Diabierna atardi a tuma luga un conferencia di prensa caminda e compania local Dyon Center NV a haci un donacion di 200 tas pa studiantenan den necesidad, como parti di nan proyecto di Back to School.
Dyon Croes, representante di Dyon Center NV, a splica cu e aña aki Dyon Center, conhuntamente cu un di nan proveedornan mas grandi ta haci donacion di 200 tas cual lo wordo dividi den dos instancia cu ta yuda e muchanan cu ta den necesidad. E instancianan aki ta Rode Kruis Aruba y Fundacion Pa Nos Comunidad (FPNC).
“Nos kier gradici e pueblo di Aruba pa e confiansa y e sosten den tur e añanan aki. Nos kier gradici tambe nos empleadonan pasobra sin nan esaki no lo ta posibel y desde awo caba nos kier desea e muchanan un feliz aña escolar nobo”, Croes a expresa.
Segun el a indica esaki no ta prome biaha cu Dyon Center ta haci donacion. Tur aña nan ta scoge diferente fundacion pa haci diferente donacion, pero back to school ta nan enfoke principal y nan ta enfoca ariba e futuro y muchanan di Aruba.
E 200 tas cu ta wordo duna ta completamente yen cu productonan di scol. E muchanan ta haya nan tas cu tur producto nobo necesario pa scol, pa asina nan cuminsa e aña escolar di e miho forma.
Fundacion Pa Nos Comunidad (FPNC), un di fundacionnan cu a ricibi 100 tas for di Dyon Center, ta e banco oficial di alimento na Aruba. E mision di FPNC ta evita y combati pobresa y ta promove participacion y bienestar general na Aruba.
Liandro Loopstok, coordinador di Fundacion Pa Nos Comunidad, a splica cu e donacionnan aki tin un nificacion hopi grandi pa FPNC mirando cu FPNC ta actua completamente ariba donacion desde cu e fundacion a cuminsa na 2009.
Loopstok a indica cu FPNC tin un sistema cu na momento cu e mayornan registra na e fundacion, nan ta registra hunto cu nan yiunan y asina e fundacion ta selecciona tur e muchanan cu ta registra cu nan. Nan ta tuma contacto cu nan pa wak kico ta nan necesidad, kico ta e materialnan escolar cu nan mester y FPNC ta yuda nan cu esaki.
“FPNC tin diferente proyecto cu ta enfoca ariba back to school y nan ta recolecta diferente material, por ehempel un famia por entrega un schrift y nos ta tuma esaki man habri, pasobra esaki nos ta trah’e den un pakete y entrega e paketenan na e muchanan”, Loopstok a agrega.
Rode Kruis Aruba, e otro fundacion cu a ricibi 100 tas yen di material escolar, no ta un fundacion desconoci pa su trabao humanitario y su boluntarionan ta conoci pa yuda cu diferente proyectonan rond di Aruba.
Lizmarie Kranwinkel, boluntario di Marketing na Rode Kruis Aruba, a expresa su gratitud na Dyon Center pa e bunita donacion cu nan a ricibi. El a tuma e oportunidad pa remarca cu Rode Kruis Aruba ta trahando directamente cu e trahadonan social di diferente scolnan di Aruba pa asina nan ta sigur cu e donacionnan cu nan ricibi y reparti ta bay na muchanan cu echt tin mester di dje.
“Mi ta haci un peticion na tur e trahadonan social cu ainda no a tuma contacto cu nos, pa por fabor manda nos un email na info@redcrossaruba.com pa asina nos por duna e informacion con pa yuda e muchanan aki”, el a enfatisa.
