E aña aki Aruba Lions Club ta celebra 75 aña di existencia. En conexion cu e gran celebracion aki, presidente di Aruba Lions Club, Sr. Rubin Ponson a splica durante un conferencia di prensa kico ta e plannan pa cu e gran celebracion aki y con Aruba Lions Club su proyectonan mes ta bayendo.
For di aña 1947, Aruba Lions Club ta sirbi e comunidad di Aruba yudando esnan den mas necesidad. En conexion cu e celebracion di 75 aña di existencia, e aña aki Aruba Lions Club ta preparando pa diferente actividad pa su miembronan.
Sr. Ponson ta splica cu Aruba Lions Club ta conoci pa su proyectonan y ta consisti di miembronan cu ta sirbi den comunidad a traves di e diferente proyectonan aki, manera Hospital Bed and Wheelchair, Smile Mobile, Eye Sight – caminda ta check wowo di e muchanan di scol – entre otro.
Lamentablemente durante e temporada di pandemia, Ponson a indica, tabata dificil pa Aruba Lions Club sigui cu e proyectonan aki di manera optimal. “Nos tabatin un temporada dificil cu nos no por a atende cu esakinan. Mi ta kere for di aworaki caba nos ta cuminsa prepara esakinan sigur pa nos por cuminsa sali. Nos a cuminsa schedule algun di e proyectonan manera Smile Mobile, Hospital Bed and Wheelchair cu ta algo cu constantemente ta draai”, el a indica.
Pero asina mes, Ponson a subraya, den e temporada dificil Aruba Lions Club a bin cu otro proyectonan manera Hunger Relief, cu cual nan a haya mas cu un container di cuminda pa tur e hendenan cu a pasa den momentonan duro e temporada di pandemia. Segun el a menciona, nan a reparti mas di mil pakete di cuminda den comunidad pa diferente persona cu tabata den necesidad.
El a remarca tambe cu nan ta saliendo cu diferente otro proyecto, pensando riba otro proyectonan cu nan tin riba mesa pa cuminsa, mirando cu e situacion aworaki ta miho.
Ponson a sigui splica cu den cuadro di e celebracion di 75 aña di Aruba Lions Club, ta anuncia un proyecto pa recauda fondo. “Esaki ta locual ta laga Aruba Lions Club sobrevivi cu su proyectonan cu e tin cu sirbi comunidad cune. Sin e fondonan aki nos no por haci nada”, el a bisa.
Aruba Lions Club ta conoci pa e rifa di cas, cu tabata un di e recaudacionnan di fondo mas conoci cu e club tabata organisa, hunto cu otro proyectonan chikito cu nan ta haci pa haya e fondonan necesario. Pero e aña aki e rifa di cas a cambia y ta bira un rifa di auto y alabes inclui mas hopi premio posibel den e rifa.
Pa e rifa di auto, Ponson a sigui splica, nan a enfoca mas den tempo moderno cu nos ta aden, caminda ta papia hopi di autonan electrico etc.
E rifa di e biaha aki lo consisti di e siguiente cinco premio; premio number cinco ta un auto di mucha electrico; di cuater premio ta un step electrico; e di tres premio ta un bicicleta electrico; segundo premio lo ta un scooter electrico y e prome premio lo ta un auto electrico di cuater porta completamente nobo, 100% electrico cu un range di 300 km riba su bateria.
Durante e simannan y fin di siman cu ta bin den e proximo dos luna sigur, Ponson a subraya cu lo topa cu e miembronan di Aruba Lions Club den nan jacket geel na diferente parti di Aruba. “Cada compra di un rifa, cada florin cu bo inverti cerca nos ta bay 100% back den comunidad. Aruba Lions Club ta spera cu nos por haya sosten den comunidad pa compra di e rifa aki”, el a agrega.
E rifa lo hunga diadomingo 2 di october. Ponson a conta cu Aruba Lions Club lo tin su celebracion di 75 aña di existencia cu algun invitado internacional, cu lo bin pa celebra algun dia y lo culmina e celebracionnan aki cu e rifa di auto. E rifa lo tuma luga durante un actividad dilanti e sede di Aruba Lions Club mes cu musica, co’i come y co’i bebe pa asina celebra hunto cu e pueblo di Aruba e fecha aki y na final atardi pa 6or lo saca e ganadonan di e rifa for di un tombola.
Ticketnan di rifa lo ta disponibel na algun di e pomp stacionnan na Aruba. como tambe na diferente otro localidadnan rond di Aruba y mas cu claro cerca tur e miembronan di Aruba Lions Club.
Pa cualkier compania of persona cu ta desea di contribui cu e compra di un buki di rifa completo, por tuma contacto cu Aruba Lions Club a traves di nan pagina di Facebook of na number di telefon 592-1668 of 594-3595.
Por ultimo, Sr. Ponson a extende su invitacion na pueblo di Aruba pa contribui cu e recaudacion di fondo aki pa yuda Aruba Lions Club sigui brinda sosten na comunidad di Aruba. “Un biaha mas mi ta invita un y tur pa pidi, yama, busca unda bo ta wak e jacketnan geel pa bo cumpra bo ticket y sigur topa cu nos riba caya of yama e numbernan menciona of via Facebook bo por comunica cu nos. Sperando di haya e cooperacion di nos comunidad pa nos por cumpli back cu esnan den necesidad den e mesun comunidad aki”.
