Buceo den e awanan cristal di Aruba ta den e lista di varios turista, sinembargo e mundo acuatico bao awa cu nos lama ta ofrece ta un tereno sumamente importante ora cu ta trata di e training di e miembronan di 2nd Reconnaissance Battalion di 2nd MArine Division, United States Marine Corps.
Marine Squadron Carib (MSC) basa na Aruba ta anfitriona su coleganan Mericano un biaha pa aña. Caribbean Coastal Warrior (CCW) su training di buceo recientemente a tuma luga un biaha mas, y Marine Corps a traha riba e profundisacion y ampliamento di e trabao den ekipo y cooperacion.
E experticio cu nan ta comparti durante e training e aña aki tabata mas tanto tocante buceo tactico. E bishitantenan Mericano a ricibi sosten di ‘frogman’ di Hulanda su Maritime Special Operations Forces (NLMARSOF). Nan a comparti nan experticio y tambe a provee ayudo na nan partner pa asina por eleva e nivel di e training.
E prome siman di CCW a concentra primeramente riba refresca e habilidadnan y conocemento basico, ambos di manera individual y den grupo chikito. Durante e siman aki, e buceo a tuma luga primeramente den awanan keto manera na Commandeurs Baai. Aki tambe pa prome biaha a train haciendo uso di Enhanced-Diving Propulsion Device (scooter bao awa). E ta un herment ideal pa e transportacion di ambos persona y ekiponan den distancianan largo bao awa.
Despues di e prome serie di buceo, e sesionnan a cuminsa tuma luga den gruponan completo di 6 persona. E sesionnan aki a consisti di bishita varios diferente sitio pa buceo pa asina e participantenan por experiencia diferente condicion bao awa, profundidad y forsa den e olanan. E periodo di training aki a conclui cu 2 buceo completo di Mission Profila, unda cu 3 ekipo di 6 homber mester a cumpli varios mision riba diferente lamanan. Nan tabata den diferente area manera sigura e lama, haci un simulacro di busca informacion, entre otro.
“Mientras mas training internacional tuma luga, miho lo nos por conecta cu otro ora di ehecuta operacionnan combina,” Capitan di Marines Fabian Schra a publica na ‘2 Recon’ como un oficial den e intercambio.
“Pa causa di e gran historia den nos colaboracion, como USMC y Marine corps e relacion ta uno di cerca. Nos ta mira otro como e partner cu nos ta prefera traha cune y pa medio di practica hunto, e colaboracion aki un biaha mas ta mira aun mas profundo y intenso.”
Apesar di cambionan den ambos unidad, segun Schra, bo por observa un desaroyo continuo den e colaboracion. “Y esaki ta mientras cu tin varios diferencia den training, ekiponan, planning y TTP (tecnica, tactica y procedura). Claramente nos tur ta comparti nos TTP, pa asina nos por siña di otro.”
“Loke nos ta yama Caribbean Coastal Warrior, e Mericanonan ta yama Aruba Dive Deployment For Training,” Schra a splica. “E training aki ta e otro parti di Caribbean Urban Warrior, cual ta un training anual cu ta tuma luga na Merca na Camp Lejeune situa na North Carolina cu accion den areanan urbano. Integracion y colaboracion semper ta keda central, ambos pa U.S Marine Battalion y pa nos MSC.”
Incidentalmente, e colaboracion aki ta tuma luga cu intercambionan cera, Schra a splica. “Nos ta sostene otro di manera igual. Tambe nos ta purba haya e cantidad mas halto di momentonan di integracion cu ta posibel, manera por ehempel intercambio durante training den winter, Joint Terminal Air Controller Training y e aña aki, por ehempel, durante e Military Tracking Course.”
Durante CCW 22, nos a mira mas capacidad compara cu e versionnan anterior,” Capitan di Merca Arthur Jonhson, comandante di Alpha Company a bisa. E ta hopi contento cu e curso di ehercicio na Aruba. “E instruccion di e buceadornan di Hulanda den NLMARSOF tabatin un balor inmenso pa e buceadornan di USMC. Durante e curso di solamente algun siman, nan a mehora grandemente nan habilidad tactico. Durante e ehercicio final, nos a uni forsa cu esunnan den MSC y a conduci varios diferente tipo di operacion y misionnan. E ehercicio tabata un exito y nos ta emociona pa sigui desafia y siña for di otro. Na mesun tempo, nos ta buscando mas manera pa colabora den scenarionan di training realistico.”
