Director Irausquin ta ilustra cu 20 porciento di tarifa di coriente mester cubri un sin fin di responsabilidad

Un total di 80 porciento di locual ELMAR NV ta genera ta bay pa WEB y e 20 porciento ta pa cubri gasto di operacion y tambe inversion den e red di coriente. Asina Director di ELMAR Sr. Anthony Irausquin a bisa durante e conferencia di prensa unda a anuncia aumento di tarifa di coriente.

ELMAR ta e distribuidor di coriente y ta haya mayoria di e coriente for di WEB cu ta hisa su prijs pa motibo di aumento di gasto di combustible. Asina cu e prijs di combustible a aumenta drasticamente, WEB y ELMAR a sinta hunto pa mira e siguiente paso y con pa ehecuta e aumento di tarifa di coriente di e miho forma. “Tur locual nos bende, como 80 porciento ta bay back na WEB. E demas, nos ta usa pa nos operacion.” E 20 porciento ta keda pa inverti den gasto di personal, pero tambe mantencion di edificio, e asina yama trafelhuisnan y e red entre otro. Segun Irausquin, e 20 porciento ta un suma hopi abao pa tur e trabaonan, y mescos cu WEB, ELMAR ta haciendo yen di ahustacion pa baha gasto, pasobra e modelo di negoshi ta hopi vulnerable. El a bira bisto particularmente durante e lockdown. “Ta yega momento cu nos tampoco por absorba e aumento y mester calcula e gasto den e tarifa.”

Mas ainda ELMAR mester inverti den e red (e grid) cu ta confiabel, y mester haci mantencion na 540 trafelhuis rond Aruba y haci cambionan den transformator y otro ekipo. Un di e retonan adicional ta e suministro di material pa por sigui cu e trabaonan di mantencion. “Na Sabana Blanco a inverti den un stacion nobo pa 10 miyon florin. E tabata mas di 40 aña, y mester a inverti pa contribui cu desaroyo di aeropuerto y e bario. Nos mester sigui inverti pa baha gasto den futuro.”

ELMAR, contrario na WEB, a aumenta tur categoria cu e mesun porcentahe, cu ta 23.9, cu ta practicamente 25 porciento. Pero asina mes, e Director di e compania ta enfatisa cu a sigui e modelo social, ya cu e sistema ta asina cu esun cu gasta menos ta paga menos tambe. “E aumento di prijs ta pa ELMAR por garantisa servicio optimal di suministro di coriente,” Irausquin a enfatisa. Pero a pesar cu ta considera e sistema di cobranza uno social, ta deliberando pa mira con pa trece cambio pa asina evita kico a pasa durante particularmente e prome lunanan di pandemia, unda ELMAR a mira un caida drastico den su entrada. ELMAR mester por conta cu un entrada fiho pa asina por haci su trabaonan, e Director a enfatisa. “Nos mester ta menos dependiente di entradanan variable.”

Pa tal motibo mes a cuminza baha gasto, danki na contribucion di trahadonan cu a bay de acuerdo pa freeze aumento, ademas cu a limita crecemento di personal a pesar cu e red mes a bira mas grandi.

Conscientisa con pa spaar

Tanto ELMAR como WEB ta consciente di e impacto di e ahustenan di prijs, aunke cu semper ta hiba campañanan di conscientisacion pa reduci consumo. Segun Asja Dongen, los di esey, e meta di WEB no ta pa solamente baha gasto di HFO, sino e uso di e combustible mes, cu ta contribui na daño di clima. Mester cumpli cu acuerdonan internacional pa baha e emision di CO2. Pa e motibo ey mes, WEB tin programanan pa medio social unda ta ilustra e strategia aki y ta urgi comunidad pa sigui esakinan.

Y mescos cu WEB a traha riba eficiencia pa baha cantidad di combustible, mescos ta necesario pa comunidad yuda. “Na Aruba, nos ta custumbra cu nos no conoce scarsedad di awa. Ta djis habri cranchi y ta haya awa. P’esey mester ta consciente di consumo di awa. Mas consciente un hende ta cuanto e ta usa, mas e ta bay spaar.” Dongen ta urgi comunidad pa haci uso di e calculador riba website di WEB pa determina kico ta usa na awa y con pa spaar.

Audrey Croes a bisa cu ELMAR tambe tin un calculador similar riba su website. “E averahe di consumo di coriente na Aruba ta 700 kilowatt uur (kwu) pa luna, compara cu 350 kwu pa hogar na Corsou. Pues tin espacio pa baha e consumo.” Si sigui e tipnan di ELMAR con por spaar coriente, no solamente e ta yuda cada consumidor, e ta yuda medio ambiente tambe, e relacionista publico di ELMAR a enfatisa.

Reserva WEB

Mester bisa cu Bon Dia Aruba a ricibi diferente reaccion despues di e conferencia di prensa, particularmente di personanan cu conoce e operacion y responsabilidad di Utilities Aruba y WEB. Por ehempel, Director di WEB, Alfredo Koolman, ir. a bisa cu WEB a absorba e aumento di prijs di HFO pa siete luna y esey a nifica cu a come den e reservanan di WEB y cu e compania ta den cora. Un observado a bisa Bon Dia Aruba cu e accionista, esta Utilities Aruba mester a cay aden, ya cu ta su autoridad y responsabilidad pa percura cu WEB no ta haya su mes den problema financiero.

Di otro banda, un otro observado cu conocemento di maneho financiero di Pais Aruba (su identidad ta conoci Bon Dia Aruba), a bisa cu el a scucha e conferencia di prensa cu hopi atencion, y ta haya yamativo cu a papia di e reservanan. “Pasobra nos nunca a mira e famoso reserva. Pasobra ningun (di e companianan, WEB y ELMAR) ta habri buki. Den caso cu Gobierno ta sigui ricibi dividend di e companianan ta nifica cu ambos ta haci ganashi. Si ta haci ganashi, anto e ora WEB y ELMAR mester por bisa cuanto nan reserva ta, y no por djis bisa cu esaki ta negativo.” E cuentanan anual di Gobierno lo demostra si WEB y ELMAR a paga dividendo pa 2021 y 2022 y e momento ey por determina si berdad a come den reserva of cu a hisa prijs pa sigura cu Gobierno ta sigui ricibi dividendo di nan, cu mas bien ta similar na aumento di belasting.

Otro fuente di otro banda a ilustra cu WEB y ELMAR mester tin un reserva di cash pa cualkier eventualidad. E suma ta aparece riba e cuentanan anual mas expansivo y no riba e version comprimi riba website di e companianan. E asina yama ‘cash reserve’ ta un exigencia di financiadornan y nan ta sigui paga dividendo pa medio di Utilities. “WEB mester a adapta su prijs desde e aumento drastico di combustible. Pero ta politica a wanta esaki. Pues e compania a cuminza come den su reserva cu tabata mas di 100 miyon florin. Awor e fondo ey a caba y nan ta den cora. Pues no sobra ningun otro opcion cu no ta hisa prijs.”.