocupacion sigur ta con hopi cos a bira mas caro caba, hasta impagabel pa hopi hende. “Esaki ta pone un peso tambe pa miembro di Polis. Pasobra unabes tur cos bira caro, hende lo busca toch manera pa hay’e, esey toch ta costa cada ciudadano nan privacidad y tambe ladronicia ta subi sigur, sin conta atraco,” segun Sr. Maduro. Semper ta dispuesto pa sinta cu gobierno pa bini cu posibel solucionnan pero segun e sindicatonan, casi nunca nan ta mira cu gobierno ta acerca nan of bati na nan porta pa yuda cu algo.

“E ta alarmante, nos di sindicatonan ta pone hopi atencion debidamente na esaki y ta pidi gobierno pa dialoga y yega na otro pa un miho solucion pa e pueblo aki.”