Parlamentario Hendrik Tevreden (MEP): E decision di Exit Strategy a duna resultado

Saliendo di Pandemia hopi hende tabata preocupa pa e decision cu e tempo ey minister Dangui titular den turismo a tuma pa activa e Exit Strategy. Tabata un tempo tenso pero cu a rekeri di un decision dificil pa lanta e economia turistico atrobe. Apesar di e risiconan cu tabata existi gobierno a scoge pa activa turismo atrobe y awe sigur nos ta cosecha ariba e decision aki.

Aruba su recuperacion di turismo ta excepcional y entre e miho paisnan di mundo. Pa e prome 6 luna nan di aña 2022 Aruba a ricibi 528.325 turista. Esaki ta un recuperacion di 92%.

Aruba su recuperacion di turismo pa 2022 te cu awor ta 92% (-8%), cual ta pone nos como un di e miho nan di mundo ariba e tereno turistico.

Mundo y Turismo

Recuperacion mundial ta na 46% (-54%). Recuperacion den nos region ta 60% (-40%). E cifranan aki ta demostra cu e calculacion di risico, curashi y determinacion pa anuncia nos “Exit Strategy” ora mundo tabata cera pa COVID-19 ainda na januari 2022 a resulta. Tur turista cu tabata biaha pa Aruba a sinti nan mes sigur cu Aruba su protocol nan medico contra COVID. Hasta cu algun turista a scoge pa keda mas largo na Aruba enbes di regresa nan mes pais mirando cu na nan pais e protocol di COVID no a funciona mesun bon. Nos tin di felicita aki nan tur e frontlinersnan cu a carga nos pais y e turista cu tabata bishita nos den e momentonan aki. Nan contribucion tabata vital y nos ta reconoce esey.

IMF a indica den nan comunicado cu: “Aruba moved very swiftly from the pandemic” ilustrando cu den comparacion global, Aruba ta un ‘frontrunner’ ariba e tereno aki. Esaki a resulta cu awe Aruba ta e di dos pais na mundo cu miho recuperacion di turismo.

Pa futuro

Aña 2019 tabata e miho aña di turismo den historia di Aruba, pa e motibo aki ta usa e indicador nan di aña 2019 pa por compara. Na juli 2020 Aruba su fronteranan aereo a habri atrobe. Y den e prome 6 luna nan, a ricibi 529.000 turista. Na april, mei y juni 2022 Aruba a surpasa e cantidad di turista cu a bishita nos na 2019 den e mesun luna nan. Y tur cos ta mustra cu di aki nan pa futuro, cu si no bini un evento similar na e Pandemia, nos lo surpasa e indicadornan di 2019. Pesey nos kier manda un felicitacion na Minister Dangui Oduber y tur e partner nan den e ramo turistico cu e esfuerso cu nan a haci pa nos por a activa e Exit Strategy, cu awe a duna resultado.