Oasis Farm ta un bunita concepto, pero e tereno pazuid di e cas Pos Chikito 78 mester keda habri pa evita calamidad. Asina Director di DIP, dr. Haime Croes a bisa Bon Dia Aruba.
Ayera ehecutivonan di DOW y di DIP a reuni cu Sr. Rudsel Emer cu ta maneha Oasis Farm pa informa cu no por permiti e plantacion sigui riba parti di e tereno, ya cu esaki ta pasada di awa pa evita cu parti di Pos Chikito inunda ora di yobida fuerte.
Pa Emer, e no ta un splicacion cu ta zona logico, pasobra segun e experto den horticultura y agricultura, su proyecto no ta stroba e pasada di awa. Al contrario, e no a traha nada fiho riba e tereno y mas bien a usa palet y taira pa planta mata sin cu esakinan ta stroba fluho di awa. E problema mas grandi, segun Emer, ta e hecho cu Gobierno mes a permiti pa un ciudadano traha un swimmingpool den un gulido grandi na e area, conoci como Pos di Cabay. Ta ora cu a cera e buraco aki y a pone muraya, cu a crea problema di areanan unda awa ta keda para. Y Emer no a mira ningun esfuerso pa remedia e situacion y ta sinti cu ta bay net pa su proyecto cu tin un balor cultural y educativo enorme pa henter comunidad.
Rudsel Emer no ta doño di e cas, pero ta huur e cas y tereno rond di e cas pa Oasis Farm y como tres aña pasa a pidi e pida tereno di klip cu ta keda pazuid di e propiedad. Segun Emer, despues di varios carta y sin haya contesta, el a dicidi di cuminza cu plantacion. “Mi ta huur e cas y a usa e tereno rond di dje. Mi intencion tabata pa aplica e conocemento cu mi a haya na Brazil na Aruba tambe pa mira si aki ta logra cu agricultura.” Emers a bisa cu e tin un plantacion di vanilla na Brazil y a cuminza purba na Aruba pa mira si e ta logra, algo cu a sucede tambe.
Mester bisa cu Oasis Farm a cuminza pone taira riba e tereno specifico algun aña pasa, y e tempo ey, bisiñanan a hala atencion pa movecionnan. E momento ey a splica cu e tereno ta bay ta usa pa agricultura y cu ta tene cuenta cu awa ta pasa eynan ora di yobida fuerte. Tambe a splica cu a haci peticion na DIP pa por usa e tereno pa agricultura. “Nos mes a laga coba otro gulido riba nos mesun tereno,” Emers a bisa. “Pasobra hasta prome cu a cuminza pone mata riba e tereno den disputa, ya e cas tabata yena ora awa yobe duro.”
E prome peticion pa DIP a bay na 2016, y Emer no a tende nada. El a dicidi pa cuminza asina mes cu mata den taira, y despues riba palet y a filma henter e area cu un drone. Cu e video aki, el a bolbe acerca DIP na 2020 pa por haya e tereno formalmente. “Nan a haya e video, pero ningun hende a bisa cu mi no por sigui.” Emers ta bisa cu e no ta compronde si locual e tabata haci tabata ilegal, cu no a par’e prome y a laga e matanan crece y bira henter un produccion unda hasta hobennan di Centro Ortopedagogico ta bin traha cu nan. “Mi ta compronde cu mi ta fout di a tuma e tereno, pero mi no a construi nada riba dje. No a mara nada riba e tereno y e matanan ta crece riba e tereno. Por move tur cos cu ta riba e tereno. Pero pakico tur e tempo ey DIP no a bisa nada, si nan tabata sa kico nos tabata haci aki?”
Emer a bisa Bon Dia Aruba cu entretanto DIP a bay midi e tereno y a bis’e cu e no por haya e pida tereno mas. DOW di otro banda a informa Emer y Oasis Farm cu nan no tabata na altura di su actividadnan. “Esey ta imposibel. Imposibel cu DOW no tabata sa, pasobra e plantacion t’ey pa mas di tres aña caba y den e periodo aki a bin pone e pomp a saca awa na mas cu un ocasion caba.” Riba dje, e argumento di pasada di awa no mester conta pa e tereno specifico, sino pa Pos di Cabay, cu ta e buraco natural grandi cu tin net pabao di e tereno cu el a usa pa plantacion.
E vision cu e tin pa Oasis Farm ta pa crea e mesun tipo di plantacion cu tabatin antes na Fontein, unda tabata produci berdura pa comunidad. El a inverti den tecnologia osmosis pa por produci su mesun awa, pa asina e ta mas barata y e resultado tabata duna mas animo, particularmente ora cu hobennan di e Centro Ortopedagogico y tambe habitantenan di Maristella tabata pidi pa bin yuda. Es mas, Oasis Farm ta asina popular memey di mucha cu den e periodo di vakantie aki.
Como tal, e ta haya increibel cu no ta considera e balor di su proyecto, e sostenibilidad di dje y e importancia pa comunidad en general. Emer a bisa di a purba haya cita cu Minister di Infrastructura cu ta Prome Minister Evelyn Wever Croes, pero no a logra. E no tabatin contacto cu Minister encarga cu Agricultura, cu ta mr. Geoffrey Wever.
Pero pa DIP y DOW, e decision ta tuma. E area mester keda como pasada pa awa. E maneho di calamidad ta bay riba otro interes. Esey no ta kita cu no ta aprecia e esfuerso pa un proyecto berde asina y como tal, por lo menos segun dr. Haime Croes di DIP, asina cu haya un businessplan, lo mira con pa yuda Oasis Farm cu otro tereno. “Pero ami tin tur mi documentonan necesario y mi a skirbi carta na cantidad. Ami no kier problema, mi kier solucion,” Rudsel Ever a bisa. E ta convenci cu mester bin un solucion mirando e sosten cu e ta ricibiendo di turistanan cu ta kere den e proyecto y ta manda placa pa Oasis Farm lanta cabez atrobe. “Y mi ta conta cu sosten di hopi Arubiano cu kier pa e concepto unico aki sigui. E ta laf cu hende di afo y varios hende local ta kere den e concepto di Oasis Farm y Gobierno no. Pero mi no ta rabia, mi kier un solucion y pa nos tur enfoca pa haci e isla aki mas berde,” Evers a conclui.
Di su banda Director di DIP a bisa cu su tarea ta implementa ley y coregi asuntonan cu a bay robes y a reitera cu Direccion di Infrastructura y Planificacion lo coopera na momento cu haya tur documento di e organisacion. “Pero no na e luga specifico. Esey no. Calamidad ta un prioridad.”
