(DiarioLibre) – Comunidad di Caribe (Caricom) a sigura dialuna ultimo cu nan ta “sumamente tristo pa e perdida di e bidanan ariba lama” pa motibo di un naufragio cerca di e isla di Bahamas cu a conta cu e morto di 17 migrante Haitiano.
“E ultimo desaster aki ta pone den manifiesto un biaha mas e situacion desespera na Haiti y e caracter reprobabel di e accionnan di esnan cu ta probecha di e personanan cu ta purba huy”, e organisacion regional a denuncia den un comunicado.
Caricom a indica cu nan ta bay sigui traha cu Haiti y comunidad internacional pa hiba paz, seguridad y desaroyo na e nacion aki.
E grupo Caribense a extende su condolencia na e familiarnan di esnan cu a perde nan bida y na e Gobierno y e pueblo di Haiti, na mesun momento el a urgi pa e detencion y huicio di esnan cu ta probecha di e speransa di e personanan vulnerabel.
Gobierno di Bahamas a habri un investigacion despues di e detencion di dos ciudadano di e isla pa traficacion ilegal di persona.
Prome Minister, Philip Davis a condena e organisacion di operacionnan di contrabanda cu ta pone den riesgo bidanan humano y ta compromete e seguridad nacional y a adverti cu ta bay procesa e personanan involucra.
Di su banda, comisario di polis Clayton Fernander a bisa cu e dos homber cu ta bao custodia despues di e tragedia ta conoci pa oficialnan pa diferente delitonan.
Caricom ta un organisacion integra pa Anitgua y Barbuda, Bahamas, Barbados, Belice, Dominica, Granada, Guyana, Haiti, Jamaica, Montserrat, San Cristobal y Nieves, Sint Lucia, Sint Vincent y Granadines, Surinam y Trinidad y Tobago.
